00:00:00 IGIHE NETWORK KN KINYARWANDA EN ENGLISH FR FRANCAIS

Asaga miliyari 100 Frw agiye gushorwa mu kwagura icyanya cy’ubuhinzi mu Rwanda

Yanditswe na Ntabareshya Jean de Dieu
Kuya 7 Mutarama 2023 saa 06:37
Yasuwe :

U Rwanda rugiye kunguka icyanya kinini kurusha ibindi mu bikorerwaho ubuhinzi n’ubworozi kizatunganywa mu Karere ka Nyagatare ku buso bwa hegitari zirenga ibihumbi 16.

Ubusanzwe ubuhinzi ni rumwe mu nzego zifitiye igihugu akamaro kuko gahunda y’Igihugu ya kane yo kuvugurura ubuhinzi (PSTA 4) 2018-24 igaragaza ko ubuhinzi bugize kimwe cya gatatu cy’ubukungu bw’u Rwanda.

Uyu mushinga ugiye gushyirwa mu bikorwa wo kuhira icyanya cy’ubuhinzi kizashyirwa ku buso bugari biteganyijwe ko uzatwara arenga miliyari 100 Frw, aho nibura igice cya mbere cyawo kizaba cyamaze gushyirwa mu bikorwa muri Werurwe 2022, kikazaba kiri ku buso bwa hegitari 5600.

Ibi bizakorwa mu mushinga wiswe Gabiro Agribusiness Hub, uri ku buso bwa hegitari zisaga ibihumbi 16.

Iki cyanya kizaba ari kinini giherereye ku nkombe z’umugezi w’Akagera utandukanya u Rwanda na Tanzania ku ruhande rw’Umurenge wa Rwimiyaga mu karere ka Nyagatare.

Kuri ubu hakurikiyeho imirimo yo kubaka ibikorwa remezo byo gukurura amazi ava muri uwo mugenzi ajyanwa i musozi.

Ni ahantu heza hazahindurwa icyanya kigari cyane ko nko mu ntera ya metero 100 zonyine uturutse aho ku mugezi hari icyuzi gihangano gishamikiyeho umuyoboro w’amazi wubatse mu buryo bwa ruhurura.

Uyu muyoboro wa kilometero 21 wubakiyeho ibindi bikorwaremezo byifashishwa mu gukwirakwiza amazi mu bice bitandukanye by’imirima nk’amatiyo n’indi miyoboro itandukanye.

Kubaka no gukwirakwiza ibikorwa remezo byo kuhira muri iki cyanya birimo gukorwa na sosiye Gabiro Business Hub Ltd, aho guverinoma y’u Rwanda yihariye 93% naho sosiyete ya NETAFIM yo muri Israel ikagira 7%.

Umuyobozi Mukuru wa Gabiro Agribusiness Hub Ltd, Micomyiza Hanson, yabwiye RBA ko nyuma yo kubaka ibikorwaremezo hose muri iki cyanya, abikorera aribo bazashora imari mu bikorwa by’ubuhinzi kuri ubwo butaka.

Yagize ati “Abikorera rero bazaba bafite ubutaka kuko bazahabwa ibice bizagabanywa muri za hegitare 5600. Buri kimwe kizaba gifite hegitari ziri hagati ya 200 na 300 hanyuma kikazajya kigerwaho n’umuhanda.”

Yavuze ko abikorera nabo bazajya bashyiraho akabo mu gihe cyo kuvana amazi aho umurima wabo utangirira bayakwirakwiza mu tundi duce tw’umurima n’ibindi bigamije iterambere ry’ubuhinzi buteye imbere.

Abasaga 1 500 nibo bafite ubutaka ahakorera uyu mushinga harimo 312 bari banabutuyemo bakazatuzwa mu midugudu y’icyitegererezo irimo Akayange, Rwabiharamba na Shimwa Paul yo muri Nyagatare.

Uretse gutunganya icyanya cy’ubuhinzi, muri uyu mushinga hubatswe imihanda y’ibitaka ireshya na kilometero 61 n’umuyoboro w’amashanyarazi ufite ubushobozi bwa Megawatt 8 ukareshya na kilometero 74.

Izindi nyungu kandi ziri muri uwo mushinga ni uko watanze akazi ku baturage bo mu mirenge ya Karangazi na Rwimiyaga muri Nyagatare.

Biteganyijwe ko nibura kuhira ubuso bwa hegitare 5 600 hazakenerwa amazi angana na metero kibe 14 000 ku isaha mu gihe umuyoboro uzakoreshwa ufite ubushobozi bwo gutanga metero kibe ibihumbi 340 ku isaha.

Bivugwa ko ayo mazi ari yo akenewe ngo ubuso bwose bwuhirwe muri uyu mushinga uko bungana na hegitare ibihumbi 16 ubwo uzaba umaze gushyirwa mu bikorwa wose.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .