00:00:00 IGIHE NETWORK KN KINYARWANDA EN ENGLISH FR FRANCAIS

Amayeri yafashije Bavakure kurokora uruhinja rw’uwahigwaga muri Jenoside

Yanditswe na Nsanzimana Erneste
Kuya 19 Mutarama 2023 saa 05:57
Yasuwe :

Jenoside yakorewe Abatutsi yangije byinshi itwara benshi, kugeza n’ubu Abanyarwanda baracyahanganye n’ingaruka zayo. Nubwo byari ibihe bigoye hari Abanyarwanda bagize umutima ukomeye babasha kurokora bamwe mu bahigwaga.

Abo barimo Bavakure Justin wo mu Karere ka Karongi, Umurenge wa Twumba, Akagari ka Gakuta. Mu gihe cya Jenoside yakorewe Abatutsi yari umugabo w’igikwerere wari ufite imyaka 47 y’amavuko.

Ubwo yari aragiye inka ze hafi y’ahubatse Umurenge wa Twumba yumvise ijwi riva mu bihuru arebye asanga ni uruhinja rw’amezi atatu.

Ni umwana wari watawe n’umugore wakoraga mu ruganda rw’icyayi, ari kwiruka ahunga abicanyi. Bavakure yaramutoye amujyana iwe afatanya n’umugore we baramurera nubwo byari urugamba rutoroshye kuko abicanyi bamenye ayo makuru bakajya bajya iwe gushaka uwo mwana ngo bamukurikize nyina.

Mu kiganiro na IGIHE Bavakure usanzwe ari umuvumvu, yavuze ko uyu mwana yamutungishije ubuki, igikoma cy’amasaka, utunyama tw’umwijima n’imineke.

Ati “Kwari ukugenda muhisha, baza nti ‘nimwakire amafaranga mugende’. Uwo mwana hari uwo muruzi aha ngaha? Hari uwo nari mfite wundi bangana noneho tukaba ari we twerekana”.

Nubwo byari mu bihe bigoye buri wese arwana no gukiza amagara ye, Bavakure watangiye kurera abana afite imyaka 18, kugeza ubwo umwana wese wagiranaga ikibazo n’ababyeyi be yamuhungiragaho, ntibyari kumukundira kwirengagiza uwo mwana.

Ati “Nagatoraguye ari agahinja kamaze amezi atatu kavutse, nta twenda kari kambaye. Nafatanyije n’umugore wanjye turakarera karakura FARG iramfasha ariga ubu yarangije kaminuza afite akazi”.

Uyu mwana w’umukobwa ugize imyaka 28 y’amavuko avuga ko atarabohoka ku buryo yaganirira abantu inkuru ye, gusa ashimira umuryango wamutoye ukamurera.

Ubwo mu murenge wa Twumba hatangizwaga gahunda yiswe ’Mfata mu kiganza’ igamije kwimakaza umuco w’ubutore n’ubudaheranwa mu Banyarwanda, abasore n’inkumi bari ku rugerero rw’Intore z’inkomezabigwi icyiciro cya 10 basuye uyu musaza watoraguye uyu mwana kugira ngo abahe impanuro.

Uru rubyiruko ntabwo rwagiye imbokoboko ahubwo rwamushyiye ibiribwa, ibikoresho n’amatungo atatu magufi mu rwego rwo kumushimira umutima wa kimuntu yagize mu bihe byari bigoye.

Umuhoza Thérèse avuga ko igikorwa cyakozwe n’umurinzi w’igihango Bavakure cyamuteye ishyaka ryo kurinda abaturage ingengabitekerezo ya Jenoside no kuyipfobya.

Ati "Nk’uko Bavakure yabidusabye nk’Abanyarwanda dukwiye kurangwa n’urukundo, kwihangana no kubabarira kuko urukundo ni rwo rwa mbere".

Ntanamayumve Vianney yashimye uyu musaza avuga ko "Abanyarwanda ubu turi umwe dusangiye isano y’amaraso, dusangiye ubutaka, dusangiye ururimi twese turi Abanyarwanda aho tugeze ubu nta gikwiye kudutanya".

Mfitinshuti Elie, umutoza w’intore wo mu Murenge wa Twumba avuga ko mu byo gahunda ya ’Mfata mu Kiganza’ igamije harimo kwibutsa Abanyarwanda ko badakwiye kurebera mugenzi wabo uri mu bibazo ko ahubwo bafite inshingano yo kumufasha kuva muri ibyo bibazo.

Bavakure Justin n'umugore we bareze umwana w'amezi atatu watoraguwe muri Jenoside yakorewe Abatutsi
Urubyiruko rwashimiye Bavakure rumushyikiriza ibiribwa n'ibindi bikoresho
Uyu musaza yanashyikirijwe amatungo magufi yagenewe n'urubyiruko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .