Arménie yiyemeje gufatanya n’u Rwanda ikarukuraho ubumenyi mu gutanga serivisi hifashishijwe ikoranabuhanga

Yanditswe na Evariste Nsengimana
Kuya 17 Mutarama 2020 saa 11:15
Yasuwe :
0 0

Perezida wa Arménie, Armen Sarkissian, yavuze ko urwego rw’imitangire ya serivisi mu Rwanda, by’umwihariko mu bigo bya Leta hifashishijwe ikoranabuhanga ari kimwe mu bitanga icyizere icyo gihugu gishobora kubyaza umusaruro mu mubano wacyo n’u Rwanda.

Ibi Perezida Sarkissian yabigarutse mu kiganiro yagiranye na mugenzi we w’u Rwanda, Paul Kagame ubwo bahuraga bitabiriye inama iheruka kubera i Abu Dhabi muri Leta Zunze Ubumwe z’Abarabu yiga ku iterambere rirambye.

Mu biganiro aba bakuru b’ibihugu bagiranye byibanze ku kureba ibyo bihuriyeho birimo amateka byaciyemo n’ibibazo bifite muri iyi minsi n’uburyo byafatanya mu kubishakira ibisubizo ariko by’umwihariko harebwa amahirwe buri gihugu cyabyaza umusaruro binyuze mu kwagura umubano bifitanye.

U Rwanda na Arménie ni ibihugu bito binafite amateka yihariye ashingiye ku kuba buri kimwe cyaranyuze mu bihe bikomeye bya Jenoside aho mu Rwanda iyakorewe Abatutsi mu 1994 yasize abasaga miliyoni bishwe mu gihe iyakorewe abanya-Arménie yakozwe mu 1914-1923, igahitana abarenga miliyoni 1.5.

Aba bakuru b’ibihugu bavuze ko ibihugu byombi byanyuze mu bihe bikomeye ariko uyu munsi byamaze kubirenga ndetse bigaragara ko hari amahirwe akomeye bishobora gufatanya kubyaza umusaruro.

Muri ubwo bufatanye, Perezida Sarkissian yavuze ko by’umwihariko urwego rw’imitangire ya serivisi za guverinoma mu Rwanda hifashishwa ikoranabuhanga rumaze gutera imbere ku buryo ari kimwe igihugu ayobora cyaheraho mu kubyaza umusaruro.
Muri ibi biganiro, Perezida Sarkissian yaboneyeho n’umwanya wo gutumira mugenzi we ko yazashaka umwanya agasura icyo gihugu muri uyu mwaka.

Muri uyu mwaka muri Arménie hazabera inama zitandukanye zirimo ‘Arménien Summit of Minds’ izaba ku wa 7 Kamena, aho abazayitabira bazaganira ku ngingo zitandukanye zirimo ikoranabuhanga rishya, uruhare rw’ikoreshwa ry’ubwenge karemano n’izindi. Hari handi iserukiramuco mpuzamahanga rizaba ku nshuro ya gatandatu rizwi nka TARMUS.

Perezida Kagame aheruka muri Arménie mu Ukwakira 2018 ubwo haberaga inama y’Abakuru b’Ibihugu na za Guverinoma, yatorewemo Umunyamabanga Mukuru w’Umuryango w’Ibihugu bikoresha Igifaransa, OIF, Louise Mushikiwabo.

Perezida Arménie, Armen Sarkissian, yagiranye ibiganiro na Perezida Kagame Paul w'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza