Amajyepfo: Gisagara yaje ku isonga mu kurwanya ruswa, Nyamagabe iba iya nyuma

Yanditswe na Prudence Kwizera
Kuya 26 Ugushyingo 2019 saa 08:35
Yasuwe :
0 0

Urwego rw’Umuvunyi rwashyikirije Akarere ka Gisagara igikombe nk’akabaye aka mbere mu bikorwa byo kurwanya ruswa no kuyikumira, naho Nyamagabe iza ku mwanya wa nyuma isabwa kwisubiraho.

Byatangajwe kuri uyu wa Kabiri ubwo habaga ibikorwa byo mu cyumweru cyo kurwanya ruswa ku rwego rw’Intara y’Amajyepfo, byabereye mu mu Murenge wa Mbazi mu Karere ka Huye.

Umuvunyi wungirije ushinzwe gukumira no kurwanya ruswa, Musangabatware Clément, yagaragaje uko inama Ngishwanama zo mu turere two mu Ntara y’Amajyepfo zakoze ibikorwa bigamije gukumira no kurwanya ruswa.

Yasobanuye ko hakozwe isuzuma mu turere hagamijwe kureba ibyo Inama Ngishwanama zakoze n’uburyo zikurikirana imikorere y’Inama Ngishwanama ku mirenge n’utugari, bigaragara ko kuva muri Mutarama kugeza mu Ukwakira 2019, Akarere ka Gisagara kaje ku isonga n’amanota 89.5%.

Yavuze ko muri Gisagara hahanzwe udushya turimo gushyiraho imboni yo kurwanya ruswa n’akarengane muri buri mudugudu, gushyira inyandiko ziriho ubutumwa bwo gukumira no kurwanya ruswa ku nyubako y’Akarere n’imirenge ndetse hakozwe amarushanywa y’umupira w’amaguru mu rwego rwo gutanga ubutumwa bwo kurwanya ruswa n’akarengane.

Muri Gisagara kandi hakozwe ubushakashatsi kuri ruswa n’akarengane, ibiganiro n’abayobozi b’amashuri ku ruhare rw’abarezi mu gutoza abo barera ko kizira gutanga cyangwa gusaba ruswa ndetse no kurenganya umuntu, mu mashuri yisumbuye hashyirwaho amatsinda yo kurwanya ruswa (Anti-Corruption Clubs).

Akarere ka Nyamagabe kaje ku mwanya wa nyuma n’amanota 10 kubera ko Inama Ngishwanama nta bikorwa bifatika yagaragaje.

Musangabatware yavuze ko Akarere ka Nyamagabe nta raporo n’imwe kigeze gatanga muri eshatu kasabwaga, kuko ubusanzwe buri gihembwe hatangwa imwe.

Uko uturere two mu Majyepfo twakurikiranye:

Akarere ka Gisagara kabaye aka mbere n’amanota 89.5%, Ruhango iba iya kabiri n’amanota 87%, aka gatatu ni Nyanza n’amanota 81.5% naho Kamonyi ni iya kane n’amanota 71%.

Muhanga yabaye iya gatanu n’amanota 65.5%, Huye iba iya gatandatu n’amanota 61.5% naho Nyaruguru iba iya karindwi na 23.5% mu gihe Nyamagabe yabaye iya nyuma n’amanota 10%.

Umuyobozi w’Akarere ka Gisagara, Rutaburingoga Jerome, yavuze igikombe bahawe kibongereye imbagara mu byo bakora.

Ati “Igikombe duhawe ni imbaraga twongerewe mu bikorwa dukora byo gukumira no kurwanya ruswa n’akarengane. Tugiye gukomeza gukora cyane tugume ku mwanya wa mbere.”

Umuvunyi Mukuru, Murekezi Anastase, yashimye Akarere ka Gisagara ku bikorwa byiza kagaragaje, agasaba gukomerezaho naho uturere twaje inyuma adusaba kwisubiraho.

Yagize ati “Akarere ka Gisagara kabaye aka mbere turagashima cyane kimwe n’aka Ruhango kabaye aka kabiri, ariko tukaba tugaya Akarere ka Nyamagabe kabonye amanota 10% gusa n’aka Nyaruguru kabonye 23% gusa.”

Murekezi yavuze ko kuba Nyamagabe na Nyaruguru ari two turere twaje ku mwanya wa nyuma bishoboka ko ari na ho hari ruswa nyinshi.

Ati “Ubwo rero bivuga ko ruswa ishobora kuba ihari nyinshi kurusha mu turere twahagurukiye kuyikumira no kuyirwanya.”

Yavuze ko ibipimo by’Umuryango Mpuzamahanga urwanya ruswa n’akarengane; Transparency International Rwanda, bigaragaza ko aho badafite umurego mu kurwanya ruswa ari na ho igaragara ari nyinshi.

Yatanze urugero kuri Nyamagabe yabaye iya nyuma mu Majyepfo avuga ko mu minsi ishize hafatiwe abantu benshi barimo n’abayobozi baryaga ruswa harimo n’ababifungiwe.

Ati “Ntabwo rero bitangaje ko Nyamagabe yaba iya nyuma mu Ntara y’Amajyepfo mu byerekeye kurwanya ruswa ukurikije icyo cyaha cya ruswa uko twakihabonye.”

Icyumweru cyahariwe ibikorwa byo kurwanya ruswa cyatangiye tariki ya 17 Ugushyingo kizasozwa ku ya 9 Ukuboza 2019.

Abaturage bishimiye ibikorwa byashyizweho n'ingamba mu gukumira no kurwanya ruswa
Abayobozi ku nzego zitandukanye bitabiriye ibikorwa by'icyumweru cyo kurwanya ruswa mu Ntara y'Amajyepfo
Abayobozi ku nzego zitandukanye n'abaturage bitabiriye urugendo rwo kurwanya no gukumira ruswa
Bamwe mu baturage bitabiriye ibikorwa by'icyumweru cyo kurwanya ruswa
Bamwe mu batuye mu Karere ka Huye bitabiriye ibikorwa by'icyumweru cyo kurwanya ruswa
Guverineri w'Intara y'Amajyepfo CG Gasana Emmanuel yavuze ko bazakomeza gushyira imbaraga mu bikorwa bikumira ruswa n'akarengane
Hakozwe urugendo rwo gukumira no kurwanya ruswa n'akarengane
Ibikorwa byo mu cyumweru cyo kurwanya ruswa ku rwego rw'Intara y'Amajyepfo byabereye mu Murenge wa Mbazi mu Karere ka Huye kuri uyu wa Kabiri
Umuvunyi Mukuru Murekezi Anastase yashimye Akarere ka Gisagara kaje ku isonga naho uturere twaje inyuma adusaba kwisubiraho
Umuvunyi wungirije ushinzwe gukumira no kurwanya ruswa, Musangabatware Clément, agaragaza uko uturere two mu Majyepfo twitwaye mu bikorwa bikumira ruswa
Umuyobozi w'Akarere ka Gisagara Rutaburingoga Jerome ashyikirizwa igikombe
Umuyobozi w'Akarere ka Gisagara Rutaburingoga Jerome yavuze ko igikombe bahawe kibongereye imbagara mu byo bakora
Umuyobozi w Akarere ka Huye Sebutege Ange atanga ikaze ku bayobozi n'abaturage baje mu bikorwa by'icyumweru cyo kurwanya ruswa

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .