00:00:00 IGIHE NETWORK KN KINYARWANDA EN ENGLISH FR FRANCAIS

Amasaha arabarirwa ku ntoki ngo abimukira bavuye mu Bwongereza bagere i Kigali

Yanditswe na Rabbi Malo Umucunguzi
Kuya 14 June 2022 saa 03:51
Yasuwe :

Umuvugizi wa Guverinoma y’u Rwanda, Yolande Makolo, yemeje ko kuri uyu wa Gatatu ari bwo indege ya mbere itwaye abimukira babaga mu Bwongereza mu buryo bunyuranyije n’amategeko, izagera mu Rwanda.

Ku wa 14 Mata 2022 ni bwo u Rwanda n’u Bwongereza byashyize umukono ku masezerano y’imyaka itanu, rwemera kwakira abimukira binjiye muri icyo gihugu mu buryo bunyuranyije n’amategeko guhera ku wa 1 Mutarama 2022.

Makolo yabwiye abanyamakuru kuri uyu wa Kabiri ati "Ejo ubwo indege ya mbere izaba igeze i Kigali, aba mbere bazahagera bazakirwa neza, bitabweho. Bazafashwa gutangira ubuzima hano, bazahabwa ubufasha nko mu gusaba ubuhungiro, harimo ubwunganizi mu mategeko n’ubusemuzi, bazahabwa aho kuba heza ndetse n’ibindi byangombwa nkenerwa."

Yavuze ko n’iyo abantu basaba ubuhungiro mu Rwanda ntibabuhabwe, hazaba hari ubundi buryo bwabafasha gutura mu Rwanda byemewe n’amategeko.

Makolo yavuze ko u Rwanda rubahaye ikaze, kandi ko aba bimukira bazaba bemerewe kuza mu Rwanda no kuhava uko babyifuza.

Yakomeje ati "Nibahitamo kuva mu Rwanda, kuko nayo ni amahitamo, tuzabafasha gusubira mu bihugu byabo cyangwa mu bindi bemerewe kubamo hakurikijwe amategeko. Turizera ko bazishimira kuba mu gihugu cyacu, bagatera ikirenge mu cy’abandi benshi bahagiriye ubuzima bwiza."

Makolo yavuze ko u Rwanda rusanganywe umutima wo gufasha ababikeneye, aho ubu rucumbikiye impunzi zisaga ibihumbi 130 zituruka mu bihugu bitandukanye.

Harimo n’abimukira bavanwa muri Libya, bahaheze bashaka kujya mu Burayi bakabura amayira. Kugeza ubu abagera ku 1000 bamaze kunyuzwa mu nkambi ya Gashora, ndetse umubare munini bamaze kubona ibindi bihugu byabakira.

U Rwanda rushaka kuba igisubizo

Makolo yavuze ko uburyo busanzweho bufasha abimukira butagikora, ahubwo bwigaruriwe n’abanyabyaha bizeza abantu ibitangaza bakabambutsa babajyana mu Burayi, babanyujije mu nzira zishyira ubuzima bwabo mu kaga.

Ati "Afurika ntabwo ari umugabane w’ibibazo gusa nk’uko ikunda kugaragazwa mu itangazamakuru, ni n’ahatu haboneka ibisubizo. Twishimiye kuba mu batanga ibisubizo muri gahunda nshya, igamije gukemura ikibazo gikomeye."

Umuvugizi wungirije wa Guverinoma y’u Rwanda, Alain Mukuralinda, yavuze ko aya masezerano azazana n’inyungu ku Rwanda itari mu mafaranga, ahubwo mu bijyanye n’ishoramari mu bushobozi bwa muntu.

Ati "Ntabwo wakwibagirwa ko umubare munini w’aba bimukira ari urubyiruko. Urubyiruko rugishoboye kuba rwakwiga amashuri atandukanye, rushobora kubaka igihugu cyarwo n’umugabane warwo. Mu mafaranga, yego nta gikorwa kibaho nta kiguzi, kandi icyo kiguzi ntabwo kizishyurwa na Guverinoma y’u Rwanda."

"Twebwe icyo dushaka ni ukubasangiza ubunararibonye dufite mu kwakira impunzi n’abimukira, mu gutabara ubuzima bwabo, kubongerera ubushobozi, kubaha ahantu bashobora kongera kubonera icyizere."

Abatishimira kuza mu Rwanda

Mu bihe bitandukanye humvikanye abantu bivugwa ko badashaka kuza mu Rwanda, kuko bageze mu Bwongereza bakeneye kujya mu Burayi, aho kuba mu gihugu kikiri mu nzira y’amajyambere nk’u Rwanda.

Umunyamabanga uhoraho muri Minisiteri ishinzwe ibikorwa by’ubutabazi, Habinshuti Philippe, yavuze ko u Rwanda rwiteguye mu buryo bwose, burimo ko aba bantu nibaza bazaganirizwa mu buryo butandukanye.

Yakomeje ati "No kudashaka kuguma mu Rwanda, bishobora no guterwa n’uko umuntu atabona impamvu. Twebwe icyo twashyizemo imbaraga nyinshi ni ukugira ngo haboneke izo mpamvu zituma umuntu abona ko bishoboka kuba yaguma mu Rwanda, akahabonera amahirwe nk’ayo bagenzi be batandukanye bagiye bahabonera - impunzi ducumbikiye yaba ziri mu nkambi zitandukanye ndetse n’iziri i Gashora."

"Ikindi ntabwo abantu bazaza hano mu Rwanda bazaba bahafungiwe. Uzaza, ni ukumusobanurira amahirwe ahari, ibiteganyijwe muri iyi gahunda y’u Rwanda n’u Bwongereza. Yabona ko bidahuye n’icyo yifuza, hazaba hari ubundi buryo bwo kuba ashobora gusubira mu gihugu cye, tukabimufashamo, ndetse no kuba yareba n’ikindi gihugu kimwemerera kuba yakijyamo, nk’uko n’izindi mpunzi dufite hano mu gihugu bigenda."

Mu bantu bakomeje kugaragaza impungenge kandi harimo n’abaryamana bahuje ibitsina.

Mukuralinda yavuze ko nta mpungenge zikwiye kubaho, kuko abantu bose bareshya imbere y’amategeko.

Ati"Ntekereza ko abafite n’icyo kibazo bashobora no kureba ijambo Perezida wa Repubulika yigeze kuvugira muri Rwanda day muri Amerika, ko ibyo bintu nta kibazo bimuteye [...] Nta tegeko dufite rivangura, nta mpungenge rero abantu ngo ni uko baba babana bahuje ibitsina , bari bakiwye kugira."

Ntabwo umubare ntakuka w’abantu bazagezwa mu Rwanda kuri uyu wa Gatatu wari watangazwa.

Gusa ubwo Urukiko rw’Ubujurire mu Bwongereza kuri uyu wa Mbere rwemezaga ko iyi gahunda ikomeza , ibinyamakuru bitandukaye byatangaje ko abantu 37 aribo bagombaga kujyana n’indege ya mbere.

Makolo yavuze ko u Rwanda rusanganywe umutima wo gufasha ababikeneye, aho ubu rucumbikiye impunzi zisaga ibihumbi 130 zituruka mu bihugu bitandukanye.
Umuvugizi wungirije wa Guverinoma y’u Rwanda, Alain Mukuralinda, yavuze ko aya masezerano azazana n’inyungu ku Rwanda itari mu mafaranga, ahubwo mu bijyanye n’ishoramari mu bushobozi bwa muntu
Habinshuti (iburyo) yavuze ko umwimukira utazishimira kuba mu Rwanda azafashwa gusubira iwabo, cyangwa kujya mu kindi gihugu kizemera kumwakira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .