00:00:00 IGIHE NETWORK KN KINYARWANDA EN ENGLISH FR FRANCAIS

Amb Karitanyi yihanangirije abashoramari bari mu bucukuzi batubahiriza uburenganzira bw’abakozi

Yanditswe na Iradukunda Olivier
Kuya 9 Ukuboza 2022 saa 10:12
Yasuwe :

Umuyobozi Mukuru w’Ikigo Gishinzwe Mine, Peteroli na Gaz (RMB), Amb Yamina Karitanyi, yasabye abashoramari bari mu bucukuzi bw’amabuye y’agaciro kugerageza guha abo bakoresha ibyangombwa byose bagenerwa n’amategeko birimo amasezerano y’akazi, ubwishingizi no kubahembera kuri banki.

Ibi byagarutsweho ku wa Kane tariki 8 Ukuboza 2022, ubwo hasozwaga icyumweru cyahariwe ubucukuzi bw’amabuye y’agaciro.

Ni umuhango waranzwe no guha impamyabumenyi abamaze iminsi bahugurwa mu bijyanye n’ubucukuzi bw’amabuye y’agaciro bigizwemo uruhare na Sendika y’abakozi bo mu bucukuzi bw’amabuye y’agaciro na za kariyeri mu Rwanda (REWU) ndetse na RMB.

Aya mahugurwa yitabiriwe n’abakozi 200 baturutse mu bigo 10 muri 62 bikora ubucukuzi bw’amabuye y’agaciro mu Rwanda.

Umwe mu banyeshuri basoje aya mahugurwa wiga muri Kaminuza y’u Rwanda, Ndahiro Innocent, yavuze ko ubumenyi bahawe buzatuma barushaho kuba inzobere mu bijyanye n’ubucukuzi bw’amabuye y’agaciro.

Ati “Abanyeshuri twiga uyu mwuga turacyari bake, ariko ibikorwa nk’ibi ni byo tukibura kugira ngo tubikunde. Aya mahugurwa ndetse n’ibindi batwemereye twizeye ko bizatugirira umumaro ejo cyangwa ejo bundi.”

Umuyobozi Mukuru w’Ishyirahamwe ry’abacukuzi b’amabuye y’agaciro mu Rwanda, Jean Malic Kalima, yavuze ko nubwo uru rwego rumaze gutera imbere rukirangwamo ibibazo bitandukanye.

Yavuze ko kuba ubucukuzi bugikorwamo n’abantu batari abanyamwuga aribyo bituma abakoresha bamwe badaha abakozi babo ibyo bakeneye byose birimo n’ubwishingizi.

Ati “Nibyo duhora tuvuga. Kubera kutamenya ibyo aribyo nibyo bituma ibigo byinshi bikora aka kazi, bitita ku bwishingizi. Nyuma y’uko tubigaragaje abenshi bitwazaga ko ntabyo bazi, inzitwazo zivuyeho.”

Mu busanzwe abacukuzi bakoraga imirimo yo mu birombe usanga abenshi ntawe ufite ikigaragaza ko ibyo akora abifitemo ubumenyi, ibintu bishimangirwa n’Umunyamabanga wa REWU, Mutsindashyaka André ariko akemeza ko bigenda bikemuka.

Ati “Ubusanzwe umukozi yazaga avuga ati nzi gucukura wamubaza uti ikibyemeza kirihe akakibura. Kugeza ubu rero abanyeshuri 200 twahuguye bazadufasha kwereka bagenzi babo ko impamyabushobozi zikenewe kugira ngo bakore akazi uko bikwiye.”

Umuyobozi Mukuru w’Ikigo Gishinzwe Mine, Peteroli na Gaz (RMB), Amb, Yamina Karitanyi yavuze ko nubwo abakozi hari ibyo basabwa birimo no kugira icyangombwa kigaragaza ko bafite ubumenyi mu bucukuzi bw’amabuye y’agaciro n’abakoresha, nabo hari ibyo babagomba cyane cyane bijyanye no kubahiriza ibigenwa n’itegeko ry’umurimo.

Ati “Turashimira abagize uruhare muri ibi bikorwa bose. Turashishikariza abakoresha b’uyu murimo guha abakozi babo amasezerano y’akazi, bakabamenyera ubwishingizi, bakabahembera kuri banki ndetse ku gihe.”

Ubucukuzi bw’amabuye y’agaciro buza ku mwanya wa kabiri mu kwinjiriza igihugu amafaranga menshi nyuma y’ubukerarugendo. Uru rwego kandi ni rumwe mu zitanga akazi ku bantu benshi, aho kugeza ubu mu Rwanda rukorwamo n’abarenga ibihumbi 40.

Uyu muhango wo gusoza icyumweru cyahariwe ubucukuzi bw’amabuye y’agaciro witabiriwe n’abakora muri uru rwego hirya no hino mu gihugu
Umuyobozi Mukuru w’Ikigo Gishinzwe Mine, Peteroli na Gaz (RMB), Amb Yamina Karitanyi yasabye abashoramari bari mu bucukuzi bw’amabuye y’agaciro kugerageza guha abo bakoresha ibyangombwa byose bagenerwa n’amategeko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .