00:00:00 IGIHE NETWORK KN KINYARWANDA EN ENGLISH FR FRANCAIS

Ba rwiyemezamirimo bato 25 bishimiye amahugurwa y’amezi atandatu bahawe muri Tourism Inc

Yanditswe na Uwimana Abraham
Kuya 29 Ugushyingo 2020 saa 01:45
Yasuwe :
0 0

Ishimwe Gloria, ni umukobwa ukiri muto ndetse aracyari umunyeshuri muri kaminuza. Ubwo yari ari iwabo mu karere ka Huye mu ntara y’Amajyepfo, ni umukobwa wamye afite intumbero zo kuzaba rwiyemezamirimo, akikorera ndetse akarema n’imirimo ku bandi, gusa ibitekerezo byinshi yari abifite mu mutwe bitarajya mu bikorwa.

Ubwo igihugu cyose cyari mu bihe bya Guma mu Rugo, nta mirimo ikorwa ndetse n’amashuri yarafunze, nibwo yahamagawe kuri telefone n’inshuti ye bigana, yari izi ko akunda ishoramari ndetse ko yari afite umushinga yari ari gutangira buhoro buhoro ariko atarabona ubushobozi ngo awushyire mu bikorwa uko bikwiriye.

Iyo nshuti ye yamubwiye ko hari ibintu yabonye bari gusaba abantu urubyiruko rufite imishinga kohereza ubusabe muri “Tourism Inc”, ngo bashakaga gufata ba rwiyemezamirimo bakiri bato, bafite imishinga itanga icyizere kandi ifite umwihariko, bakabaha amahugurwa n’ubundi bufasha mu gukora imishinga yabo.

Ishimwe yatanze ubusabe bwe, asobanura umushinga we, wari uwo gutunganya imitsima yo mu birori (ceremonial cakes), akorera mu karere ka Huye, umushinga we wahatanye n’indi yari yatanzwe, ubundi bamutangariza ko ari mu batsinze, binjiye mu cyiciro cya kabiri cya “Tourism Inc”.

Ishimwe kimwe na bagenzi be bandi, uko bari 25 batoranyijwe mu bandi, bahise batangira amahugurwa y’amezi atandatu, aho bahabwaga ubujyanama butandukanye bwo kubafasha gukora imishinga yabo neza.

Mu byo bafashijwe harimo guhabwa abajyanama mu by’ishoramari bo kubaha ubujyanama buhoraho, gusura abandi bakora nk’ibyabo bakabigiraho, kwigishwa uburyo barushaho kunoza ibyo bakora, ndetse banahawe n’inkunga y’amafaranga yo kubafasha mu mishinga yabo.

Ku wa 27 Ugushyingo 2020, nibwo icyiciro cya kabiri cy’aba ba rwiyemezamirimo bakiri bato, cyari kigizwe 100% n’ab’igitsina gore, bahawe ibyemezo (certificate) by’ishimwe ko barangije amahugurwa y’amezi atandatu, muri gahunda ya Tourism Inc, yashyizweho n’umuryango ESP (Entrepreneurial Solutions Partners), ku nkunga ya Mastercard Foundation, binyuze muri gahunda ya “Hanga Ahazaza”.

Abarangije muri iki cyiciro bashimiye cyane ESP ku bw’iyi gahunda, bavuga ko bungukiyemo byinshi, ndetse ko byatumye imishinga yabo itera imbere bikayirinda guhungabana. Bavuze ko aya mezi atandatu yababereye umusingi ukomeye batakwibagirwa.

Uwimana Alphonsine watangije ndetse akaba ayobora “Ikaze Luggage Storage”, ibikira ba mukerarugendo imizigo mu gihe gito, iyo bashaka gutembera hafi mu mujyi mu gihe gito, yavuze ko iyi gahunda ya Tourism Inc ari yo yamufashije gutangira umushinga we.

Yagize ati “Ibyo twishimira ni byinshi, icya mbere ni uko umushinga wanjye watangiye nari maze igihe kinini nywutekereza, ariko bitewe n’amasomo bagiye baduha mu bintu bijyanye n’ishoramari no gutinyuka, nibyo byanteye imbaraga cyane, n’inkunga bampaye yaramfashije cyane kuko yatumye ntangira, kandi mbona ko business yanjye yari ikenewe.”

Muhoza Salama, umwe mu batangije sosiyete ya “Salama Tours”, ikora ibikorwa byo gutembereza abantu batandukanye, babereka ibyiza nyaburanga by’igihugu, bakaba bibanda cyane cyane ku gutembereza Abanyarwanda, yavuze ko iyi gahunda yabafashije, ituma badacika intege no mu gihe cy’icyorezo.

Ati “Iyi gahunda ya Tourism Inc yaradufashije cyane muri sosiyete yacu, by’umwihariko muri ibi bihe twarimo by’icyorezo, yadufashije mu buryo bwo kudacika intege, kuko twari tumeze nk’abantu bagiye gucika intege, tuvuga tuti business irakomeza gute, ariko barakomeje badutera imbaraga, batwungura ibitekerezo by’uburyo twakomeza gukora kandi tugatera imbere.”

Umuyobozi Mukuru wa ESP, Eric Kacou, yashimiye abasoje amahugurwa, abasaba gukomeza gushyira mu bikorwa ibyo bungukiyemo ndetse yizeza ko ESP izakomeza gukora uko ishoboye ngo iteze imbere by’umwihariko ab’igitsina gore gushyira mu bikorwa imishinga yabo, kuko ngo abagore ari ingenzi.

Uhagarariye gahunda ya Tourism Inc, Yvette Ntagozera, yavuze ko iyi gahunda yaje gufasha ba rwiyemezamirimo bakiri bato bafite imishinga ifite umwihariko, bakabaha amahugurwa akenewe kugira ngo bagere ku rwego rwiza, imishinga yabo yaguke.

Yagize ati “Dutekereza ko imwe mu mpamvu ba rwiyemezamirimo muri Afurika badatera imbere cyangwa ngo imishinga yabo ikomere, ni uko babura ubageza ku isoko, babura ubushobozi bw’amafaranga, ndetse bakabura n’ubumenyi.”

Yongeyeho ati “Icyo dukora nka Tourism Inc, dutanga ubufasha bwa kinyamwuga, ubujyanama mu kwagura imishinga, tubahuza n’inzobere mu byiciro by’ishoramari baba barimo, dutanga n’ubufasha bw’amafaranga.”

Ntagozera yakomeje avuga ko impamvu bibanda ku guha amahirwe igitsina gore, binashimangirwa n’uko abo muri iki cyiciro cya kabiri bose bari abagore, ngo ni uko babonye ko hari icyuho kinini hagati y’abagore n’abagabo, aho usanga amahirwe menshi yihariwe n’abagabo, akaba ariyo mpamvu bashatse kuzamura n’abagore kuko nabo bashoboye, ariko akenshi babura aho bamenera.

Nyuma y’iki cyiciro cya kabiri cyarangije aya mahugurwa, Ntagozera yavuze ko bamaze guhitamo icyiciro cya gatatu nacyo kizahita gitangira, bakamara amezi atandatu nabo batozwe banahabwa ubundi bufasha butandukanye mu gushyira mu bikorwa neza imishinga yabo.

Ibigenderwaho kugira ngo umushinga wemerwe, ni uko nyirawo aba ari hagati y’imyaka 18 na 35, kandi uwo mushinga ukaba utararenza imyaka itatu utangiye, cyangwa se akaba afite igitekerezo cy’umushinga atarashyira mu bikorwa ariko kidasanzwe.

Abujuje ibyo banyuzwa mu byiciro bitandukanye hasuzumwa imishinga irusha iyindi kuba myiza, ubundi ikaba ari yo itangira guhabwa ubwo bufasha n’ubujyanama mu gihe cy’amezi atandatu, amezi benshi bamara imishinga yabo imaze gukura, ndetse biteguye kurushaho gukora ibyiza birenzeho.

Muri iki gihe cy’umwaka umwe iyi gahunda ya Tourism Inc imaze itangiye, hamaze guhugurwa ibyiciro bibiri bya ba rwiyemezamirimo bato, bose hamwe bari 49.

Igenzura rihora rikorwa na ESP, ryerekana ko abahuguwe bose imishinga yabo igenda irushaho kwaguka cyane, kuko nko kugeza ubu abo 49 bamaze gutanga imirimo ku bantu 142, kandi baracyakomeje no guhanga indi ndetse no kwagura imishinga yabo, bikaba ari ikimenyetso cy’intsinzi y’iyi gahunda ya “Tourism Inc”.

Rica Rwigamba, Umuyobozi wa Mastercard Foundation mu Rwanda na we yari yitabiriye uyu muhango
Icyiciro cya kabiri cy'abasoje amahugurwa muri gahunda ya Tourism Inc
Hai abo imishinga yabo yatoranyijwe ikazahabwa ubundi bufasha bw'amafaranga
Eric Kacou, Umuyobozi Mukuru akaba n'uwashinze Entrepreneurial Solutions Partners ESP yavuze ko bazakomeza kugira uruhare mu iterambere by'umwihariko iry'umugore
Abahawe amahugurwa kubyo kwihangira imirimo bashimye uburyo bitaweho
Ingamba zo kwirinda Coronavirus zari zubahirijwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .