00:00:00 IGIHE NETWORK KN KINYARWANDA EN ENGLISH FR FRANCAIS

Babangamiwe n’ingendo za nijoro zo mu Kiyaga cya Kivu zahagaritswe

Yanditswe na Nsanzimana Erneste
Kuya 12 June 2022 saa 01:13
Yasuwe :

Abanye-Congo n’Abanyarwanda barema amasoko nyambukiranyamipaka ahuza u Rwanda na Repuburika ya Demukarasi ya Congo bavuga ko babangamiwe n’icyemezo cyo kubuza amato kugenda mu kiyaga cya Kivu mu masaha y’ijoro.

Tariki 9 Kamena 2022, nibwo Minisitiri ushinzwe ubwikorezi mu Ntara ya Kivu y’Epfo yasohoye itangazo rihagarika ingendo za nijoro z’amato muri iki Kiyaga kiri hagati y’u Rwanda na RDC.

Abanye-Congo barema amasoko mu Rwanda baganiriye na IGIHE bavuga ko iki cyemezo kibangamiye ubucuruzi bakorana n’u Rwanda bagasaba ko cyakurwaho.

Polycarpe Muriyane, Umunye-Congo utuye ku Idjwi yavuze ko iki cyemezo kimubangamiye kubera ko bitashoboka ko arema isoko ryo mu Rwanda ataturutse iwabo nijoro.

Ati “Baravuze ngo abantu ntabwo baza nijoro ntabwo twajya tuza kubera ko twagera hano ku manywa isoko ryarangiye, igihe cyo gutaha nacyo kikaza kuba nijoro bikaba ikibazo.”

Innocent Kizungu, umusore utwara ubwato mu kiyaga cya Kivu yavuze ko ubwato bwihuse bukoresha amasaha umunani kuva i Bukavu muri Congo kugera i Ruganda mu Murenge wa Bwishyura ahubatse isoko nyambukiranyamipaka rya Karongi.

Ati “Bakwiye kongera imbaraga mu kwitegura gutabara habaye impanuka, aho guhagarika ingendo ngo hatabaho impanuka, kuko ntabwo wahagarika impanuka burundu.”

Kibalonza Annociatta, ni Umunye-Congo urangura ingurube mu Rwanda akazigurisha i Bukavu, ku Idjwi na Goma, yabwiye IGIHE ko iki cyemezo kibangamye ubuhahirane hagati y’u Rwanda na Congo kuko butashoboka ubwato budakora nijoro.

Ntibazirikana Théoneste, wo mu Murenge wa Bwishyura mu Karere ka Karongi yavuze ko mu gihe iki cyemezo cyagumaho ubucuruzi bakorana n’Abanye-Congo bwaba burangiye.

Ati “Abanye-Congo bazaga hano bakagura amatungo arimo ihene, ingurube, n’inkoko n’inkwavu, icyo cyemezo cyo kubuza amato kugenda nijoro mu Kiyaga cya Kivu ku bwanjye ndumva ari nko guhagarika ubuhahirane burundu.”

Umuyobozi w’Ihuriro ry’abatwara abantu mu bwato mu Kiyaga cya Kivu, Prudent Mpama, yavuze ko iki cyemezo ubuyobozi bwa Kivu y’Amajyepfo bwafashe gifite ingaruka ku baturage ba Kivu zombi kuko ubwato bugemurira abaturage ba Kivu y’Amajyepfo ibyo kurya n’ibindi bikoresho by’ibanze buhaguruka muri Kivu y’Amajyaruguru nimugoroba, bukagera Goma na Bukavu mu gitongo.

Abakoresha ubwato mu Kiyaga cya Kivu bifuza ko hakongerwa ubwirinzi bw’amajaketi abuza abantu kurohama iyo habaye impanuka, hakanongerwa ingufu mu butabazi bw’ibanze aho guhagarika ingendo za nijoro.

Abanye-Congo babangamiwe n’ingendo za nijoro zo mu kiyaga cya Kivu zahagaritswe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .