00:00:00 IGIHE NETWORK KN KINYARWANDA EN ENGLISH FR FRANCAIS

Banki ya Kigali yahaye inka Musenyeri Nzakamwita na Musenyeri Musengamana waragijwe Diyosezi ya Byumba (Amafoto)

Yanditswe na Akayezu Jean de Dieu
Kuya 16 May 2022 saa 10:20
Yasuwe :

Banki ya Kigali yahaye impano y’inka Umwepiskopi mushya wa Diyosezi ya Byumba, Musenyeri Musengamana Papias na Musenyeri Nzakamwita Servelien wari umaze imyaka 26 muri izo nshingano wagiye mu kiruhuko cy’izabukuru.

Ni igikorwa cyabereye mu muhango wo kwimika Musenyeri Musengamana Papias ku wa Gatandatu tariki 13 Gicurasi 2022, i Gicumbi ahari ahubatse hanakorera Diyosezi ya Byumba.

Umuyobozi ushinzwe Ubucuruzi muri Banki ya Kigali, David Bizura, yavuze ko inka ari impano y’icyubahiro kandi ihabwa uwabaniye neza abandi, bityo bayihaye Musenyeri Nzakamwita ku bw’uko yabaye inshuti y’akadasohoka y’iyi banki.

Ati “Mu muco wa Kinyarwanda uko tubikora, Banki ya Kigali nka Banki Nyarwanda, tuziko impano y’icyubahiro kandi igaragaza ishimwe mu bantu mwabanye neza ari inka.”

“Ubwo rero twageneye Musenyeri Nzakamwita usoje ikivu, inka y’icyubahiro ku bufatanye bwe yagiranye na BK, turongera tugenera Musenyeri Papias uje mu kazi, inka kugira ngo akomeze kusa ikivu.”

Ubuyobozi bwa Banki ya Kigali bwagaragaje ko hashize igihe kirekire, Diyosezi ya Byumba ari umufatanyabikorwa w’iyi banki, ari nayo mpamvu buba bugomba kwifatanya nayo muri ibi birori by’agatangaza no kuzirikana uwo mubano n’ubufatanye buri hagati y’impande zombi.

Umuhango Musenyeri Musengamana yaherewemo inkoni yo kuba Umushumba Mukuru wa Diyosezi ya Byumba wayobowe na Arkiyepisikopi wa Kigali akaba n’Umuyobozi wa Diyosezi ya Kibungo, Antoine Cardinal Kambanda.

Ni umuhango wari witabiriwe na Minisitiri w’Intebe, Dr Ngirente Edouard wari uhagarariye Umukuru w’Igihugu.

Ni ibirori binogeye ijisho byitabiriwe n’abayobozi muri Guverinoma y’u Rwanda barimo Minisitiri w’Ubutegetsi bw’Igihugu, Gatabazi Jean Marie Vianney; Minisitiri w’Uburezi, Dr Uwamariya Valentine; Minisitiri w’Umutekano mu Gihugu, Gasana Alfred na Minisitiri wa Siporo, Munyagaju Aurore Mimosa.

Hari kandi abandi bayobozi mu nzego za Leta barimo Umuyobozi Mukuru w’Urwego rw’Imiyoborere, Dr Usta Kayitesi, ubuyobozi bw’Intara y’Amajyaruguru, inzego z’Ingabo na Polisi n’abandi.

Minisitiri w’Intebe, Dr Ngirente Edouard yavuze inshingano nshya Musenyeri Musengamana yahawe na Papa Francis ari ikimenyetso cy’ubushobozi yamubonyemo bityo bikaba bikwiriye kumwongerera imbaraga.

Byari ibyishimo kuri Musenyeri Nzakamwita na Musenyeri Musengamana ubwo bashyikirizwaga impano y'inka bahawe na Banki ya Kigali
Umuyobozi ushinzwe Ubucuruzi muri Banki ya Kigali, David Bizura, yavuze ko imikoranire myiza imaze igihe kirekire hagati ya Diyosezi ya Byumba n'iyi Banki, ari iyo kwishimira
Umuyobozi ushinzwe Ubucuruzi muri Banki ya Kigali, David Bizura yari yahagarariye Umuyobozi Mukuru w'iyi banki mu birori byo kwimika Musenyeri wa Diyosezi ya Byumba, Musengamana Papias
Musenyeri Musengamana Papias yemeye kwakira inshingano yahawe n'Umushumba wa Kiliziya Gatolika ku Isi, Papa Francis wamugize Umwepiskopi wa Diyosezi ya Byumba
Arkiyepisikopi wa Kigali akaba n’Umuyobozi wa Diyosezi ya Kibungo, Antoine Cardinal Kambanda, yaramburiye ibiganza kuri Musenyeri Musengamana Papias mbere yo kumuha Inkoni y'Ubushumba
Minisitiri w'Ubutegetsi bw'Igihugu, Gatabazi Jean Marie Vianney, usanzwe ari Umukiristu wa Diyosezi Gatolika ya Byumba yashimiye Imana yabahaye Umushumba mwiza, Musenyeri Musengamana Papias
Minisitiri w'Intebe, Dr Ngirente Edouard yitabiriye ibirori byo kwimika Umwepiskopi wa Diyosezi ya Byumba, Musenyeri Musengamana Papias

Amafoto: Irakiza Yuhi Augustin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .