00:00:00 IGIHE NETWORK KN KINYARWANDA EN ENGLISH FR FRANCAIS

Amajyepfo: Guverineri Kayitesi yasuye abagizweho ingaruka n’igitero cyagabwe muri Nyungwe

Yanditswe na Akayezu Jean de Dieu
Kuya 19 June 2022 saa 08:54
Yasuwe :

Guverineri w’Intara y’Amajyepfo, Kayitesi Alice kuri iki Cyumweru, tariki 19 Kamena 2022, yasuye mu bitaro abagizweho ingaruka n’ubugizi bwa nabi bwabereye mu ishyamba rya Nyungwe, bukozwe n’abo bikekwa ko ari abo mu Mutwe w’Iterabwoba wa FLN.

Ku gicamunsi cyo ku wa Gatandatu, tariki ya 18 Kamena 2022, ahagana saa Munani, abagizi ba nabi bitwaje intwaro bikekwa ko ari abo muri FLN baturutse hakurya y’Umupaka, barashe ku modoka itwara abagenzi mu Murenge wa Kitabi mu Karere ka Nyamagabe, yerekezaga mu Karere ka Rusizi.

Itangazo rya Polisi y’Igihugu rivuga ko iki gikorwa cy’ubugizi bwa nabi cyaguyemo abantu ako kanya mu gihe, abandi batandatu bakomeretse bikomeye cyane aho bahise bajyanwa mu bitaro.

Harimo abantu batanu barwariye mu bitaro bya kaminuza bya Butare, CHUB, aho abaganga bemeza ko bazakira hagendewe ku buryo bameze kuri ubu. Ni mu gihe undi urembye cyane yoherejwe muri CHUK.

Abari mu bitaro baganiriye na RBA, bashimye ubufasha bw’ibanze bahawe na leta bakaba barimo kwitabwaho n’abaganga.

Umwe yagize ati “Batwitayeho, isasu ryari rindimo barikuyemo, turashima leta cyane. Ibyo ikoze igaragaje ko yita ku baturage cyane.”

Undi yagize ati “Bemeye kudufasha, ndabona batwakiriye neza kandi n’ikigo dukorera gikomeje kudufasha.”

Kuri iki Cyumweru nibwo Guverineri w’Intara y’Amajyepfo, Kayitesi Alice yasuye aba baturage barwariye mu bitaro aho yari abashyiriye ubutumwa bw’ihumure, kubihanganisha no kubabwira ko Guverinoma y’u Rwanda iri kumwe na bo.

Ati “Guverinoma y’u Rwanda yihanganishije abagiriye ikibazo muri buriya bugizi bwa nabi [….] twabasuye barimo kwitabwaho n’abaganga, ikindi ni ugukomeza kubwira abaturage be gucikamo igikuba, be kugira ubwoba, bahumure, umutekano w’igihugu urarinzwe ndetse n’abakoze ubu bugizi bwa nabi barakomeza gukurikiranwa, abazafatwa bahanwe n’amategeko.”

Guverineri Kayitesi yavuze ko abagize ikibazo cyo gukomereka, leta ikomeza kubafasha n’imiryango yabo ndetse no mu gushyingura abantu babiri bapfiriye muri iki gitero.

Ati “Turasaba abaturage gukomeza ibikorwa byabo by’iterambere, ntibahungabane. Ikindi ni uko ari imiryango yabuze ababo n’abakomerekeyemo barakomeza gufashwa na leta no gukomeza guherekeza abo babiri babuze ubuzima bwabo.”


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .