Ambasaderi Yasmin Amri Sued yashyikirije Perezida wa Koreya y’Epfo impapuro zimwemerera guhagararira u Rwanda

Yanditswe na IGIHE
Kuya 14 Ugushyingo 2019 saa 06:51
Yasuwe :
0 0

Ambasaderi w’u Rwanda muri Koreya y’Epfo, Yasmin D. Amri Sued, yashyikirije Perezida wa Repubulika ya Korea, Moon Jae-in, impapuro zimwemerera guhagararira u Rwanda muri icyo gihugu.

Uyu muhango wabaye uyu munsi kuwa Kane tariki 14 Ugushyingo 2019, ubera ku biro by’umukuru w’igihugu. Uyu muhango washimangiye umubano usanzwe hagati y’ibihugu byombi wanitabiriwe n’abandi ba Ambasaderi bagera kuri 11 nabo batanze impapuro zibemerera guhagararira ibihugu byabo muri Koreya y’Epfo.

Nyuma y’umuhango wo gutanga impapuro hakurikiyeho ikiganiro hagati ya ba Ambasaderi bose na Perezida wa Koreya n’itsinda rye rigizwe na Minisitiri w’ububanyi n’amahanga n’abandi bayobozi muri Perezidansi.

Perezida wa Korea y’Epfo, Moon Jae-in, yifurije ba Ambasaderi kuzuza neza inshingano zabo avuga ko igihugu cye cyiteguye kuzafatanya na bo mu kuzuza inshingano zabo.

Perezida Moon Jae-in yaganirije ba Ambasaderi kuri politiki iri mu karere Korea y’Epfo iherereyemo anabasaba ubufatanye mu guhuza Koreya ya ruguru na Korea y’Epfo.

Yasabye ba Ambasaderi n’ibihugu bahagarariye ubufatanye mu kurwanya ihindagurika ry’ikirere, abasaba kuzitabira inama izabera Seoul mu kwezi kwa Gatandatu yiga ku ihindagurika ry’icyizere n’iterambere rirambye; P4G (Partnering for Green Growth and the Global Goals 2030).

Perezida Moon Jae-in kandi yasabye ba Ambasaderi ubufatanye mu yindi nama izabera Busan, muri Korea y’Epfo muri uku kwezi bizihiza isabukuru y’imyaka 30 bamaze bafitanye umubano n’ibihugu byo mu majyepfo y’Iburasirazuba bwa Aziya.

Ambasaderi Yasmin D. Amri Sued yashimiye Perezida wa Repubulika ya Koreya kumwemerera guhagararira u Rwanda mu gihugu cye, anavuga ko adashidikanya ko umubano w’ibihugu byombi uzakomeza gutera imbere.

Ambasaderi Yasmin D. Amri Sued yashimiye Perezida Moon uruhare runini Koreya y’Epfo igira mu iterambere ry’u Rwanda.

Ambasaderi Yasmin D. Amri Sued, ashyikiriza Perezida wa Repubulika ya Korea, Moon Jae-in, impapuro zimwemerera guhagararira u Rwanda
Ubwo bari bamaze kugirana ibiganiro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza