Amajyepfo ku isonga mu gutanga Mutuelle de Santé ya 2020/21, Kigali yo iri inyuma

Yanditswe na Niyitanga Jean Paul
Kuya 24 Ukwakira 2020 saa 10:20
Yasuwe :
0 0

Ubuyobozi bw’Ikigo cy’Ubwiteganyirize mu Rwanda (RSSB) bwatangaje ko ubwitabire bwo kwishyura umusanzu w’ubwisungane mu kwivuza, Mutuelle de Santé, muri uyu mwaka wa 2020/2021 buri imbere y’ubwo mu mwaka ushize aho Intara y’Amajyepfo ariyo iza imbere mu kwitabira kurusha izindi.

Kuri uyu wa Gatanu, RSSB yatangaje ko ubwitabire mu kwishyura Mutuelle de Santé y’umwaka wa 2020/2021 ku rwego rw’igihugu bugeze kuri 80,82%.

Umuyobozi muri RSSB ushinzwe ubukangurambaga no kwandika abanyamuryango bashya mu Ishami rya Mutuelle de Santé, Ntigurirwa Deogratias, yabwiye IGIHE ko mu kwezi nk’uku mu mwaka ushize wa Mutuelle de Santé, abari bamaze kwishyura ubwisungane banganaga na 75,6% ku rwego rw’igihugu.

Ati “Ubundi twifuza ko bigera ku 100%, ubu rero ntabwo ari 100% ariko na none ugereranyije n’umwaka washize turi imbere [...] mu mwaka ushize (mu kwezi nk’uku) twari turi kuri 75,6%.”

Imibare yatangajwe na RSSB iragaragaza ko Intara y’Amajyepfo ari yo ibimburira izindi mu bwitabire aho iri ku ijanisha rya 84.9, Amajyaruguru agakurikiraho ku ijanisha rya 81.3, Intara y’Uburasirazuba iri ku ijanisha rya 78.1 mu gihe Uburengerazuba buri ku ijanisha rya 74.1. Umujyi wa Kigali wo uri inyuma na 67.3%.

Uturere dutanu twa mbere mu gihugu mu gutanga ubwisungane mu kwivuza ni Gisagara igeze kuri 92,11%, Gakenke kuri 90,36% 3, Nyaruguru kuri 89,48%, Nyamagabe kuri 87,72 % na Ruhango igeze kuri 86,95%.

Ni mu gihe uturere turi ku myanya y’inyuma tubimburiwe na Kicukiro iri kuri 62,04% hagakurikiraho Rutsiro na 70,69%, Nyarugenge na 71,07 %, Gasabo kuri 72,37% na Nyagatare igeze kuri 75,44%.

Ntigurirwa yasobanuye ko kugeza ubu bataramenya impamvu yaba ituma Umujyi wa Kigali ari wo uza inyuma mu gutanga ubwisungane mu kwivuza ariko ko bateganya gukora ubushakashatsi bakamenya impamvu.

Ati “Tuzakora ubushakashatsi tumenye impamvu uturere tw’Umujyi wa Kigali tuza inyuma mu gutanga Mituweli. Ubu sinamenya impamvu ariko muri gahunda tubifitemo. Nitumara gukora ubwo bushakashatsi tuzamenya impamvu ibitera.”

Mu myaka yashize abatindaga kwishyura ubwisungane mu kwivuza bahanishwaga kumara ukwezi batayivurizaho nyuma yo kuyitanga. Kuri ubu ibi bihano byakuweho kandi RSSB yavuze ko nta ngaruka zo kwirara byateje kuko imibare y’abishyura yazamutse ugereranyije n’igihe ibyo bihano byari bikiriho.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .