Amb. Gasamagera yashyikirije Perezida Lourenço impapuro zimwemerera guhagararira u Rwanda muri Angola

Yanditswe na IGIHE
Kuya 16 Ukwakira 2019 saa 06:33
Yasuwe :
0 0

Ambasaderi Gasamagera Wellars, yashyikirije Perezida wa Angola, João Manuel Gonçalves Lourenço, impapuro zimwemerera guhagararira u Rwanda muri iki gihugu aho yasimbuye Alfred Gakuba Kalisa.

Amb Gasamagera yatanze izo mpapuro kuri uyu wa 16 Ukwakira 2019 muri Perezidansi y’icyo gihugu, Cidade Alta, iherereye mu murwa mukuru Luanda.

Uyu muhango wari witabiriwe n’abayobozi batandukanye b’iki gihugu barimo Minisitiri w’Ububanyi n’Amahanga wacyo, abanyamabanga ba Leta n’abandi bayobozi muri Perezidansi hamwe n’abadipolomate b’u Rwanda muri icyo gihugu.

Amaze gutanga impapuro zimwemerera guhagararira u Rwanda muri icyo gihugu, Amb Gasamagera yashimiye Perezida wa Angola, Lourenço ku bw’umubano w’ibihugu byombi ukomeje gutera imbere, yizeza gukomeza kuwusigasira ukarushaho kuba mwiza.

Amb Gasamagera yanashimiye kandi uburyo Angola ikomeje kugira uruhare mu kugarura amahoro mu karere k’ibiyaga bigari.

Perezida João Lourenço na we yagarutse ku mubano, ubushuti n’ubufatanye ibihugu byombi bisanganywe, yizeza ko ugomba gukomeza gusigasirwa.

U Rwanda na Angola bihuriye mu karere k’Ibiyaga bigari, bifitanye n’amasezerano y’ubufatanye mu bya dipolomasi, iby’indege, umutekano, kurwanya ibyaha no gukumira ibyateza imvururu za politiki.

Abayobozi b’ibihugu byombi basanzwe bakorana bya hafi mu gushyiraho uburyo bwafasha gushakisha no gusangira inyungu z’umubano bifitanye.

Ambasaderi Gasamagera Wellars, yashyikirije Perezida wa Angola, João Manuel Gonçalves Lourenço, impapuro zimwemerera guhagararira u Rwanda
Ambasaderi Gasamagera Wellars na Perezida João Manuel Gonçalves Lourenço wa Angola
Nyuma y'uko Amb Gasamagera atanze impapuro, abayobozi bombi bagiranye ibiganiro
Bafashe ifoto y'urwibutso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza