Ba rwiyemezamirimo 180 bamaze guhezwa mu masoko ya leta kubera amakosa

Yanditswe na Habimana James
Kuya 15 Gashyantare 2020 saa 07:50
Yasuwe :
0 0

Ikigo cy’igihugu gishinzwe gutegura amasoko ya Leta (RPPA), cyatangaje ko kuva mu 2007 kugeza ubu hari ba rwiyemezamirimo 180 bamaze guhezwa mu masoko ya leta kubera amakosa atandukanye, harimo kwambura abaturage no guta imirimo itarangiye

Ibi byagarutsweho kuri uyu wa Gatanu ubwo iki kigo cyahuzaga ba rwiyemezamirimo n’abakozi batanga amasoko ya leta mu bigo, harebwa uko bimwe mu bibazo bikirangwamo byakemurwa.

Umuyobozi w’ishami rishinzwe kongera ubushobozi muri RPPA, Sibomana Célestin, yavuze ko kuba isoko ritakorwa neza biterwa n’impande nyinshi, zirimo no kuba rwiyemezamirimo watsindiye isoko nyuma bishobora kugaragara ko nta mafaranga afite.

Uyu muyobozi kandi yahakanye ibikunzwe kuvugwa na ba rwiyemezamirimo bambura abo bakoresheje kubera ko leta iba yaratinze kubishyura, avuga ko rwiyemezamirimo ahabwa isoko kubera ko yari afite ubushobozi bwo kwishyura.

Yagize ati “Kutishyura ba rwiyemezamirimo ntibikwiye kuba impamvu bakwitwaza, kuko iyo ugiye gupiganira isoko wagombye kuba ubishoboye, isoko waripiganiye kubera ko niyo leta itakwishyura warikora, leta yo yishyura mu byiciro bitandukanye kandi na yo itabikoze byaba ari ikibazo, gusa ubu ntabwo bikiri ikibazo kuko kubera ikoranabuhanga rihari ryarabikemuye, ubu utanga isoko kubera ko ufite ingengo y’imari.”

Ati “Ikibazo gikomeye kiri kuri ba rwiyemezamirimo bishyurwa ariko bo ntibanishyure abakozi babo, niyo mpamvu ubu rwiyemezamirimo niyambura abakozi azajya ahezwa mu masoko ya leta mu gihe cy’imyaka itanu, ariko kandi na mbere yo kwishyurwa bwa nyuma urwego rwa leta rugomba kubanza kureba niba abakozi yakoresheje n’abamuhaye ibikoresho yabishyuye, iyo atabishyuye uru rwego rwa leta ruramwishyura.”

Guheza ba rwiyemezamirimo mu masoko ya leta bimaze igihe kuva mu 2007, ubu dufite abarenga 180 bamaze guhezwa mu masoko ya leta kubera amakosa atandukanye, bahezwa imyaka itanu cyangwa irindwi batari muri aka kazi.

Sibomana yavuze kandi ko ikoranabuhanga ry’amasoko ya leta ryatangiye gukoreshwa mu myaka itatu ishize, naryo ryakemuye ibibazo bitandukanye byabaga mu masoko ya leta harimo na ruswa.

Kugeza ubu inzego zirenga 180 zikoresha muri iri koranabuhanga.

Rwiyemezamirimo, akaba n’umuyobozi w’ikigo Africa Medical Supplier Ltd, Shema Fabrice, yavuze ko kugeza ubu gutinda kwishyurwa birimo kugenda bikemuka, ariko ko hari n’ibindi bigo bitinda kwishyura ba rwiyemezamirimo ibi bikaba bigira ingaruka ku masoko baba barimo gukora, cyane ko na banki usanga zitaborohera kuko zisaba ingwate nyinshi.

Ati “Ugereranyije n’imyaka ishize, 70% ubona ko byakosotse, ariko n’ibisigaye turizera ko bizakemuka.”

Avuga ko ikibazo bahura nacyo kijyanye n’imisoro bakwa n’Ikigo cy’Imisoro n’Amahoro, RRA buri kwezi, kuko iyo ikigo cya leta kitakwishyuye, RRA itakureka, ibi bikaba bibagiraho ingaruka mu kazi kabo.

RPPA yahuje ba rwiyemezamirimo n'abakozi batanga amasoko ya leta mu bigo
Umuyobozi w'ishami rishinzwe kongera ubushobozi muri RPPA, Sibomana yavuze ko ikoranabuhanga rikomeje gufasha mu mitangire y'amasoko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .