00:00:00 IGIHE NETWORK KN KINYARWANDA EN ENGLISH FR FRANCAIS

Bigenda bite ngo ahandi gutwara abantu mu buryo rusange bikorwe neza?

Yanditswe na NKURUNZIZA Faustin
Kuya 19 Mutarama 2023 saa 11:31
Yasuwe :

Mu myaka 30 ishize, gutwara abantu mu buryo rusange [Public Transport] byagiye biba ingorabahizi n’ubu rukigeretse, uko umwaka uhita undi ugataha havugutwa umuti wabyo ariko bikanga imodoka zikaba iyanga mu mujyi wa Kigali ndetse no muntara zigize igihugu.

Wakwibaza uti “Habura iki ngo igihugu nk’u Rwanda gifatira icyitegererezo ku bihugu nka Singapore kandi rukaba rukataje mu iterambere ku buryo ruba icyitegererezo mu bihugu bimwe biri mu nzira y’amajyambere bya Afurika n’ahandi ku isi, ikibazo cy’imodoka rusange zitwara abagenzi gikemuke burundu?”

Ubwo yari mu nteko ishinga amategeko kuwa 9 Mutarama 2023, Perezida wa Repubulika, Paul Kagame yagarutse ku kibazo cy’ubuke bw’imodoka zidahagije mu gutwara abagenzi, yagejejweho n’abaturage asaba ababishinzwe ko bagomba gukemuka icyo kibazo.

ONATRACOM yacitse intege mu micungire yayo

Mbere ya Jenoside yakorewe abatutsi 1994 na nyuma yaho, mu Rwanda habagaho ikigo gishinzwe gutwara abantu cyitwaga ONATRACOM imodoka zacyo zajyaga mu biturage hirya no hino cyane cyane ahabaga imihanda y’igitaka zifasha abaturage mu ngendo zabo za buri munsi.

ONATRACOM yatangiye gukora mu 1978, bigeze mu 2013 bigaragara ko itagitanga serivisi nziza, mu Ukuboza 2015 hashyirwaho ikigo cyo kuyisimbura kitwa RITCO. Nk’uko byagiye bitangazwa mu myaka yashize n’ubuyobozi bwa ONATRACOM, ngo yabonaga imodoka zigera ku 100 kandi zose ari inkunga zatangwaga n’igihugu cy’u Buyapani ariko kubera imiterere mibi y’imihanda yo mu Rwanda ndetse n’icyaro zakoreragamo zarangirikaga bigatuma intego ubuyobozi bwayo bwihaye mu gutanga serivisi nziza itagerwaho uko bikwiriye.

Iki kigo kandi cyagiye kivugwaho imicungire mibi y’umutungo, aho abayobozi bari bashinzwe kuyiyobora bagiye bakurwa muri iyo myanya bagasimbuzwa abandi ariko bikanga bikaba iby’ubusa n’ababasimbuye bagakomeza kurangwaho n’umuco wo kunyereza umutungo wa ONATRACOM.

Mbere y’uko yamburwa inshingano zayo yagaragayeho n’ibibazo byo kwambura abakozi bayo, bamwe bahitamo kugana inkiko, abandi babyakira uko byari biri.

RITCO iracyafite urugendo rutoroshye

Nubwo RITCO yaje gukorera mu ngata ONATRACOM; kugera ubu iracyafite ibibazo byo kugera mu gihugu hose kuko uko iterambere ry’imihanda rigenda rigera hirya no hino mu gihugu, bisaba ko abaturage bo mu cyaro cyakure nabo bagerwaho n’izo modoka zayo nini zitwara benshi icyarimwe bikaba ibihoraho kandi badakererejwe nazo mu kugera iyo bajya.

Bitewe n’ubwinshi bw’abaturage bakenera serivisi z’urugendo umunsi ku wundi kandi RITCO ikaba ibifite mu nshingano zayo mu gutwara abaturage bajya mu byaro bya kure hirya no hino mu ntara, bigaragara ko igifite urugendo rutoroshye rwo guhaza isoko kuko akenshi imodoka zayo zikunze kwiyambazwa na Leta mu gutwara abajya mu bikorwa by’ahahuriwe n’abantu benshi hirya no hino mu gihugu no muri stade z’igihugu bitewe n’igikorwa runaka cyabahuje.

Icyo gihe abari biteze kujyanwa nazo mu ngendo zabo za buri munsi babihomberamo kuko ziba zagiye gutanga ubufasha ahandi.

Mu mwaka wa 2017 Leta yari ifite imigabane muri RITCO ingana na 52% naho ikigo RFTC gisanzwe gitwara abantu kikagiramo 48% nk’uko byigeze gutangazwa na Dr. Alexis Nzahabwanimana wari umunyamabanga wa Leta muri MININFRA icyo gihe.

RFTC na Jali byifashe bite mu gutwara abantu?

Mu rwego rwo gukemura ibibazo bigaragara mu gutwara abagenzi mu buryo bwa rusange mu Mujyi wa Kigali, ubuyobozi bwa Jali Transport Ltd buherutse gutangaza ko buteganya kongera umubare w’imodoka nini ikoresha bikaba intero imwe no muri RFTC ifite inshingano zo gutwara abaturage mu ntara z’igihugu.

Bikomeje kugaraga ko gutwara abantu mu Rwanda bikomeje kuba ikibazo gikomeye kuko ubwinshi bw’abantu nabwo bwiyongera umunsi ku wundi.

Ni ikibazo gisaba gushyirwamo imbaraga nyinshi kuko iyo gutwara abagenzi bitameze neza bigira ingaruka nini ku baturage n’umusaruro batanga mu kazi ugahungabana kubera kutagerera ku kazi ku gihe.

Mu minsi ishize iki kibazo cyakomeje kuvugwa bigera n’aho RURA isaba abikorera ku giti cyabo bafite ubushobozi bw’imodoka nyinshi nabo batanga umusanzu wabo mu gukemura ikibazo cy’ubuke bw’imodoka zitwara abagenzi ariko ikibazo kiranga kirananirana.

Uko ahandi bigenda

Muri rusange mu bindi bihugu byateye imbere by’i Burayi, Aziya na Amerika, gutwara abantu mu buryo rusange bikorwa cyangwa bigashyirwamo imbaraga na Leta n’ibigo bibifitiye ubushobozi kugira ngo igiciro cy’urugendo cyorohere umuturage ujya cyangwa uva mu mirimo ye ya buri munsi ndetse n’ukora urugendo rurerure byose abigeraho bitamuhenze kandi akagera iyo agiye ku gihe.

Akenshi muri ibyo bihugu twavuze haruguru, umuturage uteze imodoka rusange ku muhanda, bimufata nibura iminota cumi n’itanu kuba yamugezeho agafata urugendo rwe yagera ahandi hamusaba gutega agasanga naho ari uko, igihe kigakomeza kubahirizwa, ku buryo nta mugenzi umara isaha ku muhanda ateze imodoka atarayibona nk’uko bigenda hano mu Rwanda.

Muri ibyo bihugu kandi bagira ubundi buryo butandukanye bwo gutwara abantu ku butaka burimo bisi nini cyane n’izindi zikoresha amashanyarazi zifite insinga hejuru zigenderaho n’ibyuma bita ‘rail transport’ harimo kandi metro, gari ya moshi ndetse n’utundi tumodoka duto dutwara abantu mu kirere twambukiranya imisozi, two tukaba duteganywa kuzazanwa inaha mu Rwanda.

Gutwara abantu bishakiwe igisubizo kirambye, byaca akajagari k’abatwara moto muri Kigali ndetse n’indi mijyi yunganira Kigali, kuko gutwara abagenzi kuri moto nta handi biba mu bihugu byateye imbere kuko bigaragara ko u Rwanda icyerekezo rurimo neza neza bisa nko mu bihugu byateye imbere ugendeye ku isuku, inzu zijyanye n’icyerekezo ndetse n’icyerekezo gihamye no gutwara abantu bigaragara ko Leta yabihagurukiye isaba ibigo bibishinzwe gukemura ikibazo cy’ubuke bw’imodoka.

Ingero z’uko ahandi gutwara abagenzi bikorwa

Aha ni muri Singapore

Aha ni mu Misiri

Aha ni Dubai

Mu Bwongereza


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .