00:00:00 IGIHE NETWORK KN KINYARWANDA EN ENGLISH FR FRANCAIS

Amakoperative y’ubuhinzi yagaragaje ibibazo biyatera ibihombo

Yanditswe na Hakizimana Jean Paul
Kuya 30 Ugushyingo 2021 saa 10:55
Yasuwe :

Abayobozi b’amakoperative y’abahinzi b’ibigori n’ibishyimbo mu Ntara y’Iburasirazuba, bagaragaje ko bakigorwa no kubona umuguzi wizewe bagurishaho umusaruro wabo, nyuma y’aho bamwe bakunze kubambura abandi bagatinda kubishyura, byose bikagira ingaruka ku muhinzi.

Ibi babigaragaje kuri uyu wa Kabiri tariki ya 30 Ugushyingo 2021, mu nama yateguwe n’ihuriro ry’amakoperative y’ubuhinzi, ibigo by’ubwishingizi, ibigo by’imari, abaguzi b’umusaruro n’abatanga inyongeramusaruro, FAtMA (Farm to Market Alliance).

Iyi nama ikaba yari igamije kurebera hamwe uko umusaruro wo mu gihembwe gishize wagenze n’uburyo amakoperative y’ubuhinzi n’ababagurira umusaruro bahuriza hamwe imbaraga.

Hagaragajwe ko mu Ntara y’Iburasirazuba mu gihembwe gishize hagurishijwe toni 9 212 zifite agaciro ka miliyari 1,9 Frw. Abayobozi b’amakoperative bagaragaje ko hari abaguzi batababereye inyangamugayo aho bamwe babambuye abandi batinda kubaha amafaranga, biteza igihombo ku muhinzi.

Umuyobozi wa Koperative KAKI ikorera Murenge wa Kirehe mu Karere ka Kirehe, yavuze ko mu ntangiriro z’igihembwe cy’ihinga gishize bakiriye abantu baturutse mu kigo kimwe cyavugaga ko gishaka umusaruro w’abahinzi bose.

Ati “Hafi ya koperative zose zo muri Kirehe basinyanye amasezerano, hanyuma umusaruro ubonetse turabahamagara batubwira ko bazaza twongeye dusanga na telefoni zabo zavuyeho, twasabaga rero iri huriro kujya bashishoza bakatuzanira abaguzi bavugisha ukuri aho kutuzanira abatekamutwe.”

Umuyobozi wa Koperative COPOMOJA y’abahinzi bo mu Murenge wa Jarama, Ruganintwari Martin, we yavuze ko ihuriro ry’amakoperative rikwiriye kubafasha gukemura ikibazo bagiranye n’umuguzi witwa SAIC wabambuye arenga miliyari 4 Frw

Ati “Twifuzaga ko nibura abaguzi babona bafite gahunda bajya babanza gutanga amafaranga make mbere (avance) kugira ngo nka koperative natwe tudahomba, hari ubwo haza abaguzi tuzi ko bizewe bakatwambura tukabura naho tubabariza, nka SAIC yaratwambuye tunagerageje gukurikirana batubwira ko itagikorera mu Rwanda.”

Uwizeye Bellange uri mu bayobozi b’ihuriro ry’amakoperative, yavuze ko bari kugerageza gukemura ibibazo byose byagaragajwe n’amakoperative, birimo iby’ubwambuzi, gutinda kwishyurwa n’ibindi.

Ku kibazo cyo gutinda kwishyurwa, yagize ati “Hari ubwo ubaza umuguzi akakubwira ko wenda batinze gutanga impapuro zishyuza, hari nubwo umuguzi akubwira ko yakiriye ibigori byinshi atagombaga kwakira bimusaba gushaka amafaranga kuri bank biratinda, ariko si ikibazo gikunze kugaragara cyane n’abatinze kwishyurwa barishyuwe.”

Kuri ubu ihuriro rya FAtMA riri gukorera mu turere 27 rikaba ryaratangiye mu mwaka wa 2016, ribarizwamo koperative 343 zo mu gihugu hose harimo 109 zo mu Burasirazuba.

Amakoperative y'ubuhinzi yagaragaje ibibazo biyatera ibihombo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .