00:00:00 IGIHE NETWORK KN KINYARWANDA EN ENGLISH FR FRANCAIS

Amaturufu atatu ya Tshisekedi mu kwiyegereza Amerika ku bibazo bye n’u Rwanda

Yanditswe na Philbert Girinema
Kuya 28 June 2022 saa 05:11
Yasuwe :

Félix Tshisekedi akomeje gutarataza ashaka uburyo amahanga amushyigikira mu mugambi we wo kumvikanisha ko ibibazo biri mu Burasirazuba bw’igihugu cye byatewe n’u Rwanda.

Ubu amaso yayerekeje kuri Leta Zunze Ubumwe za Amerika, aho amahitamo atatu ariyo afite imbere ye. Mu myaka yashize, ubutegetsi bwa RDC bwemeje amahanga ko u Rwanda rushyigikiye M23 nayo abyemera buhumyi birangira rufatiwe ibihano.

Kuva mu mpera za 2021, birasa n’aho bigoye ngo amahanga abe yakwemera iyo mvugo, kuko igihe cyose RDC yatatse igaragaza ko yibasiwe n’u Rwanda, amahanga yayisubizaga mu bundi buryo; ko ikibazo kiri imbere mu gihugu, ariho n’umuti ukwiriye gushakirwa aho gushinja abaturanyi.

Magingo aya, Tshisekedi yasabye Amerika ubufasha mu ngingo eshatu. Iya mbere ni ukwemeza ko M23 ari umutwe w’iterabwoba, iya kabiri ko hakwiriye gutangira iperereza ku ruhare rw’u Rwanda mu kuwushyigikira mu gihe iya gatatu ari uko Amerika yongera ijisho ku bikorwa byayo bya dipolomasi mu karere k’Ibiyaga Bigari.

Izi ngingo eshatu uyu mukuru w’igihugu yazifashe nk’icyerekezo gishya kizamufasha kumvisha amahanga ko asumbirijwe n’u Rwanda. Ni mu gihe mu Burasirazuba bw’igihugu cye ibintu bikomeje kudogera.

Umujyi wa Bunagana umaze igihe kinini uri mu maboko y’umutwe wa M23. Ku rundi ruhande, hari umusirikare wa RDC wishwe agerageza kwinjira ku butaka bw’u Rwanda arasa abashinzwe umutekano.

Ni mu gihe kandi RDC yahagaritse amasezerano yayo n’u Rwanda ndetse inahagarika ibikorwa bya RwandAir. U Rwanda rwo ntirwahwemye kwamagana ibirego rushinjwa byo gukorana na M23 ahubwo rukagaragaza ko hari umubano weruye usigaye uri hagati y’Igisirikare cya FARDC n’Umutwe wa FDLR ugizwe n’abakoze Jenoside mu Rwanda.

Jeune Afrique yatangaje ko RDC iri kwifashisha abantu batandukanye n’ibigo mu kumvikanisha ibitekerezo byayo ku buyobozi bwa Amerika. Mu kubikora, yifashishije n’ubundi ibigo bimenyerewe mu kumvikanisha ibitekerezo, ibizwi nka lobbying.

Muri ibyo bigo harimo Ballard Partners yishyurwa na Leta ya RDC ibihumbi 75$ ku kwezi na Scribe Strategies and Advisors yishyurwa ibihumbi 50$ buri kwezi. Ibyo bigo biri gukora iyo byabaga ngo byumvikanishe uruhande rwa RDC ku bagize Sena ya Amerika n’abandi bayobozi.

Hashize iminsi mike Ballard Partners yoherereje email umuyobozi umwe ukomeye muri Amerika. Uwo muyobozi ni umuntu wo hafi ya Perezida wa Komisiyo ishinzwe Ububanyi n’Amahanga muri Sena, Robert Menendez.

Icyo kigo cyasabaga uwo muyobozi ubufasha mu kibazo cy’u Rwanda na RDC. Agace kamwe k’iyo email kagira kati “Nk’uko mubizi, ejo umutwe wa M23 wigaruriye Bunagana, umujyi uri ku mupaka wa RDC.” Iyo email yanditswe na John O’Hanlon ayandikiye Heather Flynn ku wa 14 Kamena.

Akomeza amubwira ko RDC ibizi neza ko M23 iri guhabwa ubufasha n’u Rwanda ndetse ko muri ibyo bikorwa hari abana bari kwicirwamo.

Ubusanzwe Ballard Partners ni ikigo kiyoborwa n’abantu bo mu ishyaka ry’aba-républicains. Kuva ku ngoma ya Trump, cyagiraga uruhare mu bikorwa bitandukanye bya politiki mpuzamahanga ya Amerika.

Mu butumwa bwe, O’Hanlon asobanura ko ari gusabira ubufasha Guverinoma ya RDC ko komisiyo y’inteko ikwiriye kwandikira inzego nkuru z’igihugu isaba ko hatangira iperereza ku ruhare rw’u Rwanda mu bibazo bya RDC. Ati “Ese birashoboka ko itangazo ryashyirwa ku karubanda? Haba hari ikindi gitekerezo ufite?”

Ntabwo ari ibintu byapfuye kwizana gusa kuba Ballard Partners yarahisemo kwiyegereza Menendez. Muri Gicurasi, uyu mugabo uhagarariye New Jersey mu nteko, yavuze ko niba Rwanda rugira uruhare mu bibazo by’umutekano muke muri RDC, ruzahura n’ingaruka zikomeye.

Ku rundi ruhande, Scribe Strategies and Advisors, yo iyoborwa na Joseph Szlavik, umwe mu bantu bahoze mu buyobozi bwa Bush. We avuga ko Amerika ikwiriye kwihutira kwemeza ko M23 ari umutwe w’iterabwoba, ndetse ko nibikorwa bizahita bigira ingaruka ku bantu bawufasha.

Ati “Ntimwibagirwe ko niba umuntu agaragaye mu bikorwa byo gukorana n’umutwe w’iterabwoba, hari amategeko, cyane cyane agendanye n’inkunga.”

Ku rundi ruhande, Peter Pham, wahoze ari Intumwa ya Amerika mu Karere k’Ibiyaga Bigari, we asobanura ko ijambo “iterabwoba” rishobora gukoreshwa, ariko gutanga ibimenyetso bisobanura ko umuntu akora iterabwoba, ari ikindi gisaba ibisobanuro.

Ibi bigo biri gusaba kandi ko Sena yakwihutisha ko Lucy Tamlyn usanzwe ari chargée d’affaire wa Amerika muri Sudani yemezwa nka Ambasaderi w’iki gihugu muri RDC. Uwari usanzwe kuri uwo mwanya we yamaze guhabwa izindi nshingano zo kuba Intumwa yihariye ya Amerika mu Ihembe rya Afurika.

Hagati aho, Amerika ntiragena ugomba kuba Ambasaderi wayo mu Rwanda, usimbura Peter Vrooman wavuye mu Rwanda muri Gashyantare akajya guhagararira igihugu cye muri Mozambique. Ubu usibye kuba Amerika nta Ambasaderi ifite mu Rwanda, ntinafite n’Intumwa yihariye mu Karere k’Ibiyaga Bigari.

Iyi foto igaragaza Perezida Félix Tshisekedi ari kumwe na Joe Biden wa Amerika yafashwe mu mwaka ushize ubwo bombi bahuriraga i Rome mu Butaliyani mu Nama ya G20

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .