Musanze: Umuturage ashinja Gitifu w’Umurenge na Dasso kumukubita akavunika ukuguru

Yanditswe na N.Kubwimana Janvière
Kuya 20 Gicurasi 2020 saa 05:47
Yasuwe :
0 0

Munyaziboneye Phocas utuye mu Murenge wa Kinigi mu Karere ka Musanze, avuga ko yakubiswe na Dasso ari kumwe n’Umunyamabanga Nshingwabikorwa w’uyu murenge akavunika igufwa ry’ukuguru, agasaba ko yavuzwa.

Uyu musore w’imyaka 19 y’amavuko avuga ko yakubiswe ku wa 11 Mata 2020, ubwo yari kumwe na bagenzi be b’abanyeshuri bavuye kumusura (mu gihe ingendo zitari zemewe kubera amabwiriza yo gukumira Coronavirus), agahura n’uyu munyamabanga nshingwabikorwa Twagirimana Innocent ari kumwe na Dasso, bakabirukankana, bamufata bakamukubita akavunika.

Uyu musore Munyaziboneye akomeza avuga ko kuva yakubitwa n’aba bayobozi atigeze akurikiranwa ngo bamenye uko ameze, agasaba ko bamuvuza agakira neza.

Yagize ati "Nari kumwe na bagenzi banjye bari bavuye kunsura, bavuye mu rugo duhura na gitifu ari kumwe na Dasso n’umunyerondo, baratwirukankana njye baramfata batangira kunkubita mvunika igufwa ry’ukuguru, nahakuwe na Daihatsu ya mukuru wanjye. Namaze ukwezi mu bitaro nivuza ku giti cyanjye, n’ubu sindakira ndacyajya kwa muganga, mfite igisima, ndasaba ko banyitaho bakamvuza ngakira neza kuko baranyangije."

Umunyamabanga Nshingwabikorwa w’Umurenge wa Kinigi, Twagirimana Innocent, ahakana ko yakubise uyu musore, ko ahubwo ngo we na bagenzi be bamwikanze bakiruka, uyu muhungu akagwa agakomereka.

Yagize ati "Hari mu masaha y’umugoroba saa kumi n’ebyiri, uyu musore yari ahagararanye na bagenzi be bari kureba amashusho muri telefone, baratwikanze bariruka, twari kumwe na polisi icyo gihe, bamwe birutse bambukiranya umuhanda, uyu Phocas yasubiye inyuma yiruka agwa ahantu hari umugezi aravunika."

"Nahasize Dasso mpamagara n’imbangukiragutabara, gusa yaratinze atwarwa na mukuruwe muri Daihatsu, ibyo kumukubita arabeshya ntaho bihuriye."

Umuyobozi w’Akarere ka Musanze, Nuwumuremyi Jeannine, avuga ko uyu muturage atigeze abaregera, ariko ngo bamenye amakuru ko yashyikirije RIB ikirego cye, ikaba iri gukora iperereza.

Ati "Numvise ko yagishyikirije RIB kandi nayo mu kazi kayo izagira ubushishozi, niba umuturage yararenganye arenganurwe, ikindi umuyobozi akwiye kumenya ko ayobora adahutaje abaturage, akarangwa n’ineza mu byo akora atabangamiye abo ayobora, uyu muturage byanze bikunze azabona ubutabera, RIB irahari."

Umuvugizi wa RIB, Umuhoza Marie Michelle, yabwiye IGIHE ko dosiye y’iki kirego yamaze gukorwa ndetse yashyikirijwe Ubushinjacyaha.

Uyu musore ababyeyi be bavuga ko bamaze kumutangaho asaga ibihumbi 270 Frw yivuza ku bitaro bikuru bya Ruhengeri. Asaba ko yavuzwa akanasubizwa ayo yatanze yivuza.

Ibiro by'Umurenge wa Kinigi mu Karere ka Musanze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .