Amajyaruguru: RRA yashimiye abasora barengeje 14% ku misoro yagombaga kwinjira mu 2018/19

Yanditswe na Twarabanye Venuste
Kuya 6 Ugushyingo 2019 saa 06:21
Yasuwe :
0 0

Ikigo cy’imisoro n’amahoro (RRA) cyashimiye abasora bo mu Ntara y’Amajyaruguru bagize uruhare rwatumye iyo Ntara irenza 14% ku misoro y’imbere mu gihugu yari yarateganyije kwinjiza mu 2018/19.

Intara y’Amajyaruguru yinjije imisoro y’imbere mu gihugu ingana na miliyari 20.7 Frw ku ntego ya miliyari 18.15 Frw yari ifite. Ni ukuvuga ko imisoro yinjiye yazamutse ku gipimo cya 114%, iyagombaga kwinjira irengaho miliyari 2.55 Frw zingana na 14%.

Imisoro yinjiye yarenzeho miliyari 3.7 Frw, ugereranyije n’umwaka ushize wa 2017/18.

Komiseri mukuru wungirije wa RRA, Kanyangeyo Agnes yashimangiye ko iryo zamuka rishingiye mbere na mbere ku bukungu bw’u Rwanda buhagaze neza.

Hari kandi korohereza abacuruzi mu bucuruzi bwambukiranya imipaka, ikoranabuhanga muri serivisi zirebana n’imisoro ndetse n’uruhare rwa Guverinoma mu gushyigikira gahunda zo gukusanya imisoro.

Yakomoje ku munsi wo gushimira abasora, abwira abo mu Ntara y’Amajyaruguru ko uba ugamije kubagaragariza ibyo bagizemo uruhare uko bingana no gushimira abafatanyabikorwa bose.

Mu bibazo bikibangamiye urwego rwo kwinjiza imisoro n’amahoro barimo bandika igiciro gito ku bicuruzwa bacuruje, magendu, n’abadakoresha ikoranabuhanga rya EBM, yavuze ko hari ingamba bagifatiye mu rwego rw’imikoranire n’abasora.

Ati "Twafashe ingamba dukorana n’abikorera bakatubwira impamvu, tukahava dufashe ingamba, tukazanagaruka gusuzuma."

Abasora bo mu Ntara y’Amajyaruguru basabwe kugira ubufatanye n’ikigo cy’imisoro n’amahoro mu kurwanya magendu no kwibuka gutanga inyemezabwishyu ya EBM.

Mu ngengo y’imari ya 2019/20 amafaranga yose ateganyijwe kwinjira aragera kuri miliyari 2,876.2 Frw, azaba yiyongereyeho miliyari 291.7 ugereranyije na miliyari 2,585.2 zari mu ngengo y’imari ivuguruye ya 2018/19.

Intara y’Amajyaruguru itegerejweho kwinjiza imisoro y’imbere mu gihugu ingana na miliyari 23.3 Frw mu 2019/20.

Guverineri Gatabazi Jean Marie Vianney yibukije ko imishinga minini igihugu kiri gukora mu Ntara y’Amajyaruguru ari uruhare rw’abasora, bityo ko ntawe ukwiye gushyigikira ko u Rwanda rwava kuri uwo muvuduko.

Ati "Twemera tudashidikanya ko dufatanyije twagera ku bukire kandi vuba [...] dukwiriye kuzamuka ku buryo tudafite inguzanyo z’amahanga twakomeza kubaho. Abageze mu mahanga umuco mwahabonye mukwiye kuwusangiza abandi, ntabwo mu mahanga umuntu akubaza niba ushaka inyemezabwishyu, kuyikora ni umuco."

Yavuze ko mu bukangurambaga bagomba gukora harimo kumvisha abacuruzi ko bakwiye gukora EBM batagambiriye ko uwishyuye ayijyana, ahubwo akazirikana ko ari amafaranga yinjira mu isanduku ya leta.

Guverineri Gatabazi yibukije ko umuhanda Base-Gicumbi uzakomeza ugana Rukomo-Nyagatare, uzatwara miliyari 60 Frw ari uruhare rw’abasora.

Imidugudu y’icyitegererezo, ibitaro bya Gatonde, imiyoboro y’amazi izakura Gicumbi kuri 50% y’abaturage bari bafite amazi mu 2017 bakagera kuri 80% nabyo ngo bakwiye gutera imbaraga abasora mu rugendo rw’igihugu rwo kwigira.

Abasora bashimiwe ni Mulindi Factory Company Ltd, La Palme Hotel Ltd, Gorilla Investment Company, GOICO Ltd, Cetraf Ltd, Entreka Ltd, Muhabura integrated Polytechnic college, Base company Ltd, Innopro Ltd, Gakenke general construction Ltd, Ecole secondaire Gahunga, Mukarukundo Jeanne, Mayogi coffee cooperative, Munyaneza Eugene, Mukasheri Antoinette na Kabarira Jean Damascene.

Ibikorwa byo gushimira abasora mu gihugu hose bizasozwa no gushimira abasora ku rwego rw’igihugu uzaba ku wa 22 Ugushyingo

Abasora bo mu Ntara y'Amajyaruguru bashimiwe barimo ibigo, amahoteri, inganda n'abantu ku giti cyabo
Abihayimana ni bamwe mu bitabiriye umunsi wo gushimira abasora mu Ntara y'Amajyaruguru
Base Company Ltd yashimiwe kwishyura umusoro ku gihe
Mayogi coffee Cooperative ifite icyayi cyiza ku rwego mpuzamahanga nayo yashimiwe kubera gutanga imisoro neza
Sina Gerard ni umwe mu basora bo mu Ntara y'Amajyaruguru, by'umwihariko mu Karere ka Rulindo ahabereye iki gikorwa
Umukozi wa La Palme Hotel Mudahigwa François yakira igihembo cy'usora mwiza
Guverineri Gatabazi yasabye abaturage b'iyi Ntara guharanira gusora neza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza