Bibutse ku ivuko! Abanyarwamagana baba hanze bahaye mituweli imiryango 500 itishoboye

Yanditswe na Hakizimana Jean Paul
Kuya 3 Nzeri 2020 saa 11:00
Yasuwe :
0 0

Abaturage batuye mu mahanga bavuka mu Karere ka Rwamagana bashyikirije ubuyobozi bwako amafaranga angana na miliyoni 2 400 000 Frw arimo ayo kwishyurira ubwisungane mu kwivuza imiryango 500 itishoboye no kugura amabati 150 yo kubakira abadafite aho kuba.

Ni igikorwa cyabaye kuri uyu wa Kane tariki ya 3 Nzeri 2020 kibera ku biro by’Akarere ka Rwamagana.

Kiwanuka Sudi wari uhagarariye Abanyarwamagana baba mu mahanga yavuze ko bagize igitekerezo cyo kwishyira hamwe bivuye ku ijambo rya Perezida Kagame ngo bagire icyo bafasha akarere bavukamo mu gufasha imiryango itishoboye.

Yagize ati “Iki gitekerezo cyavuye mu kunganira ijambo ry’Umukuru w’Igihugu uhora udusaba mu kwiyubakira igihugu niyo mpamvu twatekereje gutanga amabati ngo twubakire abantu batishoboye no kugerageza kuvuza abadafite ubushobozi bwo kwivuza tubatangira ubwisungane mu kwivuza.”

Yakomeje avuga ko kuri ubu iki gikorwa bagitangiye uyu mwaka ariko ngo barateganya kucyagura bakagira abantu benshi cyane bavuka i Rwamagana bashobora kujya bafasha ubuyobozi bw’akarere buri mwaka mu bikorwa bitandukanye.

Yavuze ko kuri ubu bagiye gukomeza gukora ubukangurambanga mu Banyarwamagana baba mu mahanga ku buryo bagura imigabane mu isoko ryenda kubakwa muri aka karere.

Ati “Turashaka kugenda tubwirana, tukaba abavugizi kuburyo twashora mu kubaka isoko n’amahoteli mu Mujyi wa Rwamagana, umwaka utaha hazaza ubuvugizi bwisumbuyeho burenze ubwo twatanze uyu munsi.”

Umuyobozi w’Akarere ka Rwamagana, Mbonyumuvunyi Radjab, yavuze ko amafaranga bahawe yo gufasha abaturage badafite ubwisungane mu kwivuza agiye gufasha benshi.

Ati “Byadukoze ku mutima. Akarere ka Rwamagana twabonye ko dufite abaduserukira hirya no hino ku Isi kubera ko bagitekereza i Rwamagana. Uru ni urugero rwiza ku bandi ubu bikozwe n’Abanyarwamagana bavuka mu Murenge wa Kigabiro ariko n’abandi babikomeza bakajya mu mahanga ariko ntibibagirwe iwabo.”

Kuri ubu Akarere ka Rwamagana kageze kuri 81% mu kugira abaturage batanze ubwisungane mu kwivuza, bivuze ko hakiri abaturage bangana na 19% bataratanga mituweli.

Mu bijyanye n’abaturage badafite aho kuba aka karere kavuga ko abaturage 467 bari bahari mu mwaka ushize bose babashije kubakirwa kuri ubu hakaba hagenda hagaragara umuturage umwe umwe ari nabo bagenda bashakirwa aho kuba.

Abanyarwamagana baba mu mahanga biyemeje gukora ubukangurambaga muri bagenzi babo bakagura imigabane mu isoko ryenda kubakwa mu gace bavukamo
Umuyobozi w'Akarere ka Rwamagana, Mbonyumuvunyi Radjab, yashimiye Abanyarwamagana baba mu mahanga ku nkunga batanze
Bamwe mu baturage bakiriye amabati bahawe n'Abanyarwamagana baba mu mahanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .