Ba Meya bashyizwe mu majwi ku kujya mu bucukuzi bwa Kariyeri mu buryo butemewe

Yanditswe na HABIMANA James
Kuya 5 Ukuboza 2018 saa 10:27
Yasuwe :
0 0

Perezida w’ishyirahamwe ry’abacukuzi ba Kariyeri mu Rwanda,Uwimana Etienne, yatangaje ko mu nzego z’ibanze harimo n’abayobozi b’Uturere, bagiye bandika ibirombe ku bantu kandi ibyo ari ibyabo, ibi ngo bikaba bitera akajagari muri ubu bucukuzi.

Uwimana Etienne yagaragaje ko ibi bibangamira abashoramari bari muri uyu mwuga, kuko babuzwa amahwemo n’aba bayobozi.

Ibi yabigarutseho ubwo hizihizwaga umunsi mpuzamahanga w’ubucukuzi bw’amabuye y’agaciro.

Uyu muyobozi ubwo yabazwaga ku bucukuzi bwa Kariyeri mu Rwanda, yagize ati “Bigaragara ko kariyeri ishobora kuzana umusaruro mu rwego rw’igihugu kubera umusoro n’amahoro batanga, ariko kubera ko gushoramo imari muri uyu mwuga byoroshye, usanga inzego z’ibanze zibyivangamo akenshi ibirombe byinshi nibo babyanditse ku bantu kandi ari ibyabo.”

Akomeza agira ati “Iyo ugiye ushaka gukora ubushakashatsi ngo aho hantu uhafate, uhura n’imbogamizi, ugasanga niba ushaka kwimura abaturage, abayobozi barakunaniza, bagacengera mu baturage bakabagira inama yo kukunaniza, ibyo wakoraga birahagarara na wa mushoramari akigendera, ba baturage wari ugiye guha akazi bagahomba, leta nayo igahomba, babikora bashaka kubiha uwo bashaka.”

Ubwo yabazagwa na IGIHE niba n’abayobozi b’uturere bivanga muri iki kibazo, Uwimana mu magambo make yagize ati “Yego, nabo barimo.”

Uyu muyobozi yavuze hari aho umushoramari ashobora guhamagara umuyobozi w’Akarere ashaka kumubwira ikibazo yahuye nacyo, ariko uwo meya akaba yamara amezi abiri yaranze gufata telefoni.

Umuyobozi w’Ikigo cy’Igihugu gishinzwe mine, peteroli na gas, Francis Gatare, yavuze ko abantu bagihura n’ikibazo cyo kubona impushya kuko abazishaka baba ari benshi, ariko rimwe na rimwe izo nzego ugasanga zitaramenya neza gusesengura itegeko rishya ryamaze kuvugururwa.

Yavuze ko itegeko ryavuguruwe muri uyu mwaka ku bucukuzi bwa kariyeri, hari ibyangombwa bitangirwa ku rwego rw’igihugu, ku karere no ku Murenge, ariko na we akemeza ko koko hakirimo ibibazo.

Naho Guverineri w’Intara y’Amajyaruguru, Gatabazi Jean Marie Vianney, we yavuze ko mu gihe umuntu yujuje ibyangombwa aba agomba gufashwa.

Ati “Mu gihe usabye ibyangombwa wujuje ibisabwa, ntibikwiye gusiragizwa, tugiye kugira inama turebe impamvu batinda kubaha ibyangombwa, ndabwira abayobozi b’inzego zibanze ko ubucukuzi bw’amabuye y’agaciro ari inyungu kuri twe cyane ko iyo byakozwe neza bitanga akazi n’amafaranga ku gihugu.”

Gusa yavuze ko hari n’aho usanga hari abayobozi batanga ibyangombwa bakabiha abantu batujuje ibisabwa, hakabaho kwangiza ibidukikije.

Guverineri w'Intara y'Amajyaruguru, Gatabazi JMV ari kumwe na na Perezida w’ishyirahamwe ry’abacukuzi ba Kariyeri mu Rwanda, Uwimana Etienne
Abantu b'ingeri zitandukanye bari bitabiriye umunsi mpuzamahanga w'ubucukuzi bw'amabuye y'agaciro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza