00:00:00 IGIHE NETWORK KN KINYARWANDA EN ENGLISH FR FRANCAIS

Bigenda bite iyo uwarokotse Jenoside ahuriye n’uwamuhekuye muri gereza?

Yanditswe na Akayezu Jean de Dieu
Kuya 20 June 2022 saa 07:33
Yasuwe :

Mu 1996 nibwo Grégoire Nyirimanzi yinjiye muri Gereza ya Nyarugenge yari izwi nka 1930 [ubu yimuriwe i Mageragere], nyuma yo guhamwa n’ibyaha bifitanye isano n’uruhare yemera ko yagize muri Jenoside yakorewe Abatutsi mu 1994.

Nyirimanzi w’imyaka 56, avuga ko yinjiye bwa mbere muri gereza afite ubwoba ko azagirirwa nabi kubw’amahano yakoze, ariko agezemo asanga ibyo yibwiraga bitandukanye n’ibyo yahasanze.

Uyu mugabo wavukiye mu Nyakabanda, yaje no kuba umukozi ushinzwe gusoresha mu masoko mu yahoze Perefegitura ya Kigali [Précepteurs], ni inshingano yaje gufatanya no kuba Konsiye wa Segiteri Nyakabanda ari nazo nshingano yari afite kugeza mu 1994.

Uruhare rwa Nyirimanzi muri Jenoside ararwemera cyane ko mu 1994, ubwo yari Konsiye yari n’Umuyobozi wa MRND mu Nyakabanda.

Niwe wakoraga amalisite y’Abatutsi bagombaga kwicwa. Yitabiriye ndetse anayobora zimwe mu nama zateguraga ubwicanyi zirimo izaberaga kuri Club Rafiki, kuri Hotel Impala n’izindi zaberaga mu ngo z’abategekaga MRND.

Mu kiganiro na IGIHE yagize ati “Mu 1991 nasabwe gukora amalisiti y’urubyiruko [urwaje kuvamo Interahamwe] rwagombaga kujya kwitoza imbunda i Gabiro, rwatozwaga n’abasirikare b’Abafaransa n’Abajepe, bavuyeyo bahabwa ibikoresho birimo imbunda.”

“Mu 1994 Jenoside itangira, byabaye ngombwa ko ba bandi bari baritoje aribo batangira kwica abaturage mu Nyakabanda. Indege ya Perezida Habyarimana igwa, urwo rubyiruko nirwo rwabaye urwa mbere. Ndibuka ko mu Nyakabanda iwacu, urugo rwa Mbere rwishwe ni urwa Pasiteri Amon Iyamuremye, yicwa atwitswe bikozwe n’Interahamwe zo mu Nyakabanda, ku mabwiriza twari twazihawe.”

Nyirimanzi asobanura neza uburyo we ku giti cye yagize uruhare rukomeye muri Jenoside yakorewe Abatutsi, ndetse agashimangira ko ari ibintu byari byarateguwe n’ubuyobozi bukuru bw’igihugu.

Ati “Nitabiriye inama kandi zateguraga kwica Abatutsi, zabereye kuri Perefegitura y’Umujyi wa Kigali ziyobowe na Col Renzaho Tharcisse, Col Hakizimana, Général Gratien Kabiligi […] Nitabiriye kandi inama zabereye muri Hotel Impala zari zirimo Umunyamabanga Mukuru wa MRND, Ngirumpatse Mathieu [Matayo], harimo n’abandi bayobozi bariya bari bayoboye Interahamwe.”

Uko yaje kwisanga afunganywe n’uwo yamariye umuryango...

Ni ikibazo umuntu wese by’umwihariko utarafungwa, yakwibaza uko bishobora kugenda iyo uwagize uruhare muri ayo mahano yagwiririye u Rwanda nka Nyirimanzi Grégoire, ahuriye muri gereza n’uwo yahekuye.

Mu 2019, Nyirimanzi yaratunguwe ubwo umwe mu bana b’uwo yahemukiye muri Jenoside yamusangaga muri gereza.

Ati “Hano mu gipangu dufunganywe n’abana b’abo twahemukiye. Hari uwitwa Gasana arimo hano, umuryango we ninjye wagize uruhare mu kuwumara.”

Yakomeje agira ati “We ageze mo hano, twembi twarakatanye [gucengana], buri muntu acunga undi, kugeza ubwo ari we waje kunyibwirira ati ese ko mbona buri gihe njya kugusuhuza ukanyitaza, urabona amaherezo ari ayahe? Arambwira ngo mba mbona umpunga kandi njye narakubabariye.”

Nyirimanzi kuri ubu ukatiwe gufungwa imyaka 30 avuga ko ubwo yaburanaga mu Nkiko Gacaca na mbere yazo, yari yarireze yemera icyaha ndetse asaba imbabazi kugeza ubwo n’abo yahemukiye bamubabariye bamusabira imbabazi.

Ati “Bansabiye imbabazi, bansabira urukiko kundekura ariko ninjye wisabiye igihano. Rwose bari banyemereye ko njya muri TIG [Imirimo Nsimburagifungo], ngataha ariko njye ndavuga ngo ntabwo nkwiye kujya mu Rwanda rw’ubu n’ibyo nakoze.”

Avuga ko kuri ubu abanye neza na Gasana kandi abimushimira kuba yaramuhaye imbabazi kuko byatumye abohoka ku mutima n’ubwo ibyo yakoze ari indengakamere.

Ati “Tubanye neza [we na Gasana], ndakubwira ngo niwe umpa amazi ashyushye […] Niwe muntu ngira w’inshuti. Uburiri bwanjye n’ubwe burabangikanye, nta kibazo kirimo rwose. Sinshobora kumwikanga kubera ko yangiriye imbabazi. Mbere ntaramusaba imbabazi nararaga nsimbagurika kubera ibyo naciyemo.”

Nyirimanzi avuga ko yamaze gusaba imbabazi, ndetse akaba ashishikariza bagenzi be baba abari mu Rwanda cyangwa hanze yaho gufata iya mbere bagasaba imbabazi z’ibyo bakoze.

Mu gihe cya Jenoside, Gasana yahungiye muri Paruwasi Sainte Famille, ari naho yarokokeye nyuma aza kujya mu gisirikare, aho yaje kuva asubira mu buzima busanzwe nyuma aza kugongana n’amategeko yisanga i Mageragere.

Ubumwe n'ubwiyunge ni amwe mu masomo yimakajwe muri gereza zose zo mu Rwanda

Yabwiye IGIHE ko ubwo yageraga muri gereza agasangamo Nyirimanzi wamuhekuye , yabanje kugira ubwoba bw’uko ashobora kuzongera akamugirira nabi, gusa nyuma aza gufata iya mbere aramwegera.

Icyo gihe na Nyirimanzi yahise abohoka baraganira, amubwira abo yishe aho yagiye abajugunya, arangije amusaba imbabazi arazimuha.

Yavuze ko ubuyobozi bwa gereza bubasha binyuze mu biganiro biba hagati y’abakoze Jenoside n’abayirokotse, ndetse ngo iyo hagize uvuga ijambo ribi aragarugwa, byaba na ngombwa akaba yahanwa.

Iyi ni inkuru imwe muri nyinshi z’abo IGIHE yamenya bafunganywe muri gereza ya Nyarugenge kuko hari nk’uwitwa Imananibishaka Jean Berchmas wamenyekanye ku izina rya ’Sukari’ nawe wahuriye muri gereza n’umugore witwa Aisha yiciye umuryango.

Uruhare rw’ibiganiro n’amasomo bahabwa muri gereza

Muri gereza naho ni mu Rwanda kandi abazicumbikiwemo baba abakoze ibyaha bya Jenoside ndetse n’ibindi, baba bashobora kurangiza ibihano bagasubira mu Muryango Nyarwanda.

Ni ukuvuga ko nk’uko biri mu nshingano z’Urwego rushinzwe Imfungwa n’Abagororwa, RCS, baba barajyanywe kugororwa kugira ngo bategurwemo abatazongera kugongana n’amategeko, bityo bafatanye n’abandi kubaka igihugu cyabo.

Niyo mpamvu abafungiye muri za gereza bagira umwanya bahabwaho ibiganiro biganisha ku bumwe n’ubwiyunge.

Ni ibintu byunganira izindi gahunda ziba zarashyizweho ku rwego rwa gereza zirimo kubabumbira mu matsinda [clubs] arimo ay’Ubumwe n’Ubwiyunge, Ndi Umunyarwanda ndetse no kurwanya Jenoside [Anti-Genocide Club] n’andi atandukanye.

Gasana ati “Mu myaka maze mfungiye hano, hari gahunda y’ubumwe n’ubwiyunge ndetse na Club y’Ubumwe n’Ubwiyunge irahari, kandi duhabwa ibiganiro bitandukanye. Buri wa mbere tugira umugoroba w’umuco tuganiriramo gahunda ya Ndi Umunyarwanda.”

Yakomeje agira ati “Buri wa kabiri habaho ibiganiro bya Mvura Nkuvure, duhurira hamwe abantu bamaze igihe bafunzwe bazira icyaha cya Jenoside n’abandi baregwa ibyaha bisanzwe, baganira, tugasubira mu mateka.”

Mu bafatanyabikorwa muri izi gahunda harimo Prison Fellowship Rwanda, Umuryango ukora ivugabutumwa muri za gereza ukanakora ibikorwa by’ubukangurambaga bugamije ubumwe n’ubwiyunge n’isanamitima.

Imibare ya Prison Fellowship Rwanda igaragaza ko kugeza mu 2022, hari abakoze Jenoside n’abayirokotse basaga ibihumbi 25 bari bamaze guhuzwa bagasabana imbabazi.

Umuvugizi wa RCS, SSP Pelly Gakwaya Uwera yavuze ko uwo ari umusaruro w’ubufatanye bw’inzego zitandukanye mu kubaka Ubumwe n’Ubwiyunge.

Ati “Leta yacu yahisemo kunga Abanyarwanda, Jenoside yakorewe Abatutsi yateguwe inashyirwa mu bikorwa n’ubuyobozi bubi ariko uyu munsi turashima ubuyobozi bw’igihugu cyacu bwahisemo kongera kunga Abanyarwanda no kubabanisha mu mahoro.”

Yakomeje agira ati “Twashyizeho uburyo bwihariye bwo kwigisha by’umwihariko abagize uruhare muri Jenoside, ibyo bigakorwa binyuze mu buyobozi bwa gereza ndetse n’ubuyobozi bwabo ubwabo.”

Muri rusange imibare iheruka ya RCS, igaragaza ko muri gereza zo mu Rwanda, hakiri abantu 22,701 bafungiye icyaha cya Jenoside. Harimo 4342 bakatiwe igifungo cya burundu.

SSP Uwera ati “Abenshi bemeye icyaba banagisabira imbabazi ku buryo no mu mibanire n’abandi baturage baba bafunganywe nabo usanga nta kibazo kirimo n’ubwo ahantu hari abantu benshi hadashobora kubura ugira imvugo yakomeretsa undi, ariko ubikoze ashyirwa ahantu ha wenyine, akaganirizwa, byaba na ngombwa agahanwa.”

Mu myaka 20 ishize muri gereza zo mu Rwanda hamaze gufungurwa abarenga ibihumbi 45, bari barahamijwe icyaha cya Jenoside.

Umuvugizi wa RCS, SSP Pelly Gakwaya Uwera yavuze ko uwo ari umusaruro w’ubufatanye bw’inzego zitandukanye mu kubaka Ubumwe n’Ubwiyunge
Muri gereza zo mu Rwanda hatangwa ibiganiro bitandukanye bigaruka ku bumwe n'ubwiyunge. Byatanze umusaruro kuko byatumye benshi bagana inzira y'ubwiyunge

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .