00:00:00 IGIHE NETWORK KN KINYARWANDA EN ENGLISH FR FRANCAIS

Algorithm Inc yahawe isoko ryo gukora EBM muri Ghana yahize gukomeza guhagararira u Rwanda

Yanditswe na Igizeneza Jean Désiré
Kuya 25 Ukuboza 2022 saa 12:22
Yasuwe :

Ikigo gitanga serivisi z’ikoranabuhanga, Algorithm Inc cyatangaje ko gishaka kugira u Rwanda igicumbi cy’ikoranabuhanga cyane cyane irijyanye no gufasha abacuruzi mu bikorwa byabo ku buryo ibihugu bitandukanye bya Afurika bizajya biza kwigira k’u Rwanda.

Iki kigo kivuga ibi mu gihe kimaze kugera mu bihigu bitandukanye gitanga ubufasha mu by’ikoranabuhanga hifashishijwe abana b’Abanyarwanda cyagiye gihugura baturutse muri Kaminuza zitandukanye zo mu gihugu.

Kugeza ubu Algorithm Inc ni yo yubatse ndetse inafasha mu gukoresha ikoranabuhanga ryo gukusanya imisoro ndetse no gukoresha imashini zifashishwa mu gutanga inyemezabuguzi (EBM) muri Ghana.

Boherejeyo abakozi babo bagera ku 10 ku buryo bari gufasha abakozi b’ikigo cy’imisoro muri iki gihugu.

Mu muhango wo kwizihizanya isozwa ry’umwaka n’abakiliya babo, Umuyobozi Mukuru wa Algorithm Inc, Kimenyi Aimable yavuze ko uretse Ghana bafasha n’Ikigo cy’Imisoro n’amahoro, RRA kugenzura umusoro ku nyungu w’igihugu binyuze mu mushinga EBM2.

Yemeza ko bijyanye n’ubuhanga ndetse n’ubunararibonye uyu mushinga wakoranwe, wishimiwe n’abanyamahanga batandukanye ku buryo bahora bifuza kwigira k’u Rwanda.

Ati "Twabikoze ku buryo amakuru yose ajyanye b’ubucuruzi ari kugenda bituma ikigo gishinzwe imisoro kibona uko kiyigena. Mbere abacuruzi basoraga uko bashaka amwe mu mafaranga binjije ntibayagaragaze ariko uyu munsi amakuru ari kuba amenyekana mu gihe gito."

Uyu muyobozi avuga ko abana b’u Rwanda bashoboye kuko abo ikigo ayoboye batangiye gufasha ibihugu by’amahanga mu bijyanye n’ikoranabuhanga.

Ati "Ubuyobozi bwa Kenya uyu munsi buvuga ko bugomba gukora nk’u Rwanda cyane cyane mu buryo bwo gukusanya imisoro. Turi gukora cyane kugira ngo turebe uko nabo tuzabafasha."

"Mu Burundi na ho turahakorera kuko bariteguye. Zambia na yo ishaka ko twatangira gukorana umwaka utaha, u Rwanda rwarahindutse tugomba kuruteza imbere uko byagenda kose."

Kimenyi avuga ko Afurika ibonamo u Rwanda igisubizo mu ngeri nyinshi ari yo mpamvu nk’abikorera bashaka kwifashisha imbaraga z’urubyiruko kugira ngo hashakwe ibisubizo bitandukanye bizatuma igihugu na Afurika muri rusange bitera imbere.

Uyu Muyobozi unafite inshingano mu Rugaga rw’abikorera, PSF nk’Umuyobozi Mukuru wungirije wa kabiri, avuga ko abikorera bashaka guha umwanya abakiri bato bagakorera igihugu kuko ari bo mbaraga z’ejo.

Algorithm Inc ifasha ibigo byinshi byaba iby’ubuvuzi, ibicuruza imiti n’ibindi bicuruzwa bitandukanye, haba mu kubakorera imbuga za internet na porogaramu zitandukanye bakeneye.

Umukozi mu kigo gicuruza ibikoresho by’ubuvuzi n’imiti, KIPHARMA, Lambert Kadende umaze imyaka 15 muri aka kazi avuga ko iki kigo kimaze imyaka irenga 13 gikorana na Algorithm Inc, ibyahinduye imikorere yabo.

Ati "Mbere gucunga ububiko byabaga bigoye kuko ibyasohokaga wagombaga kujya kugikura ku ikarita cyangwa ifishi ariko ubu ntabwo bibaho. Ubu dusigaye dukoresha porogaramu y’ikoranabuhanga ku buryo bisigaye byoroshye, aho tugeze ubu Algorithm Inc yabigizemo uruhare."

Avuga ko ubu buryo bw’ikoranabuhanga bwabafashije mu kugenzura amafaranga yinjira ku buryo uyu munsi byaba bigoye ko umuntu yayanyuza ku ruhande uko yishakiye kuko ibyo yagurishije biba bigaragara bityo kugira uburiganya bikaba bidashoboka.

Uretse gufasha ibigo bitandukanye mu kwimakaza ikoranabuhanga, Algorithm Inc ifasha abanyeshuri bo muri za kaminuza zitandukanye kwihugura muri uru rwego, abafite n’imishinga itandukanye bagafashwa kuyinoza.

Ibi niko byagendekeye Uwera Sandrine wiga muri African Leadership University kuko ari gufashwa mu kunoza umushinga we uzafasha abafite ubumuga kugenda mu modoka rusange bisanzuye, aho ateganya gukora porogaramu ishyirwa mu modoka ikabwira abafite ubumuga bwo kutumva aho bageze, igafasha n’abatabona kubimenya binyuze mu buryo bw’amajwi.

Ati "Imana yarakoze yo yanyeretse Algorithm Inc, bari kumfasha kugera ku nzozi zanjye kandi nizeye ko uyu mushinga uzagenda neza na bariya bantu bagafashwa kujyana n’iterambere igihugu kigezeho."

Mu mwaka utaha Algorithm Inc irashaka kwagurira ibikorwa mu bihugu bitandukanye ku buryo abantu bose bashaka serivisi z’ikoranabuhanga ari ho bazajya bagana bagafashwa mu buryo bumwe cyangwa ubundi.

Muri uyu muhango hahembwe abakoranye neza na Algorithm Inc
Iki gikorwa cyitabiriwe n'abakozi ba Algorithm Inc
Abakozi muri Algorithm Inc bateze amatwi ubutumwa Umuyobozi mukuru yabagezagaho
Umuyobozi Mukuru wa Algorithm Inc yagaragaje ko imihigo ikomeje ku buryo ibihugu byinshi bizajya biza gushaka serivisi y'ikoranabuhanga mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .