00:00:00 IGIHE NETWORK KN KINYARWANDA EN ENGLISH FR FRANCAIS

Imodoka zishaje n’ikinyabupfura gike ku isonga y’ibiteza impanuka zikomeje guhitana benshi

Yanditswe na Akayezu Jean de Dieu, Mukahirwa Diane
Kuya 24 Ukuboza 2022 saa 08:39
Yasuwe :

Impanuka ni kimwe mu bikomeje gutwara ubuzima bw’Abaturarwanda mu Mujyi wa Kigali n’ahandi mu gihugu ndetse muri minsi ya vuba zabaye nyinshi ku buryo hari impungenge ko mu minsi mikuru zanakwiyongera.

Mu bihe bitandukanye zakunze gukorwa n’amakamyo manini atwara ibyifashishwa mu bwubatsi azwi nka Howo, bamwe bagakeka ko yaba afite ikibazo cyihariye, nubwo nta cyemezo cy’abahanga kirabyemeza.

Uretse izo modoka ariko, n’ubundi bwoko bw’imodoka bukomeje gukora impanuka, aho nko mu mujyi wa Kigali, mu cyumweru kimwe gusa hamenyekanye impanuka eshatu zikomeye kandi zishe abantu.

Mu myaka itatu ishize urebye impanuka zagumye muri 600 mu mwaka, izihitana ubuzima bw’abantu.

Muri rusange impanuka zavuye ku 4160 mu 2020 zigera ku 8639 mu 2021, ndetse muri uyu mwaka wa 2022 nubwo utararangira, hamaze kuba impanuka 8,660.

Izo mpanuka zahitanye abantu benshi, barimo 629 mu 2020, 655 mu 2021 na 687 bamaze gupfa muri uyu mwaka wa 2022.

Ni ukuvuga ko ugereranyije n’umwaka ushize wa 2021, habayeho ukwiyongera kw’impanuka zihitana ubuzima bw’abantu.

Ubwiyongere bw’impanuka bujyana n’ubwiyongere bw’umubare w’ababona impushya zo gutwara ibinyabiziga, imibare y’abagura imodoka [uko ziyongera niko haza ibyago by’uko zateza impanuka].

Abakomerekera mu mpanuka bo baragabanutse ugereranyije n’umwaka ushize kubera ko bari 471 [abakomeretse bikabije] ariko muri uyu mwaka wa 2022 , abakomeretse babaye 111.

Polisi y’Igihugu ivuga ko mbere y’uko hatangira ikoreshwa rya za Camera zo ku muhanda impanuka nyinshi zaterwaga n’umuvuduko ariko kuri ubu usanga iziganje ari uburangare.

Ubu burangare nabwo ahanini buri kujyana n’iterambere ry’ikoranabuhanga aho usanga umuntu atwaye imodoka ari no kugenda yandika ubutumwa kuri WhatsApp, areba amafoto cyangwa amashusho (videos) n’ibindi.

Muri uyu mwaka kandi abantu 158 baguye mu mpanuka ziterwa na moto ni mu gihe abaguye mu mpanuka ziterwa n’amagare bari 189. ku rundi ruhande abanyamaguru nabo bagwa mu mpanuka ni benshi kuko muri uyu mwaka bari 240.

Ubushobozi buke mu bitera impanuka

Umuyobozi w’Ishami rya Polisi rishinzwe Umutekano wo mu Muhanda, ACP Gerard Mpayimana avuga ko mu rwego rwo kugabanya impanuka ziterwa no kuba hari imodoka zishaje hashyizwe imbaraga mu kugenzura ubuziranenge bw’ibinyabiziga [Contrôle technique ].

Yabivuze ku wa Kane tariki 22 Ukuboza 2022, ubwo yari mu kiganiro Umujyi wa Kigali wagiranye n’itangazamakuru ku bijyanye n’ibihe by’iminsi mikuru Abanyarwanda bagiye kwinjiramo.

ACP Mpayimana yavuze ko Abanyarwanda bakwiye kwitwararika by’umwihariko muri ibi bihe by’iminsi mikuru kugira ngo birinde impanuka.

Agaruka ku ngamba zashyizweho mu kurwanya impanuka ziterwa n’imodoka zishaje yagize ati “Ubundi contrôle technique yaje ari igisubizo, kutayigira byo byaba ari bibi kurushaho [...] Tubona ko mfashe nk’ikigereranyo cya buri mwaka 80% by’impanuka zihitana ubuzima bw’abantu ziba ziri mu magare kandi amagare ntabwo ajya muri contrôle technique nubwo nabyo umuntu yabirebaho, ziba ziri mu bamotari, kugeza ubu ntabwo barajya muri contrôle technique.”

Yakomeje agira ati “Ibindi bikigaragara mu bumenyi buke bwo gukoresha umuhanda kw’abanyamaguru. Icyo gice nicyo kinini tubona kibangamiwe. Icy’uko tubona impanuka nyinshi, ikibazo dukwiye kugishakira mu ruhurirane rw’ibintu bitandukanye bisanzwe bihari.”

ACP Mpayimana avuga kandi ko hari ubwo abantu bagura imodoka bitewe n’ubushobozi buke, bakagura izishaje bazishyira mu muhanda zikaba zateza impanuka.

Ati “Icya mbere ni uburyo umuntu ajya kugura imodoka, agura imodoka bitewe n’amikoro afite. Mwese murabizi hari imodoka zihendutse n’izihenze. Ushatse imodoka nziza wayigura ariko ikaguhenda, ngira ngo harimo ikibazo cy’amikoro.”

Yakomeje agira ati “Abanyarwanda bafite ubushobozi bakagenda bakagura imodoka zihwanye n’ubushobozi bafite niho tubona ko imodoka zimwe na zimwe ziba zidafite ubuziranenge cyangwa zidafite ireme ryiza ribasha guhangana n’imisozi yacu, rihangana n’imihanda yacu nayo igifite urugendo rwo gukora.”

Polisi y’u Rwanda yavuze kandi ku modoka nini zirimo iz’amakamyo manini atwara ibyifashishwa mu bwubatsi azwi nka Howo, yavuze ko ahanini usanga biterwa n’imiterere y’izi modoka ndetse n’imihanda yo mu Rwanda.

ACP Mpayimana ati “Icyo twabonye ni uko ahanini ziriya modoka zikorera bitewe n’imihanda zicamo, iragenda ikikorera, igashyiraho uburemere, amatiyo y’amavuta agaciaka, yazagera ahamanuka agiye gufata feri agasanga yagiye. Muby’ukuri ni uruhererekane rw’ibintu byinshi.”

Ikindi kintu yagarutseho nk’igishobora gutiza umurindi impanuka, ni uburyo utwara imodoka aba yarigishijwe cyane ko hari abatsinda ibizamini ariko akaba ataramaze kwiga neza ibijyanye no kugenda mu muhanda.

ACP Mpayimana ati “Uburyo uyitwara yatojwe nabwo bifitemo uruhare, amashuri atoza abo batwara imodoka, amagaraje izo modoka zikorerwamo [...] Byose usanga ari uruhurirane rw’ibintu byinshi bituma ubuziranenge bw’iyo modoka igiye gushyirwa ku muhanda butaba neza 100%.”

Kugeza ubu mu Rwanda uretse mu Mujyi wa Kigali i Remera ahazwi nko kuri contrôle technique , ziri n’ahandi nka Huye, Rwamagana, Musanze, ndetse hari n’igendanwa ijya za Rusizi, Rubavu n’ahandi.

Ikinyabupfura gike

Umuyobozi wa Polisi y’u Rwanda, Ishami rishinzwe Umutekano wo mu Muhanda, ACP Gerard Mpayimana, yaburiye abashoferi barangwa n’imyitwarire itari myiza mu muhanda, ibintu yise ‘ikinyabupfura gike’.

Ati “Twubahane mu muhanda, buriya kimwe mu bintu bituma ibyo byose bibaho, ni ukutagira ikinyabupfura no kubahana mu muhanda, bitera amakosa abakoresha umuhanda.”

“Urugero, mwese muzabibona ndetse muzabona ko twashyizemo imbaraga. Umuntu umuturutse inyuma ugashyiramo kinyoteri, ukamusaba inzira akayikwima. Icyo ni ikinyabupfura? Ukamuha ihoni akabyanga, ukamuha amatara akabyanga! Ni ikibazo gikomeye kiriya kintu.”

ACP Mpayimana avuga ko usanga hari abakora ibyo bazi neza ibyo amategeko ateganya ariko bakanga bakabyirengagiza bakayica nkana.

Ati “Kandi Itegeko ryo mu Rwanda rivuga ko iyo ugenda, ugendera iburyo. Impamvu badutegetse kugendera iburyo ni ukugira ngo uzaza yihuta azabashe gucaho agende. Aho hantu nta koroherana mu muhanda kurimo, ndagira ngo muzadufashe turebe ko aho hantu twahivana.”

Yakomeje agira ati “Umuntu aguturuka inyuma, tuvuge ko wenda wahuye n’ikibazo, akaguha nk’amahoni atatu agukanga ukenda no guhahamuka. Ibyo nabyo ntabwo ari ikinyabupfura mu muhanda , usanga rwose umuntu yahahamutse kubera umuntu aguhaye amahoni. Ngira ngo tuzagere n’aho turenga ibintu by’urusaku mu muhanda.”

“Muzabona umuntu, urimo uragenda mu muhanda, akakwinjirana agashyira amazuru y’imodoka ye mu yawe, n’ubwo wari urimo ugenda ariko amazuru y’imodoka ye [...] Kandi akinjiramo gahoro gahoro, biriya ntabwo ari ikinyabupfura, nta nubwo ari ukubahana, akakwinjirana. Abakoresha umuhanda mudufashe mubireke.”

Sena yatumije uhagarariye Guverinoma ngo asobanura ingamba zo gukumira impanuka

Raporo ya Komisiyo y’Ububanyi n’Amahanga, Ubutwererane n’Umutekano,muri Sena iherutse kugaragaza ko ikibazo cy’impanuka zikomeje gutwara ubuzima bw’abantu gihangayikishije igihugu.

Komisiyo yavuze ko hari byinshi byakozwe birimo kuba harashyizweho Politiki yo gutwara abantu n’ibintu na Politiki y’igihugu y’umutekano, n’ingamba zo gushyiraho ibigo bisuzuma ibinyabiziga, gupima abatwara banyoye ibisindisha na kamera (camera) zo ku muhanda, mu gukumira no kurwanya impanuka.

Gusa ariko ngo impanuka zikomeza kwiyongera aho kugabanuka.

Perezida wa Komisiyo y’Ububanyi n’Amahanga, Ubutwererane n’Umutekano Hadija Ndangiza Murangwa, yavuze ko abo bantu bapfuye ari benshi, kuko ari impuzandengo y’abantu babiri bicwa n’impanuka ku munsi.

Ati "Iki ni ikibazo dukwiye guhagurukira kugira ngo tumenye impamvu zigitera n’uburyo bwo gukumira izi mpanuka."

Senateri Emmanuel Havugimana yavuze ko iyi mibare ishyira u Rwanda ku mwanya wa 15 ku isi mu bihugu 153, mu kugira impanuka zihitana abantu benshi, ashingiye kuri raporo y’Ishami ry’Umuryango w’Abibumbye ryita ku buzima, OMS, igaragaza ko mu bantu 100,000, abantu 44 bicwa n’impanuka buri mwaka.

Ni ibintu yagaragaje ko bikwiye gufatirwa ibyemezo, kuko nko mu Busuwisi, ho bageze ku muntu umwe wicwa n’impanuka mu bantu 100,000.

Senateri Ndangiza yavuze ko muri iyo gahunda, Minisitiri w’Intebe ubwe akwiye kwitaba Sena cyangwa akohereza minisitiri ubifite mu nshingano, agasubiza ibibazo by’abasenateri.

ACP Mpayimana avuga ko amikoro n'ikinyabupfura gike biri mu biteza impanuka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .