00:00:00 IGIHE NETWORK KN KINYARWANDA EN ENGLISH FR FRANCAIS

Amayeri akoreshwa n’abakomisiyoneri b’ibyangombwa byo kubaka mu Mujyi wa Kigali

Yanditswe na Cyprien Niyomwungeri
Kuya 27 July 2022 saa 07:11
Yasuwe :

Kubona ibyangombwa byo kubaka, ni imwe mu ngingo ikunze kwinubirwa n’abaturage benshi hirya no hino mu gihugu, aho bamwe bavuga ko bitinda cyangwa kubibona bikagorana bigatuma hazamo na ruswa.

Ni kenshi uzumva abaturage basenyewe kuko bubatse nta byangombwa, babazwa impamvu bagasobanurirwa ko babyimwe cyangwa byatinze kuboneka bakihererana abayobozi bakaba ruswa. Hari n’aho abaturage babyihimbira bakabimanika hakorwa ubugenzuzi bagasanga ari ibihimbano.

Umujyi wa Kigali wongeraho ko hari n’abakomisiyoneri b’ibyangombwa byo kubaka basigaye batanga amakuru atari yo ku baturage bakababwira ko kugira ngo babibone basabwa gutanga akantu [ruswa].

Mu kiganiro Waramutse Rwanda cya Televiziyo y’Igihugu, Umuyobozi Mukuru Ushinzwe Igenamigambi ry’Imitunganyirize y’Umujyi, Eng. Marie Solange Muhirwa, yavuze amwe mu mayeri akoreshwa n’abakomisiyoneri b’ibyangombwa byo kubaka.

Hari abakomisiyoneri batanga amakuru atari yo n’ababeshya ko ari abakozi b’Umujyi wa Kigali ariko atari bo.

Ati “Akazana n’umukiriya agasa nk’aho yinjiye mu biro byacu ubundi agasohoka avuga ngo mvuye kukubariza…abongabo barahari rwose baba batanga amakuru atari yo bati ntutibwiriza, ntutagira ikintu utanga nta kintu bari buze kukumarira”.

Eng Muhirwa avuga ko aba bantu iyo babamenye bahita babamenyesha inzego z’igihugu z’ubugenzacyaha (RIB) zikabakurikirana.

Eng Muhirwa yahishuye ko hari n’abandi bakora imishinga isaba ibyangombwa byo kubaka, bakabeshya abakiriya babo ko bitarasohoka bityo basabwa kwishyura amafaranga runaka.

Ati “Umuntu akaba yabonye icyangombwa kuko iyo uwasabye akibonye gisohoka muri konti y’uwatanze umushinga [enjeniyeri cyangwa uwashushanyije], wa mukiriya we akamubwira ati ariko bansabye miliyoni ebyiri”.

Hari abakiriya bahita bajya kubaza Umujyi wa Kigali impamvu badahabwa icyangombwa cyo kubaka bakerekwa ko cyasohotse ahubwo ababafashije kugisaba banze kukibaha batabahaye ruswa.

Eng Muhirwa ati “Niba umuntu akubwiye ngo bagusabye amafaranga cyangwa se bagusabye ruswa, ujye uza ku kazi tuguhe amakuru ya nyayo kuko icyangombwa cyo kubaka ni ibihumbi 60Frw”.

Ku bijyanye no kuba ibyangombwa byo kubaka bitinda, Eng Muhirwa yabihakanye avuga ko nko mu mpeshyi igihe abantu basaba ari benshi bashyiraho ikimeze nk’umuganda, abakozi bagakora mu mpera z’icyumweru kugira ngo ubusabe bwose busubirizwe igihe.

Umuntu ushaka icyangombwa cyo kubaka inzu yo guturamo, iyo yujuje ibisabwa kiboneka mu minsi itarenze 15. Ibisabwa ni inyigo y’umushinga w’icyo agiye kubaka, kopi y’icyangombwa cy’ubutaka, kwerekana ko yishyuye imisoro, uko amashanyarazi azashyirwa mu nzu, uko azayobora amazi n’uko azatereka inyubako mu kibanza.

Ikindi kibazo gikunda kugaragazwa n’abaturage ni icy’amafaranga y’ibikorwaremezo acibwa abaturage, nk’aho usanga uguze ikibanza muri site runaka yakwa nk’ibihumbi 250 Frw, 300,000Frw cyangwa 400,000Frw y’amashanyarazi, amazi n’ibindi.

Umujyi wa Kigali usobanura ko ari ibintu bikorwa n’abatuye muri site kandi gitifu w’akagari abikurikirana. Hari gahunda yo gushaka aya mafaranga yajya akorerwa ubugenzuzi bw’uko akoreshwa.

Ibyangombwa byo kubaka ni imwe mu ngingo ikunze kugarukwaho n'abaturage benshi ko bibagora kubibona

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .