Akon yavuze ku mushinga w’amashanyarazi yatangije mu bihugu birimo n’u Rwanda n’uko yacuruje diamant

Yanditswe na Uwiduhaye Theos
Kuya 13 Ugushyingo 2019 saa 07:46
Yasuwe :
0 0

Umuhanzi ukomeye akaba n’umushoramari, Aliaune Damala Badara Akon Thiam [Akon], yavuze ku ngorane yahuye nazo agitangira umuziki, uko yacuruje diamant ndetse no ku mushinga w’amashanyarazi yatangije mu bihugu birimo n’u Rwanda.

Akon yabivugiye mu kiganiro yagiranye Capital XTRA yo mu Bwongereza iri mu maradiyo akomeye.

Uyu muhanzi yagaragaje ukuntu yatangiye umuziki afite studio eshatu ndetse akajya yitanga agafasha abahanzi bamwe kubona umwanya wo gufata indirimbo atabishyuje.

Ati “Umuziki nawugiyemo ku bw’impanuka. Nafashe amafaranga make nyashora muri studio z’umuziki kuko hari ahantu hari amafaranga. Wasangaga banyishyura $50 ku isaha. Nari mfite studio eshatu. Studio zanjye zabaga zafashwe zirimo abantu benshi ariko mfite n’urutonde rurerure rw’abaza ari benshi bagakorera ubuntu, ibyo byatumaga n’umuntu uzanye amafaranga abura umwanya.”

Uyu muhanzi akomeza avuga ko atajyaga ava muri studio kubera ko yumvaga ko byazamutera ibihombo.

Akon ngo hari igihe cyageze mu muziki agatangira kwibaza byinshi birimo uko indirimbo ze zizajya zikinwa, radiyo zizazikina, niba hari abantu bazemera gukorana na we, imodoka azajya agendamo n’uko indirimbo ze zizajya zikorwa bikamucanga.

Ku wa 9 Nzeri 2019 nibwo abaturage bo mu Mirenge ya Ndego na Rwinkwavu mu Karere ka Kayonza, bashyikirijwe ibikorwa remezo birimo amashyanyarazi akomoka ku zuba, imbangukiragutabara eshatu n’amazi meza bifite agaciro k’ibihumbi 250$ (asaga miliyoni 233 Frw).

Babishyikirijwe n’abagiraneza barimo Samba Bathily; Umuhanzi w’Umunyamerika ukomoka muri Sénégal, Akon na Thione Niang binyuze mu mushinga wabo ’Akon Lighting Africa’.

Ageze kuri uyu mushinga abajijwe ibijyanye nawo yavuze ko yawutangiye ari nka gahunda yo gufasha ariko akabona bitazaramba agahitamo kuwuhinduramo kuwubyaza inyungu.

Ati “Ni ibintu ntari kureberera n’ubwo nari kuba nabibasha. Nabitangiye ari nka gahunda yo gufasha abantu nkaha amashanyarazi abatarayigeze bo mu byaro. Namenye ko ari ibintu byari bikenewe n’abantu benshi. Nashakaga gukora ikintu kizamara igihe. Natangiye ari ibintu byo gutera inkunga ariko ngeze aho nshaka no kubibyaza amafaranga kuko ari bwo nabonaga ko nakora ibintu byinshi.”

Yemeza ko yafashe icyemezo cyo guha akazi abantu b’imbere mu bihugu byabo kugira bashyire ayo mashanyarazi aho agomba kujya kandi babe na bamwe mu bafatanyabikorwa b’umushinga.

Ngo Umushinwa witwa Chan ni we wamuhuje n’abaherwe bo muri icyo gihugu bari bakeneye ko Akon abereka uko umushinga we uteye mu buryo buboneye kuko nabo bashakaga kuza muri Afurika gukora ibikorwa nk’ibi ariko barabuze aho bamenera.

Uyu mushinga wa Akon ukorera mu bihugu bya Afurika y’Uburengerazuba bwa Afurika no mu y’Uburasirazuba birimo u Rwanda na Kenya.

Avuga ko basimbuje igiciro cy’aya mashanyarazi amafaranga abaturage bari basanzwe bishyura mu kugura peteroli.

Ati “Twasimbuje igiciro cy’amashanyarazi uburyo bwo kwishyura igiciro gito n’ubundi abaturage bishyuraga bagura peteraoli n’ibindi byabafashaga mu kubona urumuri.”

Akon Lighting Africa ni umushinga wo gucanira ibihugu bya Afurika bigizwemo uruhare n’Ikigo Solektra International; Akon na Thione bafitemo imigabane.

Uyu mushinga wagenewe guha amashanyarazi Abanyafurika bagera kuri miliyoni 600, batuye mu bice bitaragezwamo umuriro w’amashanyarazi, mu bihugu birenga 14.

Guverinoma y’u Rwanda yo yihaye intego ko muri gahunda y’ibikorwa byayo by’imyaka irindwi uhereye mu 2017, umwaka wa 2024 uzasiga Abanyarwanda 100% bagerwaho n’umuriro w’amashanyarazi mu gihe ubu agera kuri 53%. Bivuze ko mu myaka itanu isabwa kuyageza kuri 47% basigaye.

-  Akon mu bucuruzi bwa diamant …

Uyu mugabo mu buzima bwe avuga ko hari igihe yakoze ubucuruzi bwa diamant muri Afurika y’Epfo bukanamuhira ariko akaza kubireka kubera ko yasanze byarakorwaga mu buryo yabonaga bwamushyira mu byago.

Ati “Nagiye mu bucuruzi bwa zahabu guhera mu 2008 kugeza mu 2012. Amafaranga navanagamo yari amafaranga meza icyo gihe Hip hop yari ikunzwe ku buryo abahanzi bayikoraga babaga bambaye amaherena, amasaha, amashene n’ibindi bikozwe nayo gusa.’’

Akon avuga ko ryari ishoramari ryiza ku Isi kuko yari aziranye n’abahanzi benshi bamuhamagaraga.

Ati “Nafashe amafaranga yanjye nyashyira muri ubwo bucukuzi muri Afurika y’Epfo ariko ubucuruzi bwa diamant buba bugoye bwagushyira no mu byago. Nka Sierra Leone itaratangira gucukura amabuye y’agaciro yari igihugu kimeze neza ariko aho bitangiriye byabaye bibi.”

Avuga ko izina rye ryari rizwi cyane muri icyo gihe ari kimwe mu byatumye afata umwanzuro wo kubivamo kubera ko yabonaga birimo ibibazo, yirinda kuba yahamagazwa akagira ibyo abazwa.

Akon w’imyaka 46 yakuriye muri Sénégal aza kujya muri Amerika agiye kwiga mu mashuri yisumbuye, icyo gihe iyo yasozaga igihembwe yaratahaga ariko ayasoje ahitamo kwigumirayo.

-  Reba ikiganiro, Akon yagiranye na Capital XTRA

Umuhanzi ukomeye akaba n’umushoramari, Aliaune Damala Badara Akon Thiam, ni umwe mu bakunda u Rwanda cyane aha ni mu 2017 ubwo yatangaga ikiganiro muri YouthConnekt yabereye mu Rwanda muri uwo mwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza