00:00:00 IGIHE NETWORK KN KINYARWANDA EN ENGLISH FR FRANCAIS

Amb Nkulikiyimfura yashyikirije Mushikiwabo impapuro zimwemerera guhagararira u Rwanda muri OIF

Yanditswe na Kanamugire Emmanuel
Kuya 20 July 2022 saa 04:05
Yasuwe :

Ambasaderi François Nkulikiyimfura yashyikirije Umunyamabanga w’Umuryango w’ibihugu bikoresha Igifaransa (OIF), Louise Mushikiwabo, impapuro zimwemerera guhagararira u Rwanda mu Muryango Uhuza Ibihugu bikoresha Igifaransa (OIF).

Nkulikiyimfura yagizwe Ambasaderi w’u Rwanda mu Bufaransa muri Mata 2022 asimbuye François Xavier Ngarambe, akaba yari asanzwe ahagarariye u Rwanda muri Qatar.

Louise Mushikiwabo yatorewe kuba Umunyamabanga Mukuru wa OIF mu 2018, asimbuye Umunya-Canada, Michaelle Jean.

Amakuru yatangajwe na OIF ibinyijije ku rubuga rwayo rwa Twitter, avuga ko Ambasaderi Nkulikiyimfura yagiranye ibiganiro ku ngingo zirimo izijyanye n’ubukungu muri uyu muryango n’uburyo imikoranire y’u Rwanda n’uyu muryango yarushaho kongerwamo imbaraga.

Baganiriye kandi kuri porogaramu ya OIF yo gutanga abarimu bigisha Igifaransa mu bihugu birimo n’u Rwanda, yatangijwe hagamijwe guteza imbere Igifaransa mu bihugu binyamuryango.

Iyi porogaramu yatangijwe na Louise Mushikiwabo, yiswe ‘Mobilité des Enseignants’, itangirira mu bihugu birimo u Rwanda, Ghana na Guinnée ariko bikaba biteganyijwe ko uzagera mu bihugu 10.

Muri Mata uyu mwaka, nibwo Minisiteri y’Uburezi yakiriye abarimu 45 batanzwe na OIF binyuze muri iyi porogaramu baje bakurikira abandi 25 bari bakiriwe mu cyiciro cya mbere.

Abarimu u Rwanda rwakiriye baturuka mu bihugu birimo Gabon, Côte d’Ivoire, RDC, Guinnée, Mali, Sénégal, Bénin, Togo, Cameroun, u Burundi, Burkina Faso n’u Bufaransa.

Nubwo bafatwa nk’abakorerabushake u Rwanda ni rwo ruzajya rubahemba ndetse Umuyobozi w’Ishami rishinzwe iterambere n’Imicungire y’Abarimu mu Rwego rw’igihugu rushinzwe uburezi bw’Ibanze, REB, Mugenzi Ntawukuriryayo Léon, yavuze ko bagomba guhembwa imishahara isumbye iy’abarimu b’imbere mu gihugu kuko baba bigomwe byinshi birimo no gusiga imiryango yabo.

Raporo iheruka ya OIF mu 2018 igaragaza ko Igifaransa cyavugwaga n’abagera kuri miliyoni 300. Biteganyijwe ko mu 2060 bazaba bageze kuri miliyoni 700.

Ku munsi w’ejo kandi Ambasaderi Nkulikiyimfura yashyikirije Umuyobozi Mukuru wa UNESCO, Audrey Azoulay, impapuro zimwemerera guhagararira u Rwanda muri uyu muryango.

Bombi bagiranye ibiganiro byitsitse ku kamaro k’umurage w’isi waba ugaragara cyangwa utagaragara ndetse no ku burezi bw’abana b’abakobwa.

Ambasaderi Nkulikiyimfura yashyikirije Mushikiwabo impapuro zimwemerera guhagararira u Rwanda muri OIF
Ambasaderi François Nkulikiyimfura yagiranye ibiganiro n'Umunyamabanga Mukuru wa OIF, Louise Mushikiwabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .