00:00:00 IGIHE NETWORK KN KINYARWANDA EN ENGLISH FR FRANCAIS

Bamwe bamaze kuzinukwa: Amakorosi akomeje kugaragara muri serivisi z’ubutaka

Yanditswe na Prudence Kwizera
Kuya 9 Ukuboza 2022 saa 08:52
Yasuwe :

Hashize igihe kinini abaturage binubira uburyo serivisi z’ubutaka zitangwa hirya no hino mu turere tw’igihugu ku buryo hamwe bamwe badatinya kuvuga ko bazinutswe kongera kujya kuzisaba.

Urugero ni nk’aho umuntu ashobora kujya gushaka icyangombwa cy’ubutaka akanyura ku murenge akagitegereza umwaka wose ugashira atarakibona kuko bisaba ko kizaturuka ku rwego rw’Intara ku mubitsi w’impapuro mpamo z’ubutaka.

Umwe mu baturage wo mu Karere ka Huye yabwiye IGIHE ko amaze umwaka n’amezi ane ashaka icyangombwa cy’ubutaka ariko kugeza ubu akaba atarakibona.

Yagize ati “Narapimishije mbijyana ku murenge ariko hashize umwaka n’amezi ane; ejobundi nagiyeyo barambwira ngo noneho ngomba kongera gushaka umuntu upima ubutaka bwa kabiri. Nahisemo kubyihorera kuko nabonye bashaka ko mbaha ruswa.”

Uyu muturage yavuze ko amaze kurambirwa kwiruka ku cyangombwa cy’ubutaka kandi yahisemo kubireka burundu kuko ngo bimwicira umubyizi agatakaza n’amafaranga y’itike.

Kuri uyu wa 8 Ukuboza 2022 mu Karere ka Huye habayeho gahunda yo kumurika ishusho y’ibyavuye mu bushakashatsi ku bijyanye n’imiyoborere n’imitangire ya serivise mu 2022 bigendeye k’uko abaturage babibona.

Abagira aho bahurira n’imiyoborere n’imitangire ya serivise bagaragarijwe ko serivise z’ubutaka zikirimo ibibazo basabwa kwikosora ariko nabo bagaragaza ko uburyo bukoreshwa aribwo bufite ikibazo.

Ibi biganiro byari byitabiriwe n’Umuyobozi w’Ishami ry’Ubushakashatsi mu Rwego Rushinzwe Imiyoborere, RGB, Dr Félicien Usengumukiza.

Umukozi uyobora by’agateganyo ishami rishinzwe ubutaka, imiturire n’ibikorwa remezo mu Karere ka Huye, Muhongayire Jeacqueline, yavuze ko umuntu ukeneye serivise y’ubutaka kugira ngo ayibone bifata inzira ndende.

Yatanze urugero aho umuntu ushaka icyangombwa cy’ubutaka agomba kubanza kwishakira umuntu ubumupimira yarangiza akajyana dosiye ku murenge, agategereza ko bazayimujyanira ku karere, nako kakamusabira icyangombwa ku mubitsi w’impapuro mpamo z’ubutaka ku rwego rw’intara.

Yavuze ko iyo nzira ndende binyuramo ituma umuturage ahabwa serivise itanoze.

Yagaragaje ko haba ubwo dosiye igeze ku ntara bagasanga hari nka kimwe mu bisabwa kibura bigasubizwa hasi ku murenge, bikaba byatuma umuturage asiragira kenshi.

Ati “Ni ukuvuga ngo serivise ubwayo irimo uruherekane rw’abantu benshi bayitanga ku buryo kubona igisubizo vuba uha umuturage bigoye.”

Yavuze ko biramutse bikunze umuturage akaba yajya ahabwa serivise z’ubutaka ku rwego rumwe byamworohera kandi serivise ikagenda neza.

Ati “Ni ukuvuga ngo iyo serivise idakorwaho n’umuntu umwe ngo ahite atanga igisubizo habonekamo ikibazo.”

Kuri ubu ibipimo bigaragaza ko mu Karere ka Huye abishimira serivise z’ubutaka bagabanutseho 8.7% bava kuri 68.4% bagera kuri 59.7%.

Muri aka karere haherutse gushyirwaho icyumweru cyahariwe serivise z’ubutaka ariko hari bamwe baje kuzisaba bataha binuba ko kirangiye batazihawe abandi bakavuga ko bari gusubizwa ku murenge aho baziburiye mbere.

Muhongayire avuga ko uburyo bagiye kwifashisha ari ugusobanurira abaturage inzira yose serivise z’ubutaka zinyuramo kugira ngo nibajya babone bitinze bajye bihangana bategereze.

Ikindi ni ukubasobanurira ibisabwa hakiri kare kuri buri serivise kugira ngo igihe bagiye kuyisaba bajye babanza kubishaka.

Ati “Tugiye gukora ubukanguramba ku baturage ku buryo amakuru bayagira mbere aho kuza kuyabaza ku biro byacu.”

Umuyobozi w’Akarere ka Huye, Sebutege Ange, yavuze ko batangiye gushyiraho uburyo bwihariye bwo kwegereza abaturage serivise z’ubutaka ku tugari kugira ngo barebe ko babaha serivise yihuse.

Ubwo buryo bwiswe “umurenge mu kagari” bwitezweho gusobanurira abaturage imiterere serivise z’ubutaka bitabaye ngombwa ko ari bo bajya kuzibaza.

Ati “Ni ukwiyemeza uburyo habaho umurenge mu kagari, serivise zikajya zegerezwa abaturage mu gihe runaka. Hari imirenge yabitangiye tubona bitanga umusaruro, noneho turagira ngo tubigeze no mu yindi mirenge.”

Umuyobozi w’Ishami ry’Ubushakashatsi muri RGB, Dr Félicien Usengumukiza yavuze ko ibibazo biri muri serivise z’ubutaka bitagaragaraga mu Karere ka Huye gusa ahubwo biri mu turere twose.

Yavuze ko imiterere ya serivise z’ubutaka ishobora kuba ari yo ifite ikibazo ubwayo.

Ati “Ari nacyo twagiye dusaba inzego cyangwa abashinzwe gutanga serivise muri ibyo byiciro kureba icyo bakora ngo bihinduke kubera y’uko twayobewe niba ari imiterere y’imitangire y’iyo serivise kuko usanga bihuriweho n’uturere twose. Ibibazo by’ubutaka byabindi muzi byo kwandikisha ubutaka, guhererekanya ubutaka, gutaga icyangombwa cyo kubaka no gusana, igishushanyo mbonera n’ibindi.”

Abakora muri serivise z’ubutaka basabwa gukomeza gukora uko bashoboye bagaha serivise ababagana mu gihe inzego zibishinwe ziri gusesengura ikibazo zigihereye mu mizi.

Gusa haracyari n’ikibazo cy’ibikoresho bidahagije ndetse n’abakozi batanga izo serivise bakiri bake kuko baboneka ku biro kabiri mu cyumweru kubera inshingano nyinshi bigatuma abaturage bababura bakabyinubira.

Ibindi bibazo bivugwa muri serivise z’ubutaka birimo ruswa yakwa abaturage ndetse n’ikimenyane.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .