Batatu bakekwaho kwigana kashe 47 zirimo iza leta n’ibigo by’abikorera bafashwe (Video)

Yanditswe na Tuyishimire Raymond
Kuya 1 Ukuboza 2020 saa 03:51
Yasuwe :
0 0

Polisi y’u Rwanda kuri uyu wa kabiri yerekanye abantu batatu bafatanywe kashe 47 z’ibigo bya leta n’iby’igenga bakoreshaga mu bikorwa by’ubutekamutwe.

Izo kashe ziganjemo iz’amabanki, imirenge, amavuriro, Polisi n’ibindi bigo. Usibye kuba bacuraga kashe, bahimbaga n’impushya zo gutwara ibinyabiziga.

Umwe muri aba bakekwa yavuze ko yafashwe ubwo yari amaze kuvugana n’umuntu uri muri Canada, wari wamusabye kumufasha akabona icyangombwa cyo gutwara ikinyabiziga.

Ati “Hari umudamu wampamagaye uba Canada, ansaba ko namufasha kubona uruhushya rwo gutwara imodoka hanyuma mpamagara undi muntu yemera ko yadufasha tukabibona."

Yavuze ko yahamagaye uwo muntu hanyuma bacura icyo cyangombwa baracyohereza. Ati "Permis twarayikoze njye n’uwo muhungu hanyuma njya kuyifata, nyiha musaza we kuko ari we yari yambwiye ko mbiha."

Yongeyeho ko yari bwishyurwe 150.000 Frw nyuma yo gukora icyo cyangombwa, ariko mbere yo gutangira ako kazi babaha 100.000 Frw andi bemererwa ko bazayabona nyuma.

Umuvugizi wa Polisi y’Igihugu, CP John Bosco Kabera, yasabye abanyarwanda kugana inzego zizwi kandi zibifitiye ububasha mu gihe hari ibyangombwa bakeneye.

Ati" Abantu batazagana umurenge, ngo bagane banki, bagane Polisi, ibitaro, bakagenda bagashaka umuntu nk’uyu aho akorera mu cyumba cye, afite kashe agahimba izo nyandiko bamenye ko bazabibazwa".

Aba nibaramuka bahamijwe iki cyaha cyo gukora no gukwirakwiza inyandiko mpimbano, bazahanishwa igifungo kuva ku myaka itanu kugeza kuri irindwi n’ihazabu iri hagati ya miliyoni eshatu na miliyoni eshanu z’amafaranga y’u Rwanda.

Aba uko ari batatu bakekwa gukora no gukwirakwiza inyandiko mpimbano
Zimwe muri kashe bacuraga z'ibigo bya leta n'ibyigenga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .