00:00:00 IGIHE NETWORK KN KINYARWANDA EN ENGLISH FR FRANCAIS

Amerika yasabye iperereza ku byo RDC ishinja u Rwanda kubera M23

Yanditswe na IGIHE
Kuya 30 May 2022 saa 10:50
Yasuwe :

Umuyobozi wa Komisiyo ishinzwe ububanyi n’amahanga muri Sena ya Leta Zunze Ubumwe za Amerika, Bob Menendez, yasabye ko habaho iperereza ku birego Repubulika Iharanira Demokarasi ya Congo (RDC), ishinja u Rwanda byo gufasha abarwanyi ba M23.

Mu itangazo ryasohotse ku wa Gatandatu, Menendez yavuze ko yamenyeshejwe ko u Rwanda rutera inkunga abarwanyi ba M23, bashinjwa gukora ibikorwa by’urugomo, kugaba ibitero ku ngabo za FARDC, iz’Umuryango w’Abibumbye no ku basivili.

Uyu muyobozi yavuze ko hakwiye gukorwa iperereza ryimbitse kandi abantu bose bagaragaye ko batera inkunga imitwe y’abarwanyi bagomba kubibazwa.

Ikibazo cy’abarwanyi ba M23 mu Burasirazuba bwa Repubulika Iharanira Demokarasi ya Congo (RDC) gikomeje guhindura isura uko bwije n’uko bucyeye no guteza urunturuntu mu mubano w’u Rwanda n’iki gihugu cyo mu Burengerazuba bwarwo.

Mu cyumweru gishize, isura y’imirwano imaze amezi atatu hagati ya M23 n’ingabo za FARDC yabaye iyindi ubwo abayobozi batandukanye ba RDC na sosiyete sivile beruraga bakavuga ko aba barwanyi baterwa inkunga n’u Rwanda. Ni ibirego u Rwanda rudahwema guhakana.

Ni ibintu byageze aho RDC yerura ishinja ku mugaragaro ko u Rwanda rushyigikiye M23. Inama Nkuru y’Umutekano muri RDC yabihereyeho ifata imyanzuro irimo uwo kwihanangiriza u Rwanda, aho itangazo ryashyizwe hanze rivuga ko Guverinoma y’u Rwanda ibangamiye inzira y’amahoro iri guterwa mu Burasirazuba bwa Congo.

Undi mwanzuro ni uwo guhagarika ingendo za RwandAir ku butaka bwa Congo ndetse byemezwa ko na Ambasaderi w’u Rwanda, Vincent Karega agomba guhamagazwa.

Ku rundi ruhande ariko u Rwanda rushinja RDC ubushotoranyi, aho mu cyumweru gishize igisirikare cy’iki gihugu cyateye ibisasu mu majyaruguru y’u Rwanda bikomeretsa bamwe mu baturage ndetse ku wa Gatandatu gishimuta abasirikare babiri b’u Rwanda, kivuga ko bafatiwe ku butaka bwacyo.

Umuvugizi wungirije wa Guverinoma y’u Rwanda, Alain Mukuralinda, yavugiye kuri Televiziyo y’Igihugu ko ibibazo bya M23 ari icy’Abanye-Congo kandi nibidakemuka bizakomeza bizurungutane."

Yanavuze ko ubushotoranyi bukomeje, u Rwanda ruzakora ibishoboka byose kugira ngo ubwo bushotoranyi butajyana ku ntambara.

Yakomeje ati "U Rwanda rwiyemeje gukora ibishoboka byose kugira ngo bufatanye na Congo, ubufatanye n’ibihugu mu karere, kugira ngo kiriya kibazo gikemuke binyuze mu nzira y’ibiganiro n’imishyikirano."

"Runasaba kandi ko imyanzuro iba yafashwe ishyira mu bikorwa, kandi ko Congo yagerageza guca mu nzira ziba zateganyijwe, ariya magambo asa n’aho aba akongeza bagerageza kuyagabanya."

Bamwe mu basesenguzi bagaragaza ko ikibazo gihari uyu munsi ari uko Congo idashaka kwemera ko Abanye-Congo bavuga Ikinyarwanda, ari abaturage bayo, bakumva ko bagiye muri Congo bahagarariye u Rwanda aho kubabona nk’Abanye-Congo.

Ibi bituma igihe cyose bahagurutse baharanira uburenganzira bwabo, byitirirwa u Rwanda kandi Congo iyobowe neza yagakemuye ikibazo cy’abaturage bayo.

Senateri Bob Menendez yavuze ko hakwiye gukorwa iperereza ku byo u Rwanda rushinjwa na RDC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .