Amarangamutima ni yose ku mbuga nkoranyambaga nyuma y’amafoto ya Kagame yambaye gisirikare

Yanditswe na Rabbi Malo Umucunguzi
Kuya 12 Ukuboza 2018 saa 12:51
Yasuwe :
0 0

Abakoresha imbuga nkoranyambaga zitandukanye bagaragaje imbamutima ku bwinshi, nyuma y’amafoto ya Perezida Paul Kagame yambaye impuzankano ya gisirikare, ubwo yakurikirana imyitozo ya gisirikare.

Perezida Kagame akaba n’Umugaba w’Ikirenga w’Ingabo z’u Rwanda, yambaye iyi mpuzankano ubwo kuri uyu wa Kabiri tariki 11 Ukuboza 2018 hasozwaga imyitozo Ingabo zigize Diviziyo ya gatatu ikorera mu Burengerazuba bw’u Rwanda zari zimazemo amezi atatu. Yahawe izina rya ‘Exercise Hard Punch III FTX 2018’.

Ni ibyishimo byubakiwe ku gutungurwa kwa bamwe bari bataramubona yambaye gisirikare, cyangwa abamubonye ariko babiheruka mu myaka isaga 17 ishize, kuko ubuzima bw’igisirikare atakomeje kubugaragaramo cyane nyuma y’umwaka wa 2000 amaze kuba Perezida wa Repubulika.

Gusa ibyo ntibyakuragaho amateka ye nk’umusirikare mukuru, wayoboye urugamba rwo kubohora igihugu. Mu gihe ibintu byasaga n’ibigiye kuyoberana urugamba rugitangira ndetse abari baruyoboye bamaze kwicwa, Kagame wari mu masomo muri Amerika yasize byose, asanga abandi basirikare ku rugamba. Kuwa 20 Ukwakira 1990 nibwo yabagezeho.

Icyo gihe imyiteguro y’urugamba yahise isubukurwa n’imyitozo ku basore n’inkumi binjiraga mu ngabo z’Inkotanyi ihabwa imbaraga, ashyira ibintu byose ku murongo, akoranya abashyigikiraga urugamba, azana ibikoresho bishya bya gisirikare n’ibyo kurya, ahindura n’uburyo bw’imirwanire. Kugeza kuwa 4 Nyakanga 1994, igihugu cyose cyari cyabohowe, Jenoside yahagaritswe.

Mu bagarutse ku mafoto ya Perezida Paul Kagame, Juru Abdoul yagaragaje uburyo Perezida Kagame aberewe n’imyenda ya gisirikare, ati “Niwe Perezida igihugu cyacu gikwiye.”

Albert Rudatsimburwa we yagarutse ku butumwa bwa Perezida Paul Kagame mu Ukuboza 2012, ubwo hizihizwaga isabukuru y’myaka 25 y’Umuryango FPR Inkotanyi, muri Stade Amahoro.

Icyo gihe yagize ati “Turacyari babandi bashobora kujya mu ndake bakarwanira ukuri, bakarwanya akarengane, bakarwanira agaciro k’igihugu cyacu."

Dr Kayumba Christopher we yifashishije inyandiko y’ikinyamakuru The Economist yo ku wa 15 Nyakanga 2017.

Igira iti “Biragoye gutekereza ko hari undi muyobozi watsinze intambara nyinshi, ahanganye n’abanzi bakomeye kuriya, akoresheje ingengo y’imari nto kuriya. Kagame ashobora kuba ari we mujenerali w’umunyabigwi ukiriho.”

Arthur Assimwe uyobora Ikigo cy’Igihugu cy’Itangazamakuru (RBA) we yagaragaje ko Perezida Paul Kagame “aberewe no kwitwa Umugaba w’Ikirenga w’Ingabo z’u Rwanda.”

Uwitwa Emmy we yagize ati “Mwakoze cyane muzehe wacu, kugaragariza aba basore n’inkumi ko bibaye ngombwa mwakongera mukambarira urugamba! Ntituzabatenguha.”

Undi we yagize ati “Wouaw! mbega byiza kubona muzehe wacu yambaye umwenda mwiza wa gisirikare! Urabereweeee.”

Ni ku nshuro ya gatatu iyo myitozo ibaye. Iya mbere yabaye ku wa 5 Ugushyingo 2016, iy’umwaka ushize iba ku wa 10 Ugushyingo 2017.

Abantu benshi bahise bashyira ifoto ya Perezida Kagame kuri 'status' za WhatsApp

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza