Banki ya Kigali yatanze miliyoni 200 Frw zo kugura telefoni muri Connect Rwanda

Yanditswe na Iradukunda Serge
Kuya 24 Mutarama 2020 saa 09:33
Yasuwe :
0 0

Banki ya Kigali yashyikirije Sosiyete y’Itumanaho ya MTN Rwanda sheki ya miliyoni 200 Frw azifashishwa mu kugura telefoni zigezweho 2000 yemeye gutanga muri gahunda ya Connect Rwanda igamije kugeza smartphone ku Banyarwanda badafite ubushobozi bwo kuzigurira.

Iki gikorwa cyabereye ku Cyicaro cya Banki ya Kigali Plc giherereye mu Mujyi wa Kigali rwagati kuri uyu wa 24 Mutarama 2020.

Banki ya Kigali Plc yatanze miliyoni 200 Frw nk’uburyo bwo guhigura umuhigo yihaye mu mwaka ushize ubukangurambaga bwa Connect Rwanda bwatangiraga, ikemera ko izatanga smartphone 2000 zirimo 500 zizava mu bwitange bw’abakozi na 1500 zizatangwa n’ikigo muri rusange.

Umuyobozi wa Banki ya Kigali, Dr Karusisi Diane, yavuze kuba mu ntego za BK harimo iyo guhindura ubuzima bw’abantu aricyo cyatumye bashyigikira Connect Rwanda kuko iri muri uwo murongo.

Ati “Turi mu bucuruzi bugamije guhindura ubuzima bw’abantu, kandi tuzi ko umuntu wese ufite smartphone ubuzima bwe burahinduka kuko abona serivisi mu buryo bworoshye zirimo iza banki n’iz’Irembo zose azibona kuri telefoni. Agira n’amahirwe yo kugera ku bumenyi. Twabonye ko ari ibintu byangombwa bituma imibereho y’abantu ihinduka kandi twasanze ari igikorwa cyiza natwe dushaka gutera inkunga.”

Uyu muhango wari witabiriye n’abantu batandukanye barimo abakozi ba MTN Rwanda, aba Banki ya Kigali n’abayobozi b’Uruganda rwa Mara Phone.

Umuyobozi w’Ikigo cy’Igihugu gishinzwe Ikoranabuhanga mu Itumanaho n’Isakazabumenyi (RISA), Muhizi Innocent, yavuze ko atemeranya n’abavuga ko smartphone zitari mu by’ibanze Abanyarwanda bari bakeneye.

Yashimangiye ko Connect Rwanda itaje gukuraho ubundi bufasha abaturage babonaga.

Ati “Abanyarwanda hari benshi bagikeneye ibindi bikoresho, hari abakeneye amatungo, ibyo nabyo ntabwo bihagarara.”

Yavuze ko barebye ikizorohereza Abanyarwanda kugera kuri serivisi zitandukanye “ariko twarebye uburyo twakwihutisha serivisi z’Abanyarwanda kugira ngo zibagereho batavunitse. Ntibikwiye ko umuturage ava mu murima niba hari ibyangombwa akeneye ku murenge cyangwa se mituweli akeneye kwishyura.”

Kugeza uyu munsi mu bukangurambaga bwa Connect Rwanda hamaze kwiyemezwa smartphones zirenga ibihumbi 40, muri zo izigera kuri 30% zikaba zaramaze no gushyikirizwa MTN Rwanda.

Umuyobozi ushinzwe Iyamamazabikorwa muri MTN Rwanda, Richard Acheampong, yashimiye BK ku musanzu yatanze muri gahunda ya Connect Rwanda anibutsa ko smartphone iri mu by’ibanze umuntu akeneye.

Ati “Smartphone uyu munsi ntabwo ari umurimbo ahubwo iyo wumvise abantu bo mu bigo by’ikoranabuhanga bavuga ko iri kuba uburenganzira bw’ibanze ku ku kiremwamuntu.”

Muri telefoni ibihumbi 40 zimaze kwiyemezwa n’abantu batandukanye izigera ku bihumbi 20 ni izikorerwa mu Rwanda n’uruganda rwa Mara Phone.

Umuyobozi wa Mara Phone mu Rwanda, Eddy Sebera, yavuze ko uruganda rufite ubushobozi bwo gutanga telefoni no gukomeza isoko ry’abazikeneye.

Ku wa 20 Ukuboza 2019 nibwo MTN Rwanda yatangije ubukangurambaga bwa Connect Rwanda Challenge, maze ibigo n’abantu ku giti cyabo batangira kwiyemeza umubare wa telefoni zigezweho bazatanga zigahabwa abadafite ubushobozi bwo kuzigurira hirya no hino mu gihugu.

MTN Rwanda iteganya ko abantu bose bazahabwa izi telefone muri ubu bukangurambaga bazahabwa na Sim Card iriho na 1GB ya Internet mu gihe cy’amezi atatu ya mbere, mu kugabanya imbogamizi ku bantu bazitirwa no kubura internet.

Biteganyijwe ko porogaramu 12 zizabanza gushyirwa muri izi telefoni zizatangwa muri #ConnectChallenge, zizaba ziri mu ndimi eshatu ari zo Ikinyarwanda, Icyongereza n’Igifaransa, bisobanuye ko abaturage bazihitiramo ururimi bakoresha.

Izo porogaramu zirimo Irembo, Serivisi za banki, iz’ubuzima, uburezi, kwishyura ifumbire bakoresheje Smart Nkunganire, amakuru ajyanye n’iteganyagihe n’ibindi.

Umuyobozi ushinzwe Iyamamazabikorwa muri MTN Rwanda, Richard Acheampong, yashimye umusanzu wa BK muri gahunda ya Connect Rwanda
Umuyobozi wa BK Plc, Dr Karusisi Diane, yavuze ko bahisemo gushyigikira Connect Rwanda kuko izahindura ubuzima bw'Abanyarwanda
Ni umuhango witabiriwe n'abayobozi mu bigo bitandukanye
Umuyobozi wa Banki ya Kigali, Dr Karusisi Diane n'Umuyobozi ushinzwe ubucuruzi muri MTN Rwanda, Kagame Chantal bareba uko igikorwa kiri kugenda
Umuyobozi wa Mara Phone mu Rwanda, Eddy Sebera, yavuze ko uru ruganda rufite ubushobozi bwo kuzatanga umubare wose uzakenerwa muri Connect Rwanda
Nshuti Thierry ushinzwe Imenyekanishabikorwa muri Banki ya Kigali (ibumoso) aganira n'umukozi wa MTN witabiriye iki gikorwa
Uhereye ibumoso: Umuyobozi wa Mara Phone mu Rwanda, Eddy Sebera; uwa BK Plc, Dr Diane Karusisi na Muhizi Innocent uyobora Ikigo cy’Igihugu gishinzwe Ikoranabuhanga mu Itumanaho n’Isakazabumenyi (RISA)
Banki ya Kigali yatanze miliyoni 200 Frw zo kugura telefoni muri Connect Rwanda

Amafoto: Munyarugerero Gift


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .