Amerika yanenzwe kwifashisha Google Translate mu kugenzura imbuga nkoranyambaga z’abimukira

Yanditswe na IGIHE
Kuya 29 Nzeri 2019 saa 11:43
Yasuwe :
0 0

Urwego rwa Amerika rushinzwe serivisi z’ubwenegihugu n’abinjira n’abasohoka (USCIS) rwanenzwe ku kwifashisha uburyo bw’isemura bwifashisha internet nka Google Translate, mu kugenzura ibyagiye byandikwa n’abantu batandukanye, igihe barimo gusaba kujya muri Amerika.

Ubutumwa bwagenewe abakozi b’uru rwego, buvuga ko gufata inyandiko ukayishyira mu mbuga zisemura nka Google Translate cyangwa Bing ari “uburyo buruta ubundi bwakwifashishwa.”

Bwabonywe n’Umushinga mpuzamahanga ufasha impunzi (International Refugee Assistance Project), busangizwa urubuga ProPublica.

Urwo rubuga rwatangaje ko izi porogaramu akenshi usanga zasemuye interuro nabi cyangwa se imvugo yihariye y’abantu runaka ugasanga isemuwe mu ijambo bidahura. Ni ibintu binabonwa n’abantu benshi bifashisha izo mbuga mu gusemura inyandiko.

Gusa USCIS yabwiye icyo kinyamakuru ko kwifashisha ubwo buryo mu kugenzura ibyanditswe ku mbuga ari ibintu byumvikana, nk’uburyo bukoreshwa cyane.

Icyo kigo cyakomeje kiti “amakuru yakuwe ku mbuga nkoranyambaga, ubwayo ntabwo aba ahagije kugira ngo ashingirweho mu kwanga ko impunzi runaka zakirwa.”

Muri iki gihe leta Zunze Ubumwe za Amerika isaba abantu bose basaba viza yayo gutanga imyirondoro ya konti bakoresha ku mbuga nkoranyambaga.

Uru rwego rwa Amerika ruteganya ko mu gihe uburyo busanzwe bw’isemura budatanze umusaruro, hashobora kwemezwa niba hakenewe impuguke mu by’indimi ngo zifashe mu kumva neza igisobanuro cy’amagambo yakoreshejwe ku mbuga nkoranyambaga.

Inkuru wasoma: Abasaba viza zo kujya muri Amerika bagiye kujya bagaragaza imbuga nkoranyambaga bakoresha


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza