Aubameyang yise umwana w’ingagi ‘Igitego’: Urutonde rw’amazina yose yahawe abana 24

Yanditswe na Ishimwe Israel
Kuya 24 Nzeri 2020 saa 11:30
Yasuwe :
0 0

Umunya-Gabon, Pierre-Emerick Aubameyang, ukinira Arsenal FC yo mu Bwongereza yise umwana w’ingagi “Igitego”, izina yasanishije n’igikorwa cyo kugera ku ntsinzi.

Aubameyang usanzwe ari Kapiteni wa Arsenal FC ifitanye ubufatanye n’u Rwanda mu kwamamaza ubukerarugendo bwarwo ari mu bakinnyi batatu bayo batumiwe mu muhango wo Kwita izina abana b’ingagi.

Uyu muhango wari usanzwe ubera mu Kinigi ho mu Karere ka Musanze kuri iyi nshuro wabaye hifashishijwe ikoranabuhanga ry’amashusho mu kwirinda ikwirakwira ry’icyorezo cya COVID-19.

Abana 24 b’ingagi bahawe amazina kuri uyu wa Kane, tariki ya 24 Nzeri 2020, bavutse nyuma y’itariki ya 6 Nzeri 2019, ubwo haheruka kuba umuhango nk’uyu ku nshuro ya 15 cyangwa abavutse mbere yaho gato ntibahabwe amazina kuko bari bataramara umwaka.

Uyu munsi wahuriranye n’uwo Isi yizihizaho Umunsi Mpuzamahanga wahariwe Ingagi, wagiyeho bigendeye ku bikorwa bya Dian Fossey, Umunyamerikakazi wari wariyeguriye kwita ku buzima bw’inyamaswa by’umwihariko ingagi zo mu misozi.

Ku wa 24 Nzeri 1967 nibwo yashinze “Karisoke Research Center” yari igamije gukora ubushakashatsi ku ngagi zo mu birunga, i Musanze mu Majyaruguru y’u Rwanda.

Mu gihe amazina yatangwaga n’ibyamamare n’abandi bakoze ibikorwa by’indashyikirwa ku Isi, kuri iyi nshuro umwihariko wahawe abantu bazikurikirana umunsi ku wundi.

Aba barimo abarinzi ba Pariki, abashinzwe kumenya aho ingagi ziri, abazivura, abayobora abaje kuzisura ndetse n’abakira abaje muri pariki n’abarinda ingagi zo mu birunga bose hamwe 21.

Abashyitsi batatu b’imena batumiwe ni abakinnyi ba Arsenal FC imaze imyaka ibiri iri mu bufatanye n’Urwego rw’Igihugu rw’Iterambere bugamije kwamamaza ibyiza bitatse u Rwanda no gukangurira abantu kurusura.

Bari bayobowe na Pierre-Emerick Aubameyang wise umwana we “Igitego”, umunyezamu, Bernd Leno we yatanze izina rya “Myugariro” mu gihe Héctor Bellerín, umwana we yamwise “Iriza.’’

Mu butumwa bwabo, aba bakinnyi bahurije ku kunyoterwa kuzasura abana b’ingagi bahaye amazina bakareba uko bameze mu Birunga.

Amazina yose yatanzwe afitanye isano n’imbaraga u Rwanda rwashyize mu kubungabunga urusobe rw’ibinyabuzima by’umwihariko ingagi zo mu Birunga zisigaye ahantu hake ku Isi ndetse n’arimo ubutumwa bwo kubahiriza ingamba zo guhashya COVID-1O nka “Amabwiriza’’ kugira ngo ibikorwa y’ubukerarugendo byongere bisubire ku murongo.

-  Urutonde rw’amazina yiswe abana 24 b’ingagi:

1. Kazeneza

2. Nkomezamihigo

3. Uwacu

4. Murengezi

5. Duhuze

6. Cyororoka

7. Igitego

8. Indiri

9. Ubushobozi

10. Amarembo

11. Ihogoza

12. Umusanzu

13. Nkerabigwi

14. Impinduka

15. Myugariro

16. Isezerano

17. Iriza

18. Nyiramajyambere

19. Ikamba

20. Amabwiriza

21. Izabukuru

22. Ishya

23. Umuyobozi

24. Umuganga

Umuhango wo kwita izina abana b’ingagi ni umwihariko w’u Rwanda, ukaba waratangiye mu 2005, mu rwego rwo kwerekana agaciro ingagi zifitiye igihugu ndetse no gushimira abaturage baturiye Pariki y’Ibirunga, abita ku bayigana n’abaganga bita ku ngagi. Kuva mu myaka 15 ishize, abana b’ingagi barenga 300 nibo bamaze kwitwa amazina muri uyu muhango ngarukamwaka.

Ubukerarugendo bwo gusura ingagi bwatanze umusanzu ukomeye mu bukungu bw’u Rwanda kuko mu mwaka ushize bwazamutseho 17 %. Umusaruro u Rwanda rubukuramo wageze kuri miliyoni 498$ mu 2019 mu gihe intego ari ukwinjiza miliyoni 800$ mu 2024.

Kurikira uko uyu muhango wagenze umunota ku wundi

Ni ku nshuro ya 16 ingagi zo mu Birunga ziswe amazina/Ifoto ya Niyonzima Moses

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .