Ni uruzinduko rwasize iki gihugu gisinyanye n’u Rwanda amasezerano y’ubufatanye mu by’ubucuruzi n’ishoramari kandi hari n’amahirwe y’uko bishobora no gufatanya mu zindi nzego zirimo umukino wa Cricket na Tennis, urw’ubuhinzi by’umwihariko ubw’imboga, imbuto n’indabo.

Mu ijoro ryo ku wa 16 Mata 2022 nibwo Perezida Kagame yageze muri Barbados. Akigera muri iki gihugu yakiriwe n’abayobozi barimo Minisitiri w’Ububanyi n’Amahanga wa Barbados unashinzwe ubucuruzi mpuzamahanga, Jerome Xavier Walcott.

Nyuma yo kugera muri iki gihugu, Perezida Kagame yagiranye ibiganiro na Minisitiri w’Intebe, Mia Amor Mottley ndetse na Perezida w’iki gihugu, Sandra Mason.

Perezida Kagame yashimye urugwiro we n’itsinda bari kumwe bakiranywe yongeraho ko nubwo hagati y’ibihugu harimo intera ndende bifite ingorane bihanganye na zo n’inararibonye bishobora gusangira mu kubikemura.

Yavuze ko impande zombi zigiye kureba uburyo ibihugu byombi byakwagura imikoranire hagati yabyo kuri ubu u Rwanda rukaba rwiteguye kwakira Minisitiri w’Intebe ubwo azaba yitabiriye inama ya CHOGM izabera i Kigali muri Kamena uyu mwaka.

Minisitiri w’Intebe, Mia Amor Mottley, yashimye imiyoborere ya Perezida Kagame avuga ko urugero rw’uko mu myaka 20 ishize u Rwanda rwivanye mu ngorane zikomeye rwabateye akanyabugabo muri iki kinyejana cya 21 ku mahirwe y’iterambere ashobora kugerwaho mu gihe igihugu cyaba gifite igenamigambi rihamye rya porogaramu z’iterambere kandi kikazishyira mu bikorwa.

Ati “Ubuyobozi bwawe bwafashije u Rwanda kuba inyenyeri imurika ku isi mu kugaragaza ibishoboka mu rwego rw’iterambere. Ntabwo ari ku bw’impanuka kuba warayoboye komisiyo ya Loni y’umuyoboro Mugari kuko wagaragaje uruhare rwa siyansi n’ikoranabuhanga mu iterambere.”

Muri uru ruzinduko Perezida Kagame kandi yagiranye ikiganiro n’abanyamakuru, atera igiti mu busitani bw’igihugu anakina umukino wa Tennis ikinirwa mu muhanda, imenyerewe cyane muri iki gihugu. Perezida Kagame yageze i Barbados nyuma y’uruzinduko yari amaze iminsi agirira muri Jamaica.

Perezida Kagame yakiriwe mu cyubahiro gihabwa abakuru b'ibihugu.

Minisitiri w'Intebe wa Barabados, Mia Amor Mottley yakira Perezida Kagame.

Minisitiri w’Intebe, Mia Amor Mottley, yashimye imiyoborere ya Perezida Kagame.

Perezida Kagame yagiranye ibiganiro na Minisitiri w’Intebe wa Barbados, Mia Amor Mottley.

Perezida wa mbere wa Barbados, Sandra Mason yakiriye mu biro bye Perezida Kagame.

Perezida Kagame na Perezida Sandra Mason bafashe ifoto y'urwibutso.

Perezida Kagame yanagiranye ibiganiro na Sir Garry Sobers ndetse na Sir Wesley Hall babiciye bigacika mu mukino wa Cricket.

Mu bayobozi baherekeje Perezida Kagame harimo Clare Akamanzi, uyobora Urwego rw'Igihugu rw'Iterambere na Minisitiri w'Imari n'Igenamigambi, Dr Uzziel Ndagijimana.

Perezida Kagame na Mia Amor Mottley bagenzura uko igikorwa cyo gusinya amasezerano y'ubufatanye hagati y'ibihugu byombi agenda.

Perezida Kagame yashimye urugwiro we n’itsinda bari kumwe bakiranywe muri Barbados.

Perezida Kagame yasize ateye igiti cy'urwibutso muri iki gihugu.

Minisitiri w’Intebe, Mia Amor Mottley, avomerera kimwe mu biti byatewe kuri uwo munsi.

Tennis yo ku muhanda ni umwe mu mikino ikunzwe muri Barbados.

Perezida Kagame yagize umwanya wo gukina Tennis yo ku muhanda.

Amafoto: Village Urugwiro