Amayobera ku rupfu rw’umusore wari wiyemeje gufasha FBI guta muri yombi Kabuga muri Kenya

Yanditswe na Philbert Girinema
Kuya 17 Gicurasi 2020 saa 02:24
Yasuwe :
0 0

Itabwa muri yombi rya Kabuga Félicien ryatumye abantu bagaruka ku nkuru zimaze imyaka myinshi zivugwa cyane ku rugendo rwo kumushakisha, kugeza ubwo bamwe mu bari muri uwo mugambi bishwe mu buryo butarasobanuka n’ubu.

Mu 2003, umusore w’Umunya-Kenya wari uri gufasha Urwego rw’Iperereza rwa Leta Zunze Ubumwe za Amerika FBI, mu bikorwa byo gushakisha no guta muri yombi Kabuga, yarishwe ariko bigaragazwa nk’aho yiyahuye.

Uwo musore witwa William Mwaura Munuhe yishwe hashize amasaha make nyuma y’aho Kabuga aciye mu rihumye abashinzwe umutekano bari bagose aho byavugwaga ko yagombaga guhurira n’abandi bantu mu nama mu gace ka Karen muri Kenya.

Urupfu rwa Munuhe wari ufite imyaka 27 rwagaragajwe nk’aho yishwe n’impanuka kuko aho yapfiriye hasanzwe imbabura y’amakara iri hafi y’igitanda cye, ku buryo mu gusobanura abashinzwe umutekano bagaragaje ko yishwe n’umwuka uhumanya wa Monoxyde de carbone.

Gusa nyuma byaje kugaragara ko ibi byari umukino kuko ngo yishwe arashwe mu mutwe isasu rikinjira mu gutwi. Hashize iminsi itatu apfuye, nibwo inzego zishinzwe umutekano muri Kenya zavuze ko zabonye umurambo we.

Bivugwa ko kugira ngo Kabuga amenyane na Munuhe, hari umwe mu bayobozi ba Kenya wamumumenyekanishijeho avuga ko amufasha mu bucuruzi, ariko ntabwo uyu musore yari azi aho Kabuga aba.

Munuhe ngo yaje kujya muri Ambasade ya Leta Zunze Ubumwe za Amerika atanga amakuru ko ashobora kubafasha mu gukurikirana Kabuga dore ko muri icyo gihe hari harashyizweho igihembo cya miliyoni eshanu z’amadolari ku muntu wese uzatanga amakuru y’aho aherereye.

Hari amakuru avuga ko Munuhe yagiranye inama nyinshi n’abayobozi ba Amerika ku mugambi wo kugaragaza aho Kabuga yari yihishe.

Uburyo bumwe bwonyine bwo kumugeraho, bwari ukumuhamagara akamubwira ko hari inama ijyanye na gahunda z’ubucuruzi iteganyijwe kubera mu rugo rwe ko yaza kuyitabira.

Nyuma y’aho ubuyobozi bwa Amerika bumenyeye ko uwo mugambi ushobora kubyara umusaruro, ngo bwasabye uwari Umuyobozi w’Urwego rw’Iperereza muri Polisi ya Kenya, Francis Sang, mu gitondo cyo ku wa 16 Mutarama 2003 ko yabaha abapolisi bo kubafasha muri icyo gikorwa cyo gufata Kabuga.

Abanyamerika ngo bahaye Sang amakuru make ku mugambi wabo ndetse ngo ntibatangaza uwabahaye amakuru. Sang ati “Bambwiye ko bazi ko hari ahantu Kabuga ari buze kujya mu nzu iri mu gace ka Karen ko bashakaga aba ofisiye bacu bo kubafasha muri icyo gikorwa.”

FBI yategereje umwanya munini hanze y’urwo rugo iri kumwe n’abandi bashinzwe iperereza muri Polisi ya Kenya bagera kuri 20 ariko ntibari babwiwe umuntu watanze amakuru y’uko Kabuga ari bujye aho hantu.

Bakomeje kugenzura urugo rwa Munuhe, ariko nyuma y’amasaha atandatu bahagarika ibikorwa kuko byari bigeze saa moya z’umugoroba ataragaragara.

Nyuma y’uko abashinzwe umutekano bategereje amasaha menshi bakamubura, binjiye mu rugo rwa Muhune hanyuma bagerageza guhamagara Kabuga kuri telefoni ariko ntiyitaba.

Baje kujya mu rugo bivugwa ko yabagamo basangamo urwandiko rwaturutse mu nzego z’umutekano muri Kenya ruriho ubutumwa bumuburira ko agiye gutabwa muri yombi, niko guhita nawe acika.

Abayobozi ba Amerika icyo gihe barakajwe bikomeye n’uburyo umugambi wo guta muri yombi Kabuga wamenyekanye, mu gihe gito uwo musore wari umuhuza mu mugambi wo kugera kuri Kabuga ahita yicwa.

Inzego z’iperereza muri Kenya zitangaza ko icyo gihe Kabuga yakoranaga bya hafi na bamwe mu bayobozi muri Guverinoma, gusa ntihazwi impamvu yatumye bashwana na Munuhe ku buryo byageza aho atanga Kabuga.

Bivugwa ko inzego z’umutekano muri Kenya zagize ubwoba ko Munuhe ashobora gushyira amabanga yose hanze akagaragaza uburyo abayobozi muri Guverinoma bari bafite amakuru yose y’aho Kabuga aherereye.

Sang yamagana amakuru avuga ko Munuhe yaba yaragambaniwe n’abapolisi ndetse na bamwe mu bakozi bo muri Guverinoma.

Abanyamerika ntabwo bigeze bamenya ko Munuhe yishwe, hashize iminsi ibiri bamushakisha kuri telefoni baramubura. Byaje gusaba ko abashinzwe umutekano binjira mu rugo rwe, niko kumusanga mu buriri bwe yapfuye, isura ye ihambirijwe ikiringiti.

Iruhande rwe hari imbabura ndetse n’amadirishya yose yari afunze. Icyaje kurakaza Abanyamerika ni ukuba Polisi ya Kenya yarafashe urupfu rw’uyu musore nk’urupfu rubabaje, ikintu bo bavuga ko gishobora kuba cyari gihishe undi mugambi.

Umuvandimwe wa Munuhe, Josephat Muriithi Gichuhi, muri Werurwe uyu mwaka yareze mu Rukiko rwa Nakuru avuga ko Guverinoma ya Kenya yananiwe gukora ibishoboka byose ngo hakorwe iperereza rigaragaza uko umuvandimwe we yishwe.

William Munuhe yishwe nyuma y'iminsi mike umugambi yari yaratangiye wo gufasha FBI guta muri yombi Kabuga upfubye
Iyi ni yo nzu William Munuhe yasanzwemo yapfuye mu 2003

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .