Banki ya Kigali yibutse abari abakozi bayo bazize Jenoside inafasha abarokotse batishoboye (Amafoto)

Yanditswe na Evariste Nsengimana
Kuya 13 Mata 2019 saa 09:58
Yasuwe :
0 0

BK Group PLC yibutse abari abakozi bayo bazize Jenoside yakorewe abatutsi mu 1994, inatera inkunga abarokotse batishoboye barimo abasaniwe inzu n’abahawe amashanyarazi akomoka ku mirasire y’izuba bo mu Karere ka Rulindo.

Mu gihe u Rwanda rwibuka ku nshuro ya 25 Jenoside yakorewe Abatutsi, ku wa 12 Mata 2019 BK Group PLC yifatanyije n’imiryango y’abarokotse jenoside batishoboye bo mu Mirenge ya Kinzuzi, Ntarabana na Burega yo mu Karere ka Rulindo.

Yahaye amashanyarazi akomoka ku mirasire y’izuba imiryango 100 yabaga mu kizima inasanira inzu iyindi 16 yabaga mu zishaje cyane, mu gikorwa cyatwaye asaga miliyoni 70Frw.

Umwe mu basaniwe inzu wo mu Murenge wa Burega, Umuhoza Beatrice, yabwiye IGIHE ko imvura yagwaga akabura aho akinga umusaya kubera ko inzu ye yari ishaje.

Ati “Inzu yanjye yari mbi cyane, imvura yaragwaga amazi akansanga mu nzu nkabura uko ndyama nkarara mpagaze. Ubu bamaze kuyinsanira ndabashimiye cyane.”

Umuyobozi wa BK Group PLC, Dr. Diane Karusisi, yavuze ko buri mwaka bashaka abacitse ku icumu batishoboye bakabafasha mu rwego rwo kuzamura imibereho yabo, no kwifatanya mu kwibuka abazize Jenoside yakorewe abatutsi.

Umuyobozi w’Akarere ka Rulindo, Kayiranga Emmanuel, yashimiye BK Group PLC ku gikorwa cyo kunganira abacitse ku icumu batishoboye bo muri aka karere, kabarurwamo abasaga ibihumbi 18 bazize Jenoside.

Nyuma yo gufasha abacitse ku icumu bo mu Karere ka Rulindo, abakozi ba BK Group PLC n’ibigo biyigize birimo Bank of Kigali Plc, BK TecHouse, BK General Insurance na BK Capital, bakomereje mu mugoroba wo Kwibuka abasaga miliyoni imwe bazize Jenoside yakorewe abatutsi mu 1994, barimo 15 bari abakozi b’iki kigo.

Ni umuhango wabereye ku cyicaro gikuru BK Group PLC waranzwe n’ubuhamya n’ibiganiro ku buryo Jenoside yateguwe ikanashyirwa mu bikorwa bigizwemo uruhare n’ubuyobozi bwimakaje amacakuburi n’urwango mu banyarwanda.

Umwe mu bakoreraga Banki ya Kigali mbere ya Jenoside yakorewe Abatutsi, Mukamugenza Virginie, yatanze ubuhamya bw’uko Abatutsi bakoreraga iyi banki bagiye batotezwa, bamwe bakirukanwa nta n’ikosa bakoze, mu gihe cy’ibyitso kakajya bafungwa.

Uwari uhagarariye imiryango y’abakoreraga BK bishwe muri Jenoside yakorewe Abatutsi, Ambroise Rugambwa, yashimye BK umwanya yagennye wo kwibuka abayikoreraga bishwe, by’umwihariko agaciro yabahaye ikabubakira ikimenyetso cy’urwibutso cyanditseho amazina yabo yose.

Ati “Twebwe byaradushimishije ku buryo butangaje. Twabasabye urwibutso, murushyizeho ruza rusumba n’izindi zose hafi aha.”

Uwari uhagarariye umuryango uharanira inyungu z’abacitse ku icumu, IBUKA, yashimiye Banki ya Kigali yateguye iki gikorwa, anagaruka ku ngorane igihugu gifite zijyanye n’imibiri y’abazize Jenoside itaraboneka ngo ishyingurwe mu cyubahiro.

Senateri Prof. Laurent Nkunsi yagaragaje ko amacakuburi n’ingengabitekerezo ya Jenoside byatumye Abatutsi barenga miliyoni bicwa, byabibwe mu banyarwanda kuva cyera.

Yavuze ko ubuyobozi bwateguye bukanashyira mu bikorwa Jenoside yakorewe Abatutsi bwasezeranyaga abaturage guteza imbere igihugu binyuze mu bumwe bw’abanyarwanda, bwarangiza bakabushakira mu gice kimwe.

Umuyobozi Mukuru wa BK Group PLC, Dr. Diane Karusisi, yashimiye abantu bose bifatanyije nabo mu kwibuka no gusubiza abazize Jenoside yakorewe Abatutsi icyubahiro bambuwe.

Yavuze ko Kwibuka ari umwanya wo kunamira no guha icyubahiro abazize Jenoside, guhumuriza abacitse ku icumu, kuzirikana ubutwari Inkotanyi zagaragaje zihagarika Jenoside zigahindura n’amateka y’igihugu, no guharanira kongera kubaka umuryango nyarwanda.

Ati “Kubaka igihugu cyacu ni ukumenya ko imvugo mbi yica, kumenya ko tutagomba kubiba urwango mu miryango yacu, mu bana bacu, aho turi hose ku kazi tugomba kuzirikana ubumwe bw’abanyarwanda.”

Banki ya Kigali isanzwe ifasha abacitse ku icumu rya Jenoside mu bikorwa bitandukanye bigamije kubafasha kwiremamo icyizere no kwiteza imbere.

Nk’umwaka ushize yoroje inka imiryango 15 y’abarokotse Jenoside batishoboye bo mu Karere ka Karongi, mu gihe mu wawubanjirije yoroje inka imiryango 10 mu Karere ka Bugesera.

Umuhango watangiriye mu karere ka Rulindo

Umuyobozi w'Akarere ka Rulindo Kayiranga Emmanuel ashyira indabo ku rwibutso ruri mu murenge wa Ntarabana
Abayobozi ba BK bashyira indabo ku Rwibutso rwa Jenoside mu Murenge wa Ntarabana
Uko inzu zari zimeze mbere yo gusanwa ku nkunga ya Banki ya Kigali
Izi nzu zarasanwe zihindura isura, imiryango ubu irishimye
Umuyobozi Mukuru wa BK Group Plc Dr. Diane Karusisi aramukanya n'umwe mu basaniwe inzu
Umwe mu basaniwe inzu wo mu murenge wa Burega, Umuhoza Beatrice n'umugabo we, bishimiye inkunga BK yabahaye

Kwibuka abari abakozi ba BK byabereye ku cyicaro gikuru cyayo

Banki ya Kigali yibutse abazize Jenoside bari abakozi bayo
Ubwo abafite ababo bazize Jenoside bakoreraga BK bashyiraga indabo ku rwibutso rwabo
Urwibutso rw'abari abakozi ba BK bazize Jenoside rwanditseho amazina yabo
Umuyobozi Mukuru wa BK Group Plc Dr. Diane Karusisi acana urumuri rw'icyizere
Abakozi ba BK bacanye urumuri rw'icyizere ku rwibutso rw'abari abakozi bayo bazize Jenoside yakorewe abatutsi
Urwibutso rw'abari abakozi ba Banki ya Kigali bazize Jenoside yakorewe abatutsi mu 1994, rwanditsweho amazina yabo
Umuyobozi Mukuru ushinzwe ibikorwa muri BK, Rumanyika Désire, ashyira indabo ku rwibutso rw'abari abakozi ba Banki ya Kigali bazize Jenoside
Umuyobozi w'Akarere ka Rulindo, Kayiranga Emmanuel, Umuyobozi Mukuru wa BK Dr Diane Karusisi n'Umuyobozi Uhagarariye Ingabo, mu muhango wo Kwibuka mu Murenge wa Ntarabana
Senateri Prof. Laurent Nkunsi yagaragaje ko amakuburi n'ingengabitekerezo ya jenoside byatumye abatutsi barenga miliyoni bicwa mu minsi 100 gusa
Uhereye iburyo: Senateri Laurent Nkusi na Dr. Diane Karusisi mu mugoroba wo kwibuka abakoreraga BK bazize Jenoside
Umwe mu bakoreraga BK mbere no mu gihe cya jenoside atanga ubuhamya
Umuyobozi Mukuru wa BK Group PLC, Dr. Diane Karusisi, yashimiye abantu bose bifatanyije nabo mu kwibuka no gusubiza abazize Jenoside yakorewe Abatutsi icyubahiro bambuwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza