Bazivamo yongerewe manda y’imyaka itatu nk’Umunyamabanga Mukuru Wungirije wa EAC

Yanditswe na Rabbi Malo Umucunguzi
Kuya 2 Gashyantare 2019 saa 08:46
Yasuwe :
0 0

Inama ya 20 y’abakuru b’ibihugu bigize Umuryango wa Afurika y’Iburasirazuba, EAC, yongereye manda Bazivamo Christophe nk’Umunyamabanga Mukuru Wungirije w’Umuryango wa Afurika y’Iburasirazuba, EAC, aho azaguma muri izi nshingano mu yindi myaka itatu iri imbere guhera muri Nzeli 2019.

Bazivamo yarahiriye izi nshingano z’Umunyamabanga Mukuru Wungirije ushinzwe Imari n’Ubutegetsi muri EAC, mu nama ya 17 idasanzwe y’abakuru b’ibihugu bigize uyu muryango yabereye i Dar es Salaam muri Tanzania, muri Nzeri 2016.

Yungirije Umunyamabanga Mukuru wa EAC, Umurundi Ambasaderi Liberat Mfumukeko.

Nk’uko imyanzuro y’inama ya 20 y’abakuru b’ibihugu bya EAC ibigaragaza, uwa 12 ugira uti “Inama yagarutse ku mabwiriza agena abanyamabanga bakuru bungirije babiri b’Umuryango wa Afurika y’Iburasirazuba bashyirwaho buri gihugu gihabwa umwanya wacyo, maze yemeza ko Umunyamabanga Mukuru Wungirije watanzwe na Repubulika ya Tanzania n’Umunyamabaga Mukuru Wungirije watanzwe n’u Rwanda, bakomeza manda zabo ebyiri muri izi nshingano.”

Mu nama yabaye kuri uyu wa Gatanu ni nabwo byemejwe ko Perezida Paul Kagame ari we uzayobora uyu muryango ku rwego rw’abakuru b’ibihugu, mu mwaka uri imbere.

Bazivamo Christophe yakoze imirimo itandukanye aho yabaye Perefe w’iyahoze ari Perefegitura ya Gitarama kuva mu 1999 kugeza mu 2000. Kuva mu 2000 kugeza mu mpera za 2002, yari Umunyamabanga Nshingwabikorwa wa Komisiyo y’Igihugu y’Amatora.

Kuva mu mwaka wa 2002 kugeza ku itariki ya 06 gicurasi 2011, Bazivamo yabaye minisitiri muri za minisiteri zitandukanye, zirimo Minisiteri y’ubutegetsi bw’igihugu, iy’ubutaka, ibidukikije, amashyamba, amazi na mine, iy’Umutekano n’iy’Ubuhinzi n’ubworozi.

Guhera mu 2011, bazivamo Christophe yabaye umudepite mu nteko y’Umuryango wa Afurika y’Iburasirazuba “EALA kugeza mu 2016 ubwo yagirwaga Umunyamabanga Mukuru Wungirije Ushinzwe imari n’ubutegetsi. Hejuru y’iyi myanya ya politiki yose, kuva mu 2002 Bazivamo yari n’Umuyobozi Wungirije w’Umuryango FPR Inkotanyi.

Bazivamo yize muri Kaminuza Nkuru y’u Rwanda aho yarangije afite impamyabumenyi y’icyiciro cya kabiri mu bijyanye n’ubuhinzi. Yakomereje amasomo ye mu Budage muri Kaminuza ya Göttingen, aho yakuye impamyabumenyi y’icyiciro cya gatatu cya kaminuza mu bijyanye n’ubuhinzi, ariko yibanda ku gashami k’ibijyanye n’ubukungu n’iterambere ry’icyaro.

Mu yindi myanzuro yafatiwe muri iyo i Arusha kuri uyu wa Gatanu, harimo ko abakuru b’ibihugu bashyikirijwe raporo y’inama y’abaminisitiri b’ibihugu bigize uyu muryango, igaragaza ko buri gihugu cyamaze gutanga amazina y’impuguke zigiye kwiga ku Itegeko Nshinga rizagenga EAC nimara kwishyira hamwe mu bya politiki.

Abaminisitiri basabwe gutanga raporo ya mbere mu mezi arindwi, bakazahabwa ubufasha mu bya politiki na Perezida Yoweri Museveni wa Uganda.

Yanakiriye Raporo ku rugendo rwo kwinjiza neza Sudani y’Epfo mu kwishyira hamwe kwa EAC inamenyeshwa ko igenzura ku kureba niba Somalia yakwakirwa muri uyu muryango ritakozwe.

Yanakiriye kandi raporo ku guteza imbere ibikorwa byo guteranya imodoka mu karere hagamijwe kugabanya ugutumizwa hanze y’umuryango imodoka zakoze, basaba inama y’abaminisitiri kubikurikirana, ikazabitangaho raporo mu nama ya 21.

Yanarebye ku ngamba zigamije guteza imbere inganda zikora imyenda n’inkweto muri aka karere, hagamijwe kugabanya ibitumizwa hanze byarambawe.

Ku bijyanye n’amasezerano y’Ubufatanye mu by’ubukungu hagati ya EAC n’Umuryango w’Ubumwe bw’Ibihugu by’u Burayi azwi nka EPA atarakiriwe kimwe n’ibihugu byose bigize uyu muyango, iyi nama yakiriye raporo ya Perezida Yoweri Museveni, yemeza gusaba EU ibiganiro mu mezi ane ari imbere ku mpungenge ibihugu bifite, nyuma ibyifuza kuyasinya bikabikora cyangwa bikabyihorera.

Aba bakuru b’ibihugu kandi biyemeje gushyigikira kandidatire ya Kenya irimo guhatanira umwanya udahoraho mu kanama k’Umuryango w’Abibumbye gashinzwe Umutekano ku Isi, muri manda y’imyaka ibiri hagati ya 2021-2022.

Iyi nama kandi yasabye abaminisitiri bashinzwe EAC, gusuzuma bitarenze amezi atatu amategeko ahari no guhuza gahunda zirebana no gutumiza ibicuruzwa hagati y’ibihugu bigize umuryango, hagamijwe guteza imbere inganda zo muri ibi bihugu.

Bazivamo Christophe yarahiriye izi nshingano mu 2016

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza