Banki y’Isi yizeye ko ubukungu bw’u Rwanda buzazamuka ku gipimo cya 7.2% mu 2018

Yanditswe na Mukaneza M.Ange
Kuya 12 Ukuboza 2018 saa 02:44
Yasuwe :
0 0

Banki y’Isi yagaragaje ko ikurikije uko ubukungu bw’u Rwanda bwari bwifashe mu bihembwe bibiri bya mbere, hari icyizere ko mu 2018 buzazamuka ku gipimo cya 7.2%.

Ibi byagaragajwe binyuze muri raporo ya 13 ku birebana n’uko ubukungu buhagaze (Rwanda Economic Update), yashyizwe hanze kuri uyu wa 12 Ukuboza 2018.

Umuyobozi ushinzwe ubukungu mu ishami rya Banki y’Isi mu Rwanda, Aghassi Mkrtchyan, yagaragaje ko uku kuzamuka k’ubukungu kuzagirwamo uruhare n’ubuhinzi buhagaze neza, aho mu mezi atandatu ya mbere ya 2018 bwiyongereye ku kigero cya 7.6%, kwiyongera kw’ibyoherezwa mu mahanga ndetse n’imishinga minini y’ubwubatsi irimo Ikibuga Mpuzamahanga cy’indege cya Bugesera.

Ati “Ubukungu bwitezweho kuzamuka ku gipimo kiri hagati ya 7-8% mu gice gisigaye, kugera ku izamuka ry’ubukungu mu gihe kirambye bizasaba ishoramari rinini mu bantu, kandi abikorera bakarushaho gukora cyane.”

Iyi raporo ariko yibanze ku birebana n’iterambere ry’uburezi aho yari yahawe insanganyamatsiko igira iti “Schooling for Learning: Strengthening Resilience of Education in Rwanda.”

Banki y’Isi yagaragaje ko nubwo kuva mu myaka 25 ishize u Rwanda rwateye intambwe mu birebana n’uburezi, aho umubare w’abitabira kujya mu mashuri abanza uri hejuru ya 100%, 38% gusa aribo babasha gusoza amasomo y’uburezi bw’ibanze bw’imyaka icyenda.

Umuhanga mu birebana n’uburezi muri Banki y’Isi, Ruth Karimi Charo yavuze ko iyo witegereje ubona umusaruro mu burezi mu Rwanda uri hasi, ibi bikaba bigirwamo uruhare n’ibintu byinshi birimo no kuba abana batangira kwiga mu Cyongereza mu wa kane w’amashuri abanza, kandi nyamara abarimu babigisha nabo batakizi neza.

Ati “Niba rero abarimu bagiye kwigisha mu rurimi nabo batazi neza bizagira ingaruka ku mwana. Inama twatanga ni uko Icyongereza cyakwigishwa nk’isomo guhera mu wa mbere, noneho kwigisha mu Cyongereza bigatangirira mu wa gatanu cyangwa uwa gatandatu bitewe n’uko abarimu batangiye kukimenya.”

Umuyobozi wungirije wa Kaminuza y’u Rwanda ushinzwe Igenamigambi n’Imiyoborere, Dr Musafiri Papias Malimba, yavuze ko byinshi mu byavuzwe muri iyi raporo ari ibintu bisanzwe bigaragazwa nk’ibibazo mu burezi, by’umwihariko ibirebana n’Icyongereza biri gushakirwa umuti bahereye ku gufasha abarimu kuzamura ubumenyi bwabo muri uru rurimi.

Umuyobozi wa Banki y’Isi mu Rwanda, Yasser El-Gammal, yagaragaje ko uburezi ari urwego rudashobora gutezwa imbere na Minisiteri y’Uburezi gusa kuko ibyemezo birebana nabwo bigira ingaruka ku nzego zose, ashimangira ko niba igihugu cyifuza kuba mu bifite ubukungu buciriritse mu 2035, uburezi bukwiye gushorwamo amafaranga menshi.

Umuyobozi wa Banki y’Isi mu Rwanda, Yasser El-Gammal, avuga ko igihugu gikwiye gushora amafaranga menshi mu burezi
Dr Musafiri yavuze ko ikibazo cy'Icyongereza cyatangiye gushakirwa umuti binyuze mu kongerera abarimu ubumenyi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza