00:00:00 IGIHE NETWORK KN KINYARWANDA EN ENGLISH FR FRANCAIS

Babangamiwe n’umwijima w’ijoro ku muhanda uri mu marembo y’umujyi wa Musanze

Yanditswe na Ndikumwenayo Thierry
Kuya 22 September 2022 saa 09:06
Yasuwe :

Abatuye umurenge wa Rwaza bavuga ko baterwa ipfunwe no kuba uyu murenge ari irembo ry’umujyi wa Musanze ku baturutse i Kigali, ariko ku muhanda winjira muri uyu mujyi hakaba harangwa umwijima.

Bavuga ko uku kudacanirwa bikurura urugomo rurimo ubwambuzi bukoresha imbaraga buzwi nka “kaci” ndetse bikadindiza imikorere ku bakorera mu mujyi wa Musanze bataha muri uyu murenge.

Uva mu mujyi wa Musanze werekeza i Kigali, ugenda ikirometero gisaga kimwe kugira ngo winjire mu murenge wa Rwaza. Uyu murenge uwutangirira ku kiraro cy’uruzi rwa Mukungwa.

Ucyambuka iki kiraro, mu masaha y’ijoro wakirwa n’umwijima uterwa no kuba uyu muhanda mugari udacaniwe. Wongera kubona urumuri kuri uyu muhanda, uri hafi kwinjira mu karere ka Gakenke ahazwi nka Gicuba.

Abaturage bo muri uyu murenge bavuga ko bibangamiye iterambere ryabo kuko nk’abakorera mu mujyi wa Musanze, ngo bituma bagabanya amasaha yo gukora kugira ngo batahe kare kubw’umutekano wabo.

Hari uwagize ati “Uhereye ku kiraro cya Mukungwa kugera mu isantere ya Gicuba ntabwo hamurikiwe kandi ahandi hose haramurikiwe. Mu by’ukuri ibi bidukururira umutekano muke rimwe na rimwe bigatuma kuva mu mujyi wa musanze tudaha bitugora, kandi murabizi ko gahunda ari ugukora amasaha 24 kuri 24.”

Ndayisenga Obed na we atuye muri uyu murenge, avuga ko kuba uyu muhanda utamurikiwe bitera urugomo rukabije. Yitangaho urugero aho agatsiko k’abambuzi kamutangiriye bamwambura telefone.

Ati “ Uyu muhanda urimo insoresore zitwikira umwijima zikambura abantu, iyo bakwambuye bahita birukira muri ibi bishanga biri ku muhanda. Nkanjye baherutse kunyambura telefone bariruka. Hari n’abo bahakubitiye bajya mu bitaro. Icyo twasaba ni uko baduha amatara bityo n’urugomo ruhakorerwa rukagabanuka kuko ahantu hari urumuri ntibakunda kuhamburira.”

Nshimiyimana Eugene yavuze ko bibabaje kuba baturiye urugomero rwa Mukungwa ariko uyu muhanda ukaba udacaniwe yewe n’akagari kabo bikaba uko.

Umuyobozi w’akarere ka Musanze, Ramuli Janvier yavuze ko bagiye gokora ubuvugizi kugira ngo uyu muhanda ucanirwe.

Ati “Icyo twakora ni ubuvugizi muri RTDA ku buryo hasuzumwa impamvu kano gace kasigaye katamurikiwe n’icyabiteye kuko natwe turabyibaza.”

Igice kinini cy’uyu murenge wa Rwaza gituwe n’abakora umurimo w’ubuhinzi ndetse n’abakora ibikorwa byo gutwika amatafari. Abakora ubucuruzi ndetse gutwara abantu n’ibintu, abenshi babikorera mu mujyi wa Musanze dore ko ubegereye. Ibi nibyo bashingiraho basaba ko umuhanda wabo wamurikirwa kugirango bakorere mu bwisanzure.

Uyu muhanda abawukoresha mu masaha y'umugoroba binubira umwijima bahura nawo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .