00:00:00 IGIHE NETWORK KN KINYARWANDA EN ENGLISH FR FRANCAIS

Bamporiki yagaragaje ko u Rwanda rwishwe n’urubyiruko rwayobowe nabi

Yanditswe na Akayezu Jean de Dieu
Kuya 30 April 2022 saa 09:35
Yasuwe :

Umunyamabanga wa Leta muri Minisiteri y’Urubyiruko n’Umuco, Bamporiki Edouard, yavuze ko abakiri bato by’umwihariko abari muri za kaminuza bagomba kwiga ku gihugu cyabo, kandi ibyo biga bigahuzwa n’icyo bizamarira u Rwanda.

Ubwo yagezaga ikiganiro ku banyeshuri, abarimu, abayobozi n’abashinze Kaminuza yigenga ya Kigali, ULK, Bamporiki yavuze ko gushyira imbaraga mu rubyiruko bigamije kugira ngo ibyabaye mu gihugu ntibizongere kubaho ukundi.

Hari mu muhango wo kwibuka ku nshuro ya 28 Jenoside yakorewe Abatutsi mu 1994.

Yagize ati "Kaminuza ubundi irarera, kandi igihugu cyacu gifite ibyiringiro n’amizero ku bana bato b’Abanyarwanda, iki gihugu kizubakwa na bo. Rero ubumenyi babonera ku ishuri bugomba kujyana no kwiga igihugu cyabo, kumenya ingorane z’igihugu cyabo. Muri iyi minsi 100 yo Kwibuka abazize Jenoside yakorewe Abatutsi, ni umwanya mwiza wo kuganira ku mateka n’intekerezo z’u Rwanda."

Yakomeje agira ati "Ni ukugira ngo bamenye ko iyo igihugu cyababaye, cyatakaje amaboko, abato bahari baba bagomba gukoresha imbaraga nyinshi kugira ngo aho igihugu cyadindiye n’icyatumye kidindira bashyiremo imbaraga cyihute mu iterambere, kandi birinde icyatuma cyongera kudindira kubera ko iki gihugu cyishwe n’urubyiruko rwayobowe nabi."

Minisitiri Bamporiki yavuze kandi ko gushyira imbaraga mu rubyiruko ari ukugira ngo rwigishwe kandi rubashe kuzahererekanya intekerezo ivuye ku Nkotanyi n’Umukuru w’u Rwanda.

Ati "Gushyira imbaraga mu rubyiruko ni ukuvuga ngo ingorane zabaye muri iki gihugu, Jenoside yakorewe Abatutsi yabaye muri iki gihugu, kubura icyerekezo byabaye muri iki gihugu, ntibizongere kubaho ukundi."

Yakomeje agira ati "Buriya iyo tuvuze ngo ’ntibizongere’ twumva Jenoside, nibyo, ariko imiyoborere mibi ntabwo ikwiriye kongera kubaho muri iki gihugu, kuyobya Abanyarwanda no kubaha icyerekezo kibi ntibizongere kubaho muri iki gihugu."

Prof Rwigamba Balinda washinze ULK akaba ari na Perezida wayo, yavuze ko ingengabitekerezo mbi ariyo yagejeje kuri Jenoside yakorewe Abatutsi.

Ati "Ubu natwe tugomba kugira abantu bafite ingengabitekerezo nziza yo kubaka igihugu, yo kubaka abantu, kwiyubaka no guteza imbere umuryango wacu. Ni inshingano yacu kugira ngo dufate iya mbere tugendere hamwe, dushyigikire icyerekezo cya Perezida Kagame cy’ubumwe n’ubwiyunge."

Yakomeje agira ati "Imbaraga z’urubyiruko nizo zashenye igihugu, izo mbaraga rero ni zo twe dushyira hamwe ngo zubake igihugu cyacu, bumve amateka mabi twaciyemo bo bajye mu mateka meza yo kubaka igihugu."

Umuhango wo kwibuka ku nshuro ya 28 Jenoside yakorewe Abatutsi muri Kaminuza ya ULK, witabiriwe n’abanyeshuri n’abakozi b’iyi Kaminuza, abahagarariye inzego zitandukanye zirimo ingabo na Polisi, AERG n’abavugabutumwa.

Ni umuhango wabimburiwe no gusura Urwibutso rwa Jenoside rwa Kigali ruri ku Gisozi, aho abitabiriye basobanuriwe amateka mabi yaranze u Rwanda akaza kugeza kuri Jenoside yakorewe Abatutsi mu 1994.

Abanyeshuri n'abakozi ba ULK basuye Urwibutso rwa Jenoside rwa Kigali
Uyu muhango wabaye kuri uyu wa Gatanu, ku Gisozi
Abakozi n'abanyeshuri ba ULK baganirijwe ku mateka y'igihugu n'uburyo akwiye guhinduka
Abanyeshuri n'abakozi ba ULK bahuriye muri stade y'iyi kaminuza
Abanyeshuri ba Glory Secondary School yavutse kuri ULK nabo bifatanyije na bakuru babo mu kwibuka abazize Jenoside yakorewe Abatutsi
Abanyeshuri ba ULK bahawe umukoro wo kurwanya ingengabitekerezo ya Jenoside
Bamporiki yatanze impanuro zo guharanira kubaka ubunyarwanda
Hafashwe umunota wo kunamira inzirakarengane za Jenoside yakorewe Abatutsi mu 1994
Inzego zitandukanye zari zihagarariwe muri uyu muhango wo kwibuka ku nshuro ya 28 Jenoside yakorewe Abatutsi, wabereye muri ULK
Bamporiki na Prof Rwigamba Balinda washinze ULK bacanye urumuri rw'icyizere nk'ikimenyetso cy'uko amateka mabi ya Jenoside yakorewe Abatutsi atazasubira
Bamporiki ni umwe mu bize muri ULK mu cyiciro cya kabiri cya kaminuza na Masters
Minisitiri Bamporiki yabwiye urubyiruko rwiga muri ULK ko nta rwitwazo rufite rwo kutubaka igihugu
Prof Rwigamba Balinda washinze ULK akaba ari na Perezida wayo, yasabye abakiri bato kurangwa n'indangagaciro bavoma mu buyobozi bw'igihugu burangajwe imbere na Perezida Kagame
Umuyobozi Mukuru wa ULK, Dr. Rusibana Claude, ubwo yandikaga mu gitabo cy'abashyitsi basura Urwibutso rwa Jenoside rwa Kigali ruri ku Gisozi
Umuyobozi Mukuru wa ULK, Dr. Rusibana Claude, yashyize indabo ku mva ziruhukiyemo abazize Jenoside yakorewe Abatutsi ku rwibutso rwa Jenoside rwa Kigali
Abayobozi n'abakozi ba ULK basuye Urwibutso rwa Jenoside rwa Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .