Ambasaderi Uwihanganye yatangiranye icyizere ko u Rwanda ruzamera nka Singapore

Yanditswe na Rabbi Malo Umucunguzi
Kuya 22 Ukwakira 2019 saa 02:00
Yasuwe :
0 0

Ambasaderi w’u Rwanda muri Singapore, Uwihanganye Jean de Dieu, yatangaje ko mu gukora cyane no gukomera ku ntego, nta kabuza u Rwanda ruzabasha kugera ku iterambere rikomeye nk’iryo Singapore imaze kugeraho, mu myaka mike ishoboka.

Uwihanganye aheruka kugirwa Ambasaderi muri icyo gihugu, nyuma y’igihe ari Umunyamabanga wa Leta muri Minisiteri y’Ibikorwa remezo ushinzwe ubwikorezi, akazi yagiyeho nyuma y’igihe akora muri NPD Cotraco.

Mu butumwa yashyize kuri Twitter nyuma yo gutangira inshingano nshya, Uwihanganye yagize ati “Ntabwo wakumva ko ibi byose babigezeho mu myaka 50 gusa! Nta mitungo kamere, igihugu gifite ubuso bungana n’ubwa Kigali! Mu gukomera ku ntego no gukora cyane u Rwanda ruzabigeraho! Nimucyo tubikore.”

Ni ubutumwa bwaherekejwe n’amafoto atatu Amb. Uwihanganye avuga ko yafatiwe mu biro bye bishya.

Yakomeje avuga ko Singapore ari igihugu gikomeye mu bijyanye n’ikoranabuhanga, ku buryo hari ibintu byinshi u Rwanda ruzungukira ku bufatanye bw’ibihugu byombi.

Singapore ni igihugu gikize cyane kuko imibare ya Banki y’Isi yerekana ko mu mwaka umuturage wayo yinjiza $ 54 530, nibura ni miliyoni zisaga 50 Frw. Iyi banki ariko igaragaza ko Umunyarwanda yinjiza $ 780, ni ibihumbi bisaga 700 Frw ku mwaka.

Nyamara amateka agaragaza ko icyo gihugu cyabigezeho atari ukubera imitungo kamere ihambaye gifite, ahubwo ni abaturage bakora cyane. Bashyigikirwa n’inzego z’igihugu zubatse icyizere mu bashoramari b’abanyamahanga, kikagira n’inzego zihamye zaba izifasha mu koroshya ishoramari, uburezi bufite ireme, ubukungu n’ibindi.

Singapore ni igihugu cyo muri Aziya ariko kigizwe n’umujyi umwe ufite ibice bitandukanye, ibizwi nka City State mu Cyongereza, ariko gifite ubwigenge busesuye. Gifite ubuso bwa 721.5 km². Ni igihugu cyaciye uduhigo dushoboka mu birebana n’ubukungu n’iterambere ry’abaturage, kuko aho giherereye uyu munsi, mu myaka 200 ishize hari ishyamba.

Iki gihugu cyigeze gukolonizwa n’u Bwongereza, kimaze imyaka 54 kibonye ubwigenge kuko mu 1965 ari bwo cyabubonye kimaze kwitandukanya na Malaysia. Muri iyo myaka cyavuye mu cyiciro cy’ibihugu bikennye kigera aho cyabaye nk’icyicaro cy’ishoramari rikomeye ryo ku Isi, kuko ibigo byinshi by’ishoramari birututse hirya no hino ku isi, bihafite icyicaro.

Singapore ni cyo gihugu cya mbere ku isi kirimo abantu batunze za miliyoni, bitari ukuvuga ko umuntu umwe afite miliyoni nyinshi cyane, ahubwo abazifite ni benshi. Icyizere cyo kubaho muri Singapore kigeze ku myaka 79 ku bagabo na 84 ku bagore.

Raporo iheruka yakozwe na Banki y’Isi mu mwaka ushize ku buryo ibihugu byoroheje ubucuruzi, yashyize Singapore ku mwanya wa kabiri ku Isi inyuma ya Nouvelle Zelande, aho ifite amanota 85.24 ku ijana. Kuri urwo rutonde u Rwanda rwasimbutse imyanya 11 rugera ku mwanya wa 29 ku Isi.

Umwarimu muri Kaminuza y’Igihugu ya Singapore, Prof Ben Long, aheruka kubwira IGIHE ko ubumenyi n’ikoranabuhanga ari ishingiro ry’iterambere icyo gihugu cyagezeho, bikuzuzanya no gukora cyane. Mu minsi ishize Long yari mu Rwanda yitabiriye Igiterane cyiswe Afurika Haguruka.

Avuga ko gukora cyane ari ingenzi kugira ngo umuntu agere ku ntego ze, kimwe n’igihugu. Ngo imwe mu mpamvu zatumye Singapore igera ku rwego iriho uyu munsi, hari imbaraga n’ishoramari bikomeye yashyizwe mu burezi.

Ati "Uyu munsi dukataje mu ikoranabuhanga, hari ibigo byinshi bikomoka muri Amerika n’ahandi, inganda, hari ibigo binyuranye ku buryo tugenda tubigiraho, navuga ko ikoranabuhanga ari ryo ryatumye Singapore igera aho iri uyu munsi. U Rwanda narwo ruri muri iyo nzira."

Long avuga ko imiyoborere y’u Rwanda izatuma rugera ku ntambwe zikomeye, kuko Perezida Paul Kagame ari umuyobozi urimo gukora neza kandi wishimiwe n’abaturage, nk’uko byagenze ku washinze Singapore akanayibera Minisitiri w’Intebe wa mbere, Lee Kuan Yew.

Ati "Imiyoborere ni ingenzi cyane, ikindi ni ishoramari mu bikorwa remezo by’uburezi. Hari abanyarwanda benshi boherezwa kwiga mu mahanga bakagarukana ubumenyi n’ikoranabuhanga, ni ikintu gikomeye gishobora gutanga umusanzu mu iterambere, ikindi ni ugutuma abaturage bagira uruhare mu guteza imbere igihugu cyabo."

"Singapore ni igihugu gito, nta mitungo kamere, dufite icyambu ariko ntabwo ari ibintu bitangaje, ariko dufite abaturage kandi dufatanyije dushobora kubaka igihugu kirenze uko abantu batekereza."

Uretse gukora cyane kw’abanya-Singapore, aho iki gihugu giteretse naho hacyongerera amahirwe, kuko ari irembo ryiza ryinjira muri Aziya. Inafite kandi Singapore Changi Airport iri mu bibuga by’indege byakira abantu benshi ku Isi, ndetse mu mwaka ushize bibarwa ko cyakiriye abagenzi miliyoni 65.6.

Iki gihugu kinafite icyambu cya Singapore kiri mu bya mbere ku Isi binyuzwaho imizigo myinshi, aho kiza ku mwanya wa kabiri ku Isi, nyuma y’icyambu cya Shanghai mu Bushinwa.

Bibarwa ko iki gihugu kiyobowe nk’ikigo kimwe cy’ubucuruzi aho abaturage ari abakozi bacyo kandi barwana inkundura ngo gitere imbere, kandi bagakorera ku mihigo, abayobozi bakigishwa gucunga neza imitungo no kwirinda uburiganya, hagamijwe kurinda icyizere abashoramari bafitiye iki gihugu.

Uyu munsi Singapore iyoborwa na Perezida Halimah Yacob na Minisitiri w’Intebe Lee Hsien Loong.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza