00:00:00 IGIHE NETWORK KN KINYARWANDA EN ENGLISH FR FRANCAIS

Bari gusaba ko akupirwa amazi n’umuriro: Ubuzima bwa Amb Karega bwaba buri mu kaga?

Yanditswe na IGIHE
Kuya 20 June 2022 saa 09:38
Yasuwe :

Hashize iminsi abaturage bo muri Repubulika Iharanira Demokarasi ya Congo bari mu myigaragambyo yo kwamagana u Rwanda bashinja gushyigikira umutwe wa M23, ndetse bagasaba ko Ambasaderi Vincent Karega yirukanwa.

Kuva hatangira gututumba umwuka mubi hagati ya Leta y’u Rwanda n’iya Repubulika Iharanira Demokarasi ya Congo, abaturage b’iki gihugu ntibasiba kugaragaza imvugo zibiba urwango ku Banyarwanda by’umwihariko Ambasaderi Vincent Karega uhagarariye u Rwanda muri icyo gihugu.

Ibi bigaragarira mu mvugo z’abigaragambya baba bavuga ko Karega akwiriye kwirukanwa ndetse rimwe na rimwe baba bitwaje ibyapa biriho amafoto ye banditseho amagambo y’urwango atandukanye.

Ambasaderi Karega ubwe aherutse kugira icyo avuga kuri ibi bikorwa by’Abanye-Congo bimwibasira.

Mu kiganiro yagiranye na Ijwi ry’Amerika yavuze ko ibyo aba baturage bakora cyangwa basaba atari byo bizatanga ibisubizo by’ibibazo bafite, ahubwo bakwiye kwicara bakaganira n’abayobozi babo ku buryo bwo kubikemura.

Ati “Kuntandukanya n’u Rwanda biragoye, ni njye bashyikira, ni njye uri hafi ariko bituma nibaza nti ’ese ibibazo biri mu Burasirazuba, gukuraho ambasaderi cyangwa guca umubano n’u Rwanda cyangwa ndetse no kujya mu ntambara n’u Rwanda birahita bikuraho ADF?, Birahita bikuraho ibikorwa bya FDLR, bya za Mai Mai zitandukanye cyangwa se abantu bapfa muri Ituri, ni wo muti? ni cyo gisubizo?”

Mu ntangiriro z’uku kwezi kwa Kamena ubwo imyigaragambyo yari ikaze i Kinshasa, hatangiye kumvikana amakuru avuga ko Ambasaderi Karega yahise ahungishwa na Polisi ya RDC ndetse Ambasade y’u Rwanda ihabwa umutekano uhambaye, gusa aya makuru yaje kunyomozwa abari hafi ya Ambasaderi Karega bavuga ko ubwo iyi myigaragambyo yabaga yari mu rugo rwe kandi nta kibazo afite.

Nubwo bimeze gutyo amakuru yizewe IGIHE ifite ni uko ubu abakozi ba Ambasade y’u Rwanda i Kinshasa bakorera mu ngo zabo mu gihe hateguwe imyigaragambyo.

Bari gusaba ko akupirwa amazi n’umuriro

Ibibazo by’umubano mubi hagati y’u Rwanda na Repubulika Iharanira Demokarasi ya Congo byafashe indi ntera mu mpera z’icyumweru gishize ubwo umusirikare w’iki gihugu yinjiraga ku butaka bw’u Rwanda mu Karere ka Rubavu akarasa ku ba Polisi b’u Rwanda, mu kwirwanaho nabo bakamurasa ndetse bikamuviramo urupfu.

Ni insanganya yabaye nyuma y’igihe gito n’ubundi kuri uyu mupaka habereye imyigaragambyo y’Abanye-Congo bashakaga kwinjira mu Rwanda ariko bagakumirwa n’inzego z’umutekano.

Nyuma y’urupfu rw’uyu musirikare wa RDC, abaturage b’iki gihugu bagaragaye baherekeje umurambo we mu mbyino n’indirimbo bigaragaza ko yakoze igikorwa cy’ubutwari kuko yakoze mu jisho ry’u Rwanda, ‘igihugu cyabazengereje’.

Ibi bikorwa byose bikomeje guherekezwa n’amagambo y’urwango y’Abanye-Congo ku buryo umunyamakuru wa ‘BSC TV’ aherutse kuvuga ko Ambasaderi Karega akwiriye gukupirwa amazi n’umuriro akicwa n’inzara.

Uyu munyamakuru yavuze ko Minisiteri y’Ububanyi n’Amahanga ya RDC ikwiriye kwirukana Amb Karega ku butaka bwa Repubulika Iharanira Demokarasi ya Congo.

Yavuze ko abaturage bo muri iki gihugu bakwiye gukora imyigaragambyo ifatika nk’iyo abaturage bo mu bihugu by’abarabu nka Tunisia na Misiri bagiye bakora.

Ati “Umunsi tuzajya mu rugo rwa Ambasaderi w’u Rwanda turi miliyoni ebyiri z’Abanye-Congo, ndabizeza ko mu minsi ibiri ibintu bizaba byahindutse. Kinshasa ni umujyi utuwe n’abarenga miliyoni 18.”

Uyu mugabo yakomeje avuga ko muri iri tsinda ry’abigaragambya hagomba kuba harimo abazaba bitwaje ibikoresho byo gukata insinga zigeza umuriro mu rugo rwa Ambasaderi Karega, abandi bakitwaza ibikoresho byo gukupa amazi.

Ati “Mu minsi ibiri, lisansi ishyirwa muri moteri itanga amashanyarazi izaba yashize, ibiryo byo muri firigo bizaba byashize, ubundi bicwe n’inzara bahamagare mu Rwanda.”

Umuvugizi wa Wungirije wa Guverinoma y’u Rwanda, Alain Mukuralinda aherutse kuvuga ko Leta ya RDC ifite inshingano zo kurinda Abanyarwanda bari muri iki gihugu muri iki gihe bigaragara ko bashobora guhohoterwa.

Ati “Mu nzira za dipolomasi u Rwanda rusaba ko abayobozi ba RDC barengera inyungu n’umutekano w’Abanyarwanda nk’uko turengera ibyabo hano kandi ibyo bihora bisabwa.”

“Mu biganiro byose biba umutekano w’Abanyarwanda aho baba bari hose ushyirwa imbere kandi ikigaragara nubwo hari abahamagarira kwica Abanyarwanda turabona ko hari bamwe mu bayobozi ba RDC bavuga bati ibyo bintu ntabwo aribyo, turasaba ko bivugwa kenshi ndetse niba hari n’ubifatiwemo akaba yahanwa.”

Hagati y’u Rwanda na RDC hongeye gututumba umwuka mubi nyuma y’uko abarwanyi b’umutwe wa M23 bubuye intwaro bagatangira guhangana na FARDC, leta y’iki gihugu yo ikavuga ko baterwa inkunga n’u Rwanda.

Uyu mutwe uvuga ko wubuye imirwano kuko amasezerano wagiranye na Guverinoma ya RDC atigeze yubahirizwa.

Aya masezerano yagenaga ko abanyapolitiki b’umutwe wa M23 bahabwa imyanya, abasirikare bagashyirwa mu gisirikare. Ngo ayo masezerano agena ko hazakorwa batayo enye zihuriweho n’Ingabo za FARDC bakarwanya by’umwihariko umutwe wa ADF.

Abigaragambya muri RDC bari gusaba ko Amb Vincent Karega yirukanwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .