00:00:00 IGIHE NETWORK KN KINYARWANDA EN ENGLISH FR FRANCAIS

Apôtre Mutabazi yitabaje Inteko asabira uwariye ruswa ‘kunyagwa’ ibyo atunze byose

Yanditswe na Akayezu Jean de Dieu
Kuya 25 May 2022 saa 10:29
Yasuwe :

Apôtre Mutabazi Kabarira Maurice, yandikiye urwandiko abagize Inteko Ishinga Amategeko y’u Rwanda, imitwe yombi asaba kwiga ku mushinga w’itegeko ryo kunyaga uwariye ruswa n’uwanyereje umutungo w’igihugu, avuga ko ari ko byahoze mu muco wa Kinyarwanda ku mutware wabaga yagomeye ingoma.

Ni urwandiko rwashyizweho umukono ku wa 23 Gicurasi 2022, aho rwandikiwe Perezida wa Sena, Dr Iyamuremye Augustin na Perezida w’Umutwe w’Abadepite, Mukabalisa Donathile, bimenyeshwa Ibiro by’Umukuru w’Igihugu ndetse n’Ibiro bya Minisitiri w’Intebe.

Apôtre Mutabazi warwanditse avuga ko ari Umushumba w’Itorero New Covenant Kingdom Citizen na Minisiteri yitwa World Foundation, akaba umushakashatsi, umwanditsi w’ibitabo n’utanga ibiganiro nyungurabwenge bihugura abantu [Motivational Speaker].

Ni nyuma y’uko mu minsi ishize uwari Umunyamabanga wa Leta muri Minisiteri y’Urubyiruko n’Umuco, Bamporiki Edouard ahagaritswe ku mirimo ye kubera ibyaha yari akurikiranyweho birimo kwakira ‘indonke’.

Ni mu gihe kandi Raporo y’Umugenzuzi Mukuru w’Imari ya Leta, yasohotse muri uku kwezi yagaragaje amakosa yakozwe n’ibigo bitandukanye bigatuma leta ihomba akayabo. Bityo Apôtre Mutabazi akaba asanga abakoze ibyo bakwiye kunyagwa.

Uru rwandiko yandikiye abagize Inteko Ishinga Amategeko yahamije ko ari umuti usharira yavuguse ariwo ‘Itegeko ryo Kunyaga’, bityo wajya wandikirwa umurwayi wa Kanseri yo kwigwizaho imitungo.

Hari aho agira ati “Impamvu ari mwe nandikiye ni uko ari mwe ntumwa za rubanda, ruswa ntiyacika abayirya amategeko ayihana barayakenetse.”

Apôtre Mutabazi yavuze ko itegeko ryo kunyaga risanzweho mu mateka y’u Rwanda aho Umwami iyo yagabiraga Umugaragu nyuma akaza kugomera ingoma, yamunyagaga ibyo atunze byose.

Nibyo ashimangira muri uru rwandiko ati “Abanyarwanda bijyanye n’umuco wacu wo kugaba no kunyaga, twemeranyijwe ko uzarya ruswa cyangwa akanyereza umutungo wa rubanda azahanishwa kunyagwa agasigarana imyenda yambaye gusa, kandi ntiyemerewe guhabwa impano iyo ari yo yose keretse imfashanyo zigenerwa abari mu cyiciro cya mbere cy’ubudehe.”

Mu kiganiro yagiranye na IGIHE yagize ati “Uyu mushinga w’itegeko ryo kunyaga, mu Rwanda rwo hambere bakunyaga ibyo wibye, bakakunyaga n’ibyo wakoreye, bakakunyaga n’impano waba warahawe, ibyo wagabiwe, guteranyaho impano wahawe, guteranyaho n’ibyo wakoreye noneho n’ibyo watoraguye biramutse bihari nabyo byakwiyongeraho kubera ko wagomeye Abanyarwanda.”

Yakomeje agira ati “Ni cyo kintu cyonyine cyatera umuntu kujya atekereza ruswa cyangwa hagira umubwira ruswa agahita atitira mu nda hakamurya. Ubwo nibwo buryo turwanyamo n’ibyihebe kuko biba byangiza Sosiyete, ukora ku buryo ingamba z’umuntu wabifatirwamo yirinda ikintu cyatuma yisanga muri icyo kintu.”

Apôtre Mutabazi avuga ko iri tegeko ryo kunyaga riramutse ritowe, abarya ruswa bose bashobora kugira ubwoba kuko ryaba rifite ubukana.

Ati “Niba byakorerwa Abanyarwanda mu nyungu z’umuturage wo hasi, nitwihangane twemere rijyeho kandi abantu bareke kwishyiramo ngo hazanyagwa abantu 100, uwa mbere yakoraho agashirira, uwa kabiri ntiyakoraho.”

Yakomeje agira ati “Icyo dukeneye ni uwa mbere ubigerageza ririya tegeko ryatowe, uwo akajya mu cyiciro cya mbere cy’ubudehe, mugahura ateze igare, yagendaga muri V8, abana be bagiye kwiga muri ‘Nine Years Basic Education’ barimo kwishyurirwa na leta, icyo gihe undi muntu wese […] n’umuntu wabimenye yari agiye kurya ruswa yahita akata imodoka agasubira mu rugo.”

Ese we afite ibiganza byera ?

Abahanga mu mateka n’abageze mu zabukuru bazi inkuru y’Umutware Kamegeri ku Ngoma y’Umwami Mibambwe II Sekarongoro II Gisanura, ahagana mu 1672. Uyu mugabo ni we waje kwitirirwa urutare rwa ‘Kamegeri’.

Kugira ngo yitirirwe urwo rutare ni uko barumutwikiyeho, ibi akaba yarabyifuje nyuma y’aho Kamegeri yari yabwiye umwami ko abazajya bagira nabi bazajya barujugunywaho rumaze gucanirwa.

Mutabazi yabajijwe niba ibyo yifuriza abandi bidashobora kumugirirwaho, asubiza ati “Navuka sindarya ruswa nta n’ibyo nteganya. Ubwanjye kuyibuza si uko nafatwa ngo nshyirweho ibyo by’urutare rwa Kamegeri, ahubwo ni uko njyewe ubushakashatsi nakoze, ruswa mbasha kubona uburyo imunga igihugu.”

“Bitari bya bindi abantu babivuga mu mbwirwaruhame, njyewe mbasha kumenya uburyo yica ubwonko bw’abakiri bato, bagakura uwakavuyemo Albert Einstein, agahinduka umuntu utanakora muri laboratwari yo ku bitaro.”

Apôtre Mutabazi avuga ko na we mubyo akora ahura n’abamuha ruswa akabatera utwatsi ari nayo mpamvu asanga n’abakorera leta bashobora gucunga neza amafaranga bahembwa aho kugira ngo bagomere u Rwanda n’Abanyarwanda kuko urya ruswa aba ahemukiye igihugu.

Apôtre Mutabazi yitabaje Inteko Ishinga Amategeko asaba uwariye ruswa kunyagwa ibyo atunze byose

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .