Amakamyo 1000 y’ibicuruzwa bigenewe u Rwanda yaheze muri Tanzania; hakomeje ibiganiro

Yanditswe na Philbert Girinema
Kuya 15 Gicurasi 2020 saa 04:08
Yasuwe :
0 0

Minisitiri w’Ububanyi n’Amahanga, Dr Vincent Biruta, yavuze ko u Rwanda na Tanzania bikomeje ibiganiro bigamije gukemura ibibazo byagiye biba ku bashoferi batwara imizigo, aho imodoka zirenga 1000 zipakiye imizigo ije mu Rwanda zaheze muri Tanzania.

Kuva tariki ya 04 Gicurasi, abashoferi bo muri Tanzania barigaragambije babuza imodoka zigana mu Rwanda kurenga ahitwa Benako. Imvano y’iyi myigaragambyo ni uko u Rwanda rwateguye uburyo abashoferi b’amakamyo baturuka hanze bajya bagarukira ku mupaka ntibagere mu gihugu, imodoka zabo zigatwarwa n’abandi bakazigeza aho zipakururira.

Izi ngamba zafashwe nyuma y’uko ubwiyongere bw’abanduye Coronavirus mu batwara amakamyo n’ababafasha bukomeje kuzamuka yaba mu Rwanda no muri Afurika y’Iburasirazuba yose. Gusa abanya-Tanzania ntabwo bigeze babyishimira.

Bahise birara mu banyarwanda, batangira kubahohotera babakubita ku buryo byabaye ngombwa ko basubira inyuma ku ruhande rw’u Rwanda kuko batari bagishoboye gukomeza muri Tanzania.

Kugeza ubu, hari imodoka zirenga 1000 zaheze ahitwa Benako zibura uko zikomeza urugendo ngo zizane ibicuruzwa mu Rwanda. Ni imodoka zitwaye ibicuruzwa birimo ibishobora kwangirika ku buryo bitazongera gukoreshwa n’ibindi bikenewe ku isoko ry’u Rwanda, ku buryo bishobora kugira ingaruka ku bucuruzi bw’ibihugu.

Inama ya kabiri ihuje abaminisitiri b’ibihugu byombi iteganyijwe kuri uyu wa Gatanu nyuma y’aho hafashwe ingamba zirimo kuba abashoferi bazajya batarenga ku mipaka y’ibihugu ahubwo imodoka zikinjizwa n’abandi mu kwirinda ikwirakwira ry’iki cyorezo. Ikindi ni uko imodoka ziherekezwa n’abashinzwe umutekano zikinjira mu gihugu cyane ku zidashobora kuba zapakururirwa ku mupaka.

Dr Biruta yavuze ko hari ibitekerezo u Rwanda rwashyikirije Tanzania kuri izi ngingo ebyiri, ndetse ko hagomba gufatwa umwanzuro mu nama iteganyijwe.

Ati “Ni ukuri ko hari ibicuruzwa byaheze ahitwa Benako kuko guhera mu minsi ishize, hari abashoferi bigaragambije bagafunga umuhanda wa Dar es Salaam – Kigali, turizera ko kuri iki gicamunsi turi bufate umwanzuro.”

Dr Biruta avuga hari icyizere ko ibiganiro biza gutanga umusaruro kuko yaba impande zombi zabihomberamo mu gihe nta mwanzuro.

U Rwanda na Tanzania binyuze muri RwandAir biherutse kugirana amasezerano yo gutwara amafi yo muri iki gihugu cy’igituranyi akajyanwa mu bihugu by’u Burayi. Dr Bivuta avuga ko ari ikimenyetso kigaragaza ko nubwo habaye ibibazo ibicuruzwa byo mu Rwanda bikabura uko byinjira mu gihugu, bitigeze bihungabanya imikoranire n’ubufatanye.

Hatangiye gutekerezwa n’ubundi buryo bushobora kuzifashishwa mu gihe kiri imbere ku buryo ibicuruzwa bitazongera kubura inzira. Mu mishinga ihari harimo uwo kuvana ibicuruzwa ku cyambu cya Mombasa muri Kenya bikagera Naivasha bitwawe na Gari ya Moshi aho u Rwanda rufite ubutaka bungana na hegitari 20 akaba ariho amakamyo ajya kubikura.

Magingo aya, ibicuruzwa bikeneye gupakururwa imodoka zibanza guterwa imiti, bigapakururwa hakaza izindi modoka zijya kubitunda zibijyana i Kigali n’ahandi. Niba ikamyo igomba gusubira i Dar es Salaam kuzana ibindi bicuruzwa, ikatira ku mupaka n’umushoferi wayo itinjiye mu gihugu.

U Rwanda kandi rwemeye ko uretse kuba abashoferi bategereje imodoka zabo bashyirwa ahantu hamwe hagenwe, ababishaka bashobora gusubira muri Tanzania, imodoka zabo zahindukira bakajya kuzifata.

Ku modoka zinyura mu Rwanda zigiye mu bihugu by’abaturanyi nka RDC cyangwa u Burundi, polisi iraziherekeza ikazivana ku mupaka kugeza zigeze aho zijya.

Minisitiri w'Ububanyi n'Amahanga w'u Rwanda, Dr Vincent Biruta, yatangaje ko u Rwanda rukomeje ibiganiro na Tanzania mu gukemura ikibazo cy'abashoferi babuze uko bambutsa imizigo yabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .