Bisesero: Abasirikare b’Abafaransa ba Operation Turquoise barekeye Abatutsi mu maboko y’abicanyi

Yanditswe na Dr Bizimana Jean Damascène
Kuya 3 Nyakanga 2020 saa 03:08
Yasuwe :
0 0

Kudatabara Abatutsi mu Bisesero byabaye ikosa rikomeye kuri Operation Turquoise. Kuba abasirikare b’Abafaransa barageze mu Bisesero ku wa 27 Kamena 1994, byatumye Abatutsi bari bararokotse ubwicanyi bigaragaza nyuma 2,000 muri bo baricwa. Ibyo byabaye hari abanyamakuru b’abanyamahanga kandi abatangabuhamya b’Abanyarwanda benshi bemeje iyo myifatire mibi ya bamwe mu basirikare bakuru ba Operation Turquoise.

Kurekera mu maboko y’abicanyi Abatutsi bari bararokotse ni ikimenyetso gishimangira ko Operation Turquoise yari igikorwa cya gisirikare kititaye kuri Jenoside.

Abasirikare b’Abafaransa barekeye impunzi z’Abatutsi mu maboko y’abicanyi

Ku wa 27 Kamena 1994, abanyamakuru batatu barimo Patrick de Saint-Exupéry, Sam Kiley, n’abasirikare b’Abafaransa bayobowe na lieutenant-colonel bitaga Diego ariko mu by’ukuri izina rye rikaba ari Jean-Remy Duval, bagiye mu Bisesero.

Bageze mu Bisesero, bahabonye abari bararokotse bake ariko aba babanza kubihisha. Umwe mu mpunzi, Eric Nzabahimana, yavugishije Abafaransa abasobanurira ko bari bananiwe cyane nyuma yuko barwana amezi abiri yose n’abicanyi, bakaba bamaze n’igihe bahunga ibico by’abo bicanyi bibahiga buri munsi.

Buhoro buhoro, bamwe mu barokotse begereye abo Bafaransa. Umunyamakuru Patrick de Saint- Exupéry yiboneye ko izo mpunzi zari zinanutse cyane, zambaye imyenda icitse, kandi abenshi muri bo bafite ibikomere batewe n’imihoro: “hari umwana wari ufite ikibero cy’ubumoso cyavuyeho, n’umugabo wari ufite ukuboko kw’iburyo kuregarega kwenda gucikamo kabiri.”

Izo mpunzi zari zararokotse ubwicanyi zaberetse icyobo cya rusange cyari hafi aho, ndetse n’umurambo w’umuntu wari umaze gusa amasaha abiri yishwe. Nyuma impunzi zabonye ko uwari waje kwereka inzira Abafaransa ari Jean-Baptiste Twagirayezu, umwe mu bayobozi b’Interahamwe zirirwaga zibahiga kugira ngo zibice. Iyo Nterahamwe yashakaga kuyobya Abafaransa kugira ngo batabona impunzi, ahubwo agashaka kubajyana mu nkambi y’impunzi z’Abahutu zari zaravuye mu byabo, yari hafi ya Gisovu. Abafaransa bahise bamuhinda.

Diego yabwiye impunzi ko azagaruka nyuma y’iminsi ibiri cyangwa itatu, ko hagati aho zigomba kwihisha. Bagarutse ku Kibuye, Diego yaganiriye na Patrick De Saint-Exupéry waje kwandika ibi bikurikira:

« Lieutenant-colonel yari yumiwe : « Nabonye byinshi, ariko ibi byo… » Nta cyizere yari afite : « Mbere yuko tubasha kugaruka mu Bisesero, izindi mpunzi zigeze kuri 2000 zizaba zarishwe » Yasaga nk’unaniwe kandi yicuza cyane, yoherereza amakuru abamuyoboraga muri Etat-major : « Nibo bagomba gufata icyemezo. Niba twoherejwe hariya gutabara biriya bihumbi by’abantu bahigwa nk’inyamaswa, bizaba ari kubogamira ku ruhande rumwe, twiteranye n’Interahamwe n’abayobozi b’aka karere. Twe turiteguye. Tuzubahiriza ibyo tuzategekwa gukora. Ariko se, abayobozi bari i Paris bo bariteguye ? »

Mu gitabo cye aho asobanura uko bahuye n’impunzi n’uko bazirekeye mu maboko y’abicanyi, Patrick de Saint- Exupéry yanditse ko bagarutse ku Kibuye “Diego yamaze igihe kirekire avugana n’abayobozi i Paris, abaha amakuru yose.” Itegeko ryo kudatabara Bisesero ryavuye i Paris, impunzi zigera kuri 2,000 zirekerwa mu maboko y’abicanyi ziricwa nubwo Diego yari yabijeje ubutabazi.

Abari bararokotse ubwicanyi bagera ku 2000 basishwe Abafaransa bamaze kugenda

Abarokotse Jenoside yakorewe Abatutsi mu Bisesero bose bavuga ko nyuma yuko bamwe muri bo bahura n’Abafaransa, ibitero byiyongereye iminsi itatu yose mbere yuko Abafaransa bagaruka. Bavuga ko mu gihe bahuraga na Diego bari bageze kuri 2000, ariko nyuma y’ubwicanyi bukomeye bwamaze iminsi itatu, abashoboye kurokoka babaye 800 gusa.

Biratangaje kuba Diego yaravuze mu mvugo idafite icyizere: “Mbere yuko tubasha kugaruka mu Bisesero, izindi mpunzi zigeze kuri 2000 zizaba zarishwe”, kimwe no kuba yaravuze ko gutabara mu Bisesero byaba ari ukubogamira ku ruhande rumwe.

Bisa nk’aho byerekana ko, uretse impuhwe ze yashoboraga kuba afite ku giti cye, operasiyo y’Abafaransa yari ifite indi gahunda itagize aho ihurira no gutabara abari mu kaga nkuko byaririmbwaga.

Captaine Marin Gillier yanze guhagarika ubwicanyi bwakorerwaga abari bararokotse mu Bisesero

Mu matariki ya 28 na 29 Kamena 1994, abantu amajana n’amajana bavuye mu mihanda yose bahurira i Gishyita. Ibo byaberaga mu maso y’abasirikare b’Abafaransa bari bamaze mbere yaho iminsi nk’ibiri kugera i Gishyita. Abasirikare b’Abafaransa b’inzobere bageze kuri 70 bakambitse i Gishyita mu matariki ya 25 na 26 Kamena 1994.

Kuba Abafaransa baraje mu Bisesero byatumye abicanyi bamenya ko, nkuko batabikekaga, Abatutsi barokotse bari bakiri benshi mu Bisesero. Iyo nkuru yatumye abicanyi bo mu karere bategura ibindi bitero ndetse banahamagara n’abandi bavuye Cyangugu na Kibuye.

Abo bicanyi bose bageze ku majana bahuriye mu gasantere k’i Gishyita, bikorwa mu maso y’Abasirikare b’Abafaransa bari bahakambitse bayobowe na Capitaine Marin Gillier. Buri gitondo, iminsi itatu yose, abicanyi bazaga kuhahurira na bagenzi babo kandi kugira ngo bahagere bagombaga guca ku ma bariyeri atatu arinzwe n’abasirikare b’Abafaransa yari ku mbibi z’umudugudu bahuriyemo.

Colonel Rosier yafashe icyemezo cyo kudatabara Abatutsi bari bakiriho mu Bisesero

Kuba Diego yaratereranye Abatutsi bo mu Bisesero, na Gillier akanga kubatabara, byabazwa colonel Rosier. Diego yabwiye colonel Rosier ibyo yabonye mu Bisesero. Ndetse Gillier yavuze ko yatse inshuro ebyiri uburenganzira bwo kujya mu Bisesero, ku wa 27 no ku wa 28 Kamena 1994. Kandi Diego na Gillier bari munsi ya colonel Rosier wabayoboraga akanakurikirana umunsi ku wundi ibyakorwaga byose.

Biragaragara nta gushidikanya ko Rosier yahawe amakuru y’ukuntu Abatutsi bo mu Bisesero bari bugarijwe kandi ko babatabaje. Bivuze ko icyemezo cyo kudatabara impunzi mu Bisesero cyafashwe na colonel Rosier.

Ibyo colonel Rosier yabwiye ikinyamakuru cyo mu Bufaransa Libération ku wa 27 Kamena 1994, bishobora gutanga igisobanuro cy’imyifatire ye: “Iyi mitwe iri mu ntambara. Kugira ngo tutabogama ntabwo dushobora kubyinjiramo, hato ejo, Inkotanyi zicengeye batazabitwegekaho”.

Ariko tutarebye gusa imyifatire ya colonel Rosier, ibyabaye mu Bisesero bigaragaza neza aho ubuyobozi bwa gisirikare bw’ingabo z’Abafaransa bwari bubogamiye. Bigaragarira no mu mabwiriza abasirikare b’Abafaransa bahawe mbere yo kuza mu Rwanda aho babwiwe ko abavugwaga ko bicwa ari bo bari abicanyi.

Ni Thierry Prungnaud wari mu Bisesero mu gihe cya operasiyo Turquoise, mu ngabo zayoborwaga na Marin Gillier, wabisobanye avuga ko mu gihe bari bakiri mu Bufaransa bababwiye ko Abatutsi ari bo bicaga Abahutu. Iyo mvugo igoreka amateka ya Jenoside yerekana urwango rw’Abatutsi bari bakiriho nyamara bavugwaga ko ari bo Abafaransa bari baje gutabara, kandi ikerekana ko bari babogamiye ku bicanyi. Ubuyobozi bwa gisirikare bwashatse kuyobya ingabo zabo kugira ngo hato zitagirira impuhwe Abatutsi bakorerwaga Jenoside.

Imyifatire mibi y’abasirikare b’Abafaransa mu guha ubutabazi abarokotse ubwicanyi muri Bisesero

- Abasirikare b’Abafaransa bashyize abarokotse mu buzima bubi bwabaviriyemo gupfa, banakata ingingo z’abakomeretse bitari ngombwa i Goma

Imyifatire mibi kandi ibogamye y’Abafaransa yaje no kugaragara mu bikorwa byabo ngo by’ubutabazi. Abafaransa bamburaga intwaro zari zitwaje n’abo bavugaga ko batabaye, bakaziha Interahamwe n’abasirikare ba Leta bacaga hafi y’inkambi z’abarokotse.

Kandi iyo impunzi zasabaga gusanga FPR aho yagenzuraga bakanga gukomeza kurindwa n’ingabo z’Abafaransa, ntibongeraga kugaburirwa bigatuma, nkuko Abafaransa babyifuzaga, impunzi zisohoka mu nkambi gushaka ibyo kurya. Abenshi muri bo ntibagarukaga bishwe n’abicanyi bazengurukaga hafi y’inkambi y’Abasesero. Iyo ingabo z’Abafaransa zajyanaga impunzi mu gice cya FPR, zabikoraga mu buryo bubi bwari byugarije ubuzima bw’impunzi.

- Abakomeretse cyane mu barokotse bagiye babaca ingingo bitari ngombwa i Goma

Abarokotse mu Bisesero bafite ibikomere bikomeye bajyanwaga i Goma n’ingabo z’Abafaransa, ariko bakaba barababajwe cyane ibyo bakorewe n’abaganga b’abasirikare b’Abafaransa. Babarega kubafata nabi mu gasuzuguro kenshi, ariko cyane cyane kuba barakaswe ingingo bitari ngombwa. Itsinda ry’abaganga b’abasirikare b’Abafaransa i Goma ryari rigizwe n’abantu 12 barimo inzobere mu kubaga 2, usinziriza abarwayi mbere yo kubagwa umwe n’abandi babafasha.

Pascal Nkusi, warokokeye mu Bisesero akajyanwa i Goma ku wa 1 Nyakanga 1994, avuga imibereho yabo i Goma, uko Abafaransa bakoranyije inkomere bakajyana abakomeretse cyane kuvurirwa i Goma bakabajyana baryamye hasi ku bipira muri kajugujugu mu bitaro byabo i Goma hafi y’ikibuga cy’indege cyaho ; batangiraga kubavura baraye bahageze.

Umwanzuro

Mu Bisesero hari abari bararokotse benshi ubwicanyi. Batewe kenshi kuva ku wa 15 Mata 1994, ariko bagerageza kwirwanaho bahangana n’abicanyi. Ariko Abafaransa bahageze batuma abarokotse bava mu bwihisho bwabo, banabizeza kuzabarindira umutekano. Ibyo byabaye mu Bisesero ariko n’ahandi mu nkengero za Kibuye. Bahavuye, ibihumbi by’Abatutsi byarishwe.

Ibyabaye mu Bisesero biza bishimangira ko Operation Turquoise yaje gushyigikira Guverinoma y’abicanyi n’ingabo zayo. Gutabara Abatutsi, abayobozi b’Abafaransa babifataga nko kubogama ku ruhande rumwe, ariko bikaba byari bigamije kutabangamira abicanyi. Abatutsi barokotse abenshi kubera ko hari abanyamakuru b’abanyamahanga.

Abasirikare b'Abafaransa batereranye ibihumbi by'Abatutsi mu Bisesero

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .