Ambasade y’u Bushinwa yasinyanye amasezerano na Imbuto Foundation yo gufasha abanyeshuri 100 batishoboye

Yanditswe na Uwimana Abraham
Kuya 21 Ugushyingo 2020 saa 10:02
Yasuwe :
0 0

Ambasade y’u Bushinwa mu Rwanda yasinyanye amasezerano y’ubufatanye na Imbuto Foundation, afite agaciro ka miliyoni 30 Frw, yo gufasha mu kurihira abanyeshuri b’abahanga bagera ku 100, baturuka mu miryango itishoboye.

Iyi nkunga igamije gushyigikira gahunda ya “Edified Generation”, yatangijwe na Imbuto Foundation mu 2002, igamije gufasha mu buryo bw’amafaranga, abanyeshuri b’abahanga ariko baturuka mu miryango itishoboye gukomeza amasomo yabo nta nkomyi.

Kuri ubu iyi gahunda ifasha abanyeshuri bo mu mashuri yisumbuye bagera kuri 694, bo mu bigo by’amashuri 102 hirya no hino mu gihugu.

Aba banyeshuri bahabwa ubufasha bw’agera ku madolari 300 ku mwaka yo kwishyura amacumbi, impuzankano n’ibindi bikoresho nkenerwa mu gihe bari ku ishuri.

Aba banyeshuri bafashwa na Imbuto Foundation binyuze muri iyi gahunda, bagira umwiherero ngarukamwaka, aho batozwa ibyabafasha mu buzima, byuzuza ibyo bigira ku ishuri, ndetse bagatozwa kuba abaturage ntangarugero.

Ubu bufasha bwatanzwe na Ambasade y’u Bushinwa, buje bushyigikira ubushuti n’ubundi bwari busanzwe, aho Ambasade y’u Bushinwa mu Rwanda kuva mu 2013 yatanze ubufasha ku banyeshuri bo mu mashuri yisumbuye b’abahanga ariko badafite ubushobozi bagera ku 100.

Kuri ubu binyuze muri gahunda ya “Edified Generation”, Imbuto Foundation imaze gutanga ubufasha ku banyeshuri b’abahungu n’abakobwa 9601.

Aya masezerano afite agaciro ka miliyoni 30 Frw
Clement Kabiligi, uhagarariye Ishami ry'Uburezi mu Imbuto Foundation (ibumoso); Umuyobozi Mukuru Wungirije wa Imbuto Foundation, Geraldine Umutesi (hagati) hamwe na Xing Yuchun, Umujyanama mu bya Politike muri Ambasade y'u Bushinwa mu Rwanda
Umuyobozi Mukuru Wungirije wa Imbuto Foundation, Geraldine Umutesi aganira na Xing Yuchun, Umujyanama mu bya Politike muri Ambasade y'u Bushinwa mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .