00:00:00 IGIHE NETWORK KN KINYARWANDA EN ENGLISH FR FRANCAIS

Bank of Africa yasabanye n’abakiliya bayo, ibashishikariza kwitabira ikoranabuhanga

Yanditswe na Claude Bazatsinda
Kuya 15 May 2022 saa 07:37
Yasuwe :

Mu gikorwa cyo gusura no gusangira n’abakiliya bayo bo mu Karere ka Musanze, Bank of Africa, yasabye abakorana na yo kurushaho kwitabira gukoresha ikoranabuhanga rya Visa Cards, Internet Banking kuko bizabafasha kwihutisha serivisi.

Muri iki gikorwa ngarukamwaka, Bank of Africa, iba igamije kwegera abakiliya ikabagezaho ibitekerezo n’ibyifuzo byabo no kurushaho kubasobanurira zimwe muri serivisi baba babafitiye.

Abakiliya ba Bank of Africa bashishikarijwe kurushaho kwitabira gukoresha serivisi z’ikoranabuhanga kuko aribwo buryo bunoze bwo kwihutisha serivisi.

Bamwe mu bakiliya ba Bank of Africa bashimye imikoranire myiza bafitanye na yo irimo koroherezwa guhabwa inguzanyo no kuzuza ibisabwa ngo bayihabwe.

Havugineza Modeste ni umwe muri bo, usanzwe ari umushoramari unakora mu kigo cy’ubwishingizi, yagize ati "Noroherejwe na Bank of Africa impa inguzanyo byoroshye kuko mpembwa bigendeye kuri komisiyo mu gihe ahandi ho wasangaga bigoranye. Ndabashimira cyane kuko usibye n’ibyo na serivisi zabo zirihuta cyane bikatunezeza."

Kawaya Jacques na we yagize ati "Njye nishimira imikorere ya Bank of Africa kuko iratworohereza nkatwe dufite imiryango mu mahanga, usanga kuboherereza amafaranga byihuta bigatuma na bo babaho neza kuko naho iyi banki uyisangayo, bazadufashe bongere aba-agents n’ibyuma byo kubikurizaho henshi hashoboka."

Nyirabagenzi Olive na we usanzwe akorana na Bank of Africa yavuze ko yayikundiye umwihariko ifite wo kwita ku bakiliya.

Ati "Nakoranye na banki nyinshi ariko iyi nabonye ifite umwihariko wo kwita ku bakiliya. Turabashima cyane ndetse n’icyifuzo twabahaye cyo kongera aba-agents bajya badufasha nkatwe tw’abacuruzi mu gihe tuvuye mu kazi bwije banki yafunze nacyo twumvise bagifite mu ntego kandi kigiye gukorwa. Njye nishimira cyane iyi banki."

Umuyobozi Mukuru wa Bank of Africa, Abderrahmane Belbashir, yashimye akakiliya bakorana, abizeza imikoranire myiza.

Yabasabye kurushaho gukoresha ikoranabuhanga kuko ari bwo buryo bunoze bwo kwihutisha serivisi.

Yagize ati "Muri iki gihe Isi iri mu kinyejana cy’umuvuduko, bisaba abantu guhindura uburyo bw’imikorere bagakoresha ikoranabuhanga. Turarifite ririmo gukoresha amakarita mu kubitsa no kubikuza, gukoresha internet bikakorohera haba kuri telefoni kuko bitagusaba urugendo n’umwanya ujya gutonda umurongo kandi ukabikorera aho uri igihe cyose ubikenereye. Ni cyo dushishikariza abakiliya bacu"

"Abakiliya bacu dukorana neza cyane, baratwumva, tukabumva, tugahana ibitekerezo. Ni byo bituma turushaho kugira imikorere n’imikoranire myiza kandi tuzakomeza muri uwo mujyo, nibatugane n’abandi baze dukorane kandi tuzabafasha gutera imbere."

Umuyobozi w’Akarere ka Musanze, Ramuli Janvier, yashimye uruhare rwa Bank of Africa mu iterambere ry’igihugu, asaba abaturage kurushaho kubyaza umusaruro ayo mahirwe bakagana amabanki bagakorana neza bakiteza imbere ubwabo n’igihugu muri rusange.

Ati “Turashimira Bank of Africa uruhare yagize mu guteza imbere abaturage bacu n’uruhare rwayo mu iterambere ry’igihugu. Icyo dusaba abaturage ni ugukomeza kugana banki bakaguza, bagakora imishinga neza kandi yunguka bakanaba inyangamugayo bagakomeza gukora biteza imbere kuko amabanki arahari kandi ahora yiteguye kubafasha."

Bank of Africa ni Banki Mpuzamahanga y’ubucuruzi ikorera mu bihugu 20 byo ku Mugabane wa Afurika aho ikorera mu bihugu byose by’Umuryango wa Afurika y’Iburasirazuba, EAC, ndetse no mu Bufaransa mu Burayi no mu Bushinwa na Dubai muri Aziya.

Iyi banki kandi yorohereza abayigana kubona inguzanyo yo kubaka inzu ku nyungu iri hagati ya 11 na 15% ishobora kugera kuri miliyoni 50 Frw zishyurwa mu gihe cy’imyaka 20 ndetse n’izindi nguzanyo zifasha abantu mu bucuruzi, ishoramari, kugura imodoka, inguzanyo ku mushahara n’izindi.

Bank of Africa ikorera mu Rwanda kuva mu 2015 nyuma yo kuva ku Agaseke katangiye mu 2003 ikaba ifite amashami 14 hirya no hino mu gihugu. Ifite intego yo kongera aba-agents bayo no gushishikariza abakiliya bayigana gukoresha ikoranabuhanga mu kugera kuri serivisi z’imari.

Habayeho umwanya wo kungurana ibitekerezo hagati y'ubuyobozi bwa Bank of Africa n'abakiliya bayo
Umuyobozi Mukuru wa Bank of Africa, Abderrahmane Belbachir, yashimye akakiliya b’iyi banki, abizeza imikoranire myiza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .