Barwaye mu mutwe kubera iyicarubozo rya CMI-Ubuzima busharira Abanyarwanda banyuzemo muri Uganda

Yanditswe na Cyprien Niyomwungeri
Kuya 11 Mutarama 2020 saa 10:18
Yasuwe :
0 0

Muri iki cyumweru nibwo abanyarwanda icyenda bamwe muri bo bari bamaze imyaka itatu bafungiwe muri Uganda, bashyikirijwe u Rwanda ku mupaka wa Gatuna nyuma yo kurekurwa n’Urukiko rwa Gisirikare rwa Makindye, kuwa Kabiri.

Abarekuwe ni René Rutagungira, Herman Nzeyimana, Nelson Mugabo, Etienne Nsanzabahizi, Emmanuel Rwamucyo, Augustin Rutayisire, Adrien Munyagabe, Gilbert Urayeneza na Claude Iyakaremye.

Aba banyarwanda bavuga ko banyuze mu nzira y’umusaraba kuva bagifatwa, aho by’umwihariko bakorewe iyicarubozo ry’inkazi, baratotezwa, barakubitwa n’ibindi byatumye hari bagenzi babo bari bafunganywe bakurijemo no kurwara mu mutwe.

IGIHE yasuye aba bagabo bari mu bitaro bya gisirikare i Kanombe, aho barimo gukurikiranwa no kuvurwa kubera ibikorwa bya kinyamaswa bakorewe.

Urayeneza Gilbert w’imyaka 28, washimutiwe n’abasirikare ba Uganda aho yakoreraga Mbarara, avuga ko bakuwe aho bari bacumbitse nyuma yo gusakwa bashinjwa ko bafite imbunda zikabura.

Avuga ko babwiwe ko bajyanywe mu kigo cya gisirikare, bagatwarwa bapfutse ibitambaro mu maso baboheye amaboko inyuma n’amaguru aboshye, bagezwa mu kigo bagapfukamishwa bakajugunywa mu gisa n’icyobo, bamanuka bagakubitwa, bazamuka bagakubitwa.

Ati “Baradufashe badutwara Mbarara ahitwa Makenke, babanje kudukuba hasi kuri kaburimbo. Baragufataga bakaguhirika ukagenda wihirika kandi uboshye amaguru n’amaboko n’amaso apfutse ari ko bagenda bagushota imigeri”.

“Iyo migeri yaje kutugiraho ingaruka, ubu nkanjye kujya nko mu bwiherero ngiye gusoba binsaba kubanza gufata igihe nk’iminota 30 kandi bikansaba kubanza kwicara. No ku bwiherero ni uko ni ugutumba ukagira ngo mu nda hari ikintu bari guhagamo umwuka, n’umutwe nkazungerera nkumva injereri ziri gutabaza mu mutwe”.

Urayeneza avuga ko mu mabohero y’Urwego rw’Ubutasi bwa gisirikare rwa Uganda (CMI) hari ahantu babanjije kubashyira, aho uwanyuragaho wese yabakubitaga inshyi, imigeri n’ibindi.

Mugenzi we Mugabo Nelson w’imyaka 41 wo mu Murenge wa Tabagwe mu Karere ka Nyagatare, yafatiwe muri Uganda muri Mutarama 2018, yari asanzwe akorera ubucuruzi muri Uganda no kurengaho akavayo ibicuruzwa akabijyana mu Rwanda gutyo gutyo.

Avuga ko agifatwa yajyanywe ahantu agakubitwa ijeki y’imodoka mu mutwe no mu mugongo abazwa abayobozi b’u Rwanda ajya avugana nabo.

Ati “Baranyicaje bazana ijeki y’imodoka baranyunamisha bankubita ijeki mu mugongo nyinshi cyane bafata ikintu cy’icyenda bagihambira mu mutwe wanjye, babikoraga ngira ngo kugira ngo amaraso ataza kugaragara inyuma, bankubise ijeki hafi nk’iminota 30 mu mutwe mva ku murongo ubwenge buratakara nongeye kugarura ibitekerezo hashize iminsi irindwi”.

Nyuma y’uko Mugabo agaruye ubwenge yajyanywe kubazwa, yongera gukorerwa iyicarubozo kugira ngo abemerere ibyo bashakaga. Aha niho bamukubise ikintu atabashije kumenya kimutera ikimenyetso mu mugongo.

Ati “Mu kwa Kane banjyanye mu cyo bita ‘Beach’, banshyize ikiringiti ku mazuru no ku isura banyuhira amazi hafi isaha cyangwa se abiri, ni amazi aba afite imbaraga cyane ku buryo uyamira andi agaca mu mazuru no mu kanwa inda ikuzura bakakubyutsa bakagukanda inda ukaruka bakongera bakagusubizaho bashaka ko ibyo bashaka ko ubemerera ubibabwira”.

Izi nkoni zamugizeho ingaruka kuko mu Ukuboza 2018 yari umuntu waremaye, uterurwa mu maboko mu gihe ashatse kujya mu bwiherero. Yasabaga kuvurwa akabwirwa ibindi. Iri yicarubozo ryiyongeraho kwamburwa ibihumbi 10 by’amadolari n’amashilingi imitwaro 18, telefoni ebyiri, imyenda n’inkweto.

Hari abakorewe iyicarubozo barasara

Ni kenshi havuzwe iyicarubozo ryakorewe abanyarwanda muri gereza n’amabohero ya CMI, bamwe bagakurizamo gupfa, kumugara, indwara zidakira n’ibindi.

Mugabo arondora bamwe mu banyarwanda bakorewe iyicarubozo na CMI, bakarwara mu mutwe [gusara], kugeza ubwo bajyanywe mu bitaro byita ku barwaye mu mutwe. Hari kandi n’abarashwe bakajyanwa kuvuzwa bambaye amapingu kandi amaboko n’amaguru yajanjaguwe.

Ati “Hari abahungu b’abanyarwanda bakorewe iyicarubozo bakurizamo no gusara ku buryo baje kubakura aho twari turi ubu tukaba tutazi n’ahantu bari”.

Hari uwitwa Rukundo Emmanuel wo mu Karere ka Kirehe wakorewe iyicarubozo arakubitwa, aratotezwa aza kuvaniramo n’ubusazi. Muri Nyakanga 2019, baje kumujyana Butabika mu bitaro by’abafite ubumuga bwo mu mutwe bamutera igishinge, bamusubiza Mbuya hashize amezi yarabaye ‘Paralyse’ n’ibikanu birahengama kubera urwo rushinge bamuteye.

Hari uwitwa Karangwa Jackson, wo mu Karere ka Rubavu, wakubiswe aratotezwa nawe avaniramo gusara bamukura Mbuya bamujyana Kireka nyuma nawe ajyanwa Butabika. Yongeye kuboneka i Mbuya kuwa 30 Ukuboza 2019, yasohotse mu gikundi cyasohowe muri iryo bohero.

Hari kandi Mageza Emmanuel wo ku Gisozi, Uwitonze wo muri Ngoma, Serugendo wo muri Burera na Tumusifu Eric wafashwe agatotezwa akaza no kuraswa amasasu atanu ku maguru, amaboko, ikibuno.

Uyu musore bamujyanaga mu bitaro ari ku mapingu, akaryama ku makaro. Na we yasohotse mu gikundi cy’abasohotse kuwa 30 Ukuboza 2019.

Bakubitishijwe amashanyarazi bajya no ku musaraba

René Rutagungira wabanjirije abandi banyarwanda gushimutirwa muri Uganda, avuga ko akigezwa i Mbuya ku cyicaro cya CMI, muri Kanama 2017, nta kindi yakorewe uretse gukubitwa bamubaza igihe yaviriye mu gisirikare, icyo akora muri Uganda n’uburyo abaneka, akabicira abantu.

Rutagungira yarakubiswe, akorerwa iyicarubozo ririmo no gukubitishwa amashanyarazi, kumukanda intoki n’ibindi byiyongera ku kuba yari afunzwe wenyine mu cyumba cye, ku buryo aho bashakiraga bajyaga kumukubitirayo.

Ati “Muri CMI nagezeyo bamfungiye mu cyumba kidasohora urusaku ku buryo bazaga bakankubitirayo, bakazana ibintu by’ibyuma bagacomeka amashanyarazi bakayagukubitisha, bakakuzamura bakakujyana ku mazi. Hari ukuntu bakwicara mu gatuza uryamye hasi, amapingu inyuma, intoki ukaziryamira bakajya bagusuka amazi umwuka wahera bati vuga”.

Iyakaremye Claude w’imyaka 38, yamaze ukwezi aba muri ‘escalier’ muri CMI, i Mbuya. Ni nyuma yo gukubitwa aboshye kugeza ubwo umwuka uhagaze.

Ati “Barambwira ngo nimfate ku gikuta bitewe n’uko bari banziritse barayanzamuriye barayafata bose bankubita mu mbavu, barankubita birenze nkajya mpanuka ku gikuta nkikubita hasi bakongera babiri bakamfata bakazamura amaboko yanjye kuko ntari nkibasha gufata kuri icyo gikuta cyabo bavugaga nkongera nkikubita hasi kugeza ubwo nasambye umwuka unshiramo bazana amazi akonje bansukaho bazana inkoni bakubita aho amagufa ahurira hose”.

Iyakaremye avuga ko yagiye aho bita ku musaraba. Ati “Hari escalier zazamukaga haruguru noneho bashyizeho ibyuma, baba bafite amapingu y’amaguru bakagushyira ku mapingu y’amaboko, babyita ku musaraba, ahongaho buri wese uje niho abasha kugukubitira neza kuko bankubitaga inshyi kuko nageze igihe nkajya mva amaraso mu mazuru”.

Avuye ku musaraba, yajyanywe ku rugi rufunguka, bakajya bafata urwo rugi bakamuzirikaho amapingu, noneho baza gufungura agafungukana narwo barukinga akajyana narwo, agahora uhagaze ahongaho gutyo yananirwa akagwa aho.

Iri yicarubozo ryatumye arwara, ntakibasha kumva neza, yikanga ibintu buri kanya, ameze nk’uwarwaye ihahamuka kubera icyo kibazo. Avuga kandi ko hari ubwo bigera akumva igihanga cye kirarangaye akava amaraso mu mazuru.

Kimwe n’abandi, Iyakaremye yambuwe miliyoni 3.5 z’amashilingi yari agiye gukoresha mu bucuruzi.

Urayeneza avuga uko bakuruwe mu muhanda ubwo bafatwaga bashinjwa gutunga imbunda
Iyakaremye yakorewe iyicarubozo nyuma yo kwamburwa miliyoni 3.5 z'amashilingi
Mugabo arondora amazina y'abo azi bakorewe iyicarubozo bakarwara mu mutwe
Rutagungira avuga ko hari ubwo bakubitishwaga amashanyarazi
Aba banyarwanda bose barimo kwitabwaho mu bitaro bya gisirikare i Kanombe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza