00:00:00 IGIHE NETWORK KN KINYARWANDA EN ENGLISH FR FRANCAIS

Amerika igiye guha u Rwanda imashini 100 zitanga umwuka ku barwayi ba Coronavirus

Yanditswe na Twarabanye Venuste
Kuya 25 Nyakanga 2020 saa 06:55
Yasuwe :

Minisitiri w’Ububanyi n’amahanga w’u Rwanda, Dr Vincent Biruta yavuze ko Leta Zunze ubumwe za Amerika zigiye guha u Rwanda imashini zigera ku 100 zitanga umwuka ku barwayi ba Coronavirus.

Minisitiri Biruta yabigarutseho mu kiganiro ku Kwibohora ku nshuro ya 26 cyahuje abanyarwanda bari muri Leta Zunze Ubumwe za Amerika na Canada. Yavuze ko umubano hagati y’u Rwanda n’ibyo bihugu uhagaze neza.

Ku ruhande rwa Leta Zunze Ubumwe za Amerika yavuze ko icyo gihugu mu minsi iri imbere kizashyikiriza u Rwanda inkunga y’ibikoresho byifashishwa mu buvuzi bwa Coronavirus birimo imashini 100 zongerera umwuka abarwayi.

Yagize ati “U Rwanda rubanye neza na Leta Zunze Ubumwe za Amerika, dufitanye umubano mu bijyanye n’umutekano mu bijyanye n’Uburezi, mu bijyanye n’ubuzima n’ubu tuvugira ahangaha iki cyumweru kije hari impano igiye kuva muri Leta Zunze Ubumwe za Amerika ibyuma bifasha abarwayi guhumeka bigeze ku 100 mu rwego rwo guhangana n’iki cyorezo cya coronavirus.”

Ku ruhande rwa Canada naho yavuze ko hari imibanire myiza n’ubufatanye mu bintu bitandukanye birimo ubufatanye mu kwita ku bidukikije, guhangana n’imihindagurikire y’ibihe, kubungabunga amahoro ku Isi no mu bindi.

Kugeza ubu mu Rwanda hamaze kuboneka abarwayi ba Coronavirus 1729, abagera kuri 900 barakize naho batanu yarabishe.

Imashini itanga umwuka ku warembejwe na Coronavirus igura hagati y’amadolari ya Amerika ibihumbi 25-50 ni ukuvuga ari hagati ya miliyoni 25 na 50 Frw. Ibihugu bitandukanye byagize ibibazo byo kubona izi mashini kubera umubare munini w’abarwayi.

Minisitiri Biruta yatangaje ko Amerika igiye guha u Rwanda imashini 100 zongerera umwuka abarwayi ba Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .